Ձեր վստահելի աղբյուրը

«Կառավարության նիստում Փաշինյանը հերթական անգամ փորձում է մոլորեցնել ժողովրդին։ Հայրենիքի տարածքը թուրքին տալով՝ սուտ է խոսում, թե գիտեք այդ հատվածը տվել ենք, որ ուրիշ բան չտանք»,- կառավարության դիմաց հանրահավաքին ասաց «Հայաստան» խմբակցության պատգամավոր Գեղամ Մանուկյանը։

Նա նշեց, որ Փաշինյանն ամեն օր սուտ խոսելով՝ շատ ավելին է տալիս։

«Քանի որ այսօր՝ քիչ առաջ, նա կրկին փորձ արեց խաբել, հիմա մեր գործընկերների հետ, օգտվելով մեր սահմանադրական իրավունքից, գնալու ենք կառավարության նիստ, ուղիղ եթերում, ոչ փակ դռների հետևում, ուղղակի նրան ասելու, թե ինչ ստեր է  խոսում, ինչպես է խաբում մեր քաղաքացուն։

Որևէ մեկը, կրկնում եմ պարոնայք ոստիկաններ, չի կարող արգելել մեր սահմանադրական իրավունքից օգտվելուն»,- ասաց Գ. Մանուկյանը՝ փորձելով մոտենալ կառավարության շենքին։ 

Ոստիկանները թույլ չեն տալիս Գ. Մանուկյանին և մյուս պատգամավորներին մոտենալ կառավարության շենքին։

«Իրավունք չունեք պատգամավորի ազատ տեղաշարժը սահմանափակել, գնացեք սահմանադրություն կարդացեք»,- նշում էին պատգամավորները։

Ոստիկանների ու հանրահավաքի մասնակիցների միջև հրմշտոց տեղի ունեցավ։ 

«Առանց թուրքի Հայաստան», «Նիկոլ դավաճան» անընդհատ բղավում են  հանրահավաքի մասնակիցները։ 

Ոստիկանները  բերման են ենթարկում քաղաքացիներին։