Ձեր վստահելի աղբյուրը

«Ամեն օր մեր երկիրը կանգնում է խնդիրների առջև, ամեն օր մենք գնում ենք նոր զիջումների»,- ասուլիսում ասաց ԱԺ «Հայաստան» խմբակցության պատգամավոր, «Վերածնվող Հայաստան» կուսակցության նախագահ Վահե Հակոբյանը:

Նա նշեց, վերջին մեկ շաբաթվա իրադարձությունները վերլուծելով՝ գալիս են եզրակացության, որ 2020 թ. պատերազմում կրած պարտությունը շարունակական բնույթ է կրում. չսահմանափակվեցին Գորիս-Կապան ճանապարհը կորցնելով, փակվեց Կապան-Ճակատեն ճանապարհը, ադրբեջանական զինուժն ավելի է խորանում ՀՀ սուվերեն տարածքում:

Ըստ Վ.Հակոբյանի, այլընտրանքային ճանապարհի նախագիծն արվել է սխալներով, թեև դեռևս ձյուն չի եկել, ճանապարհներին սառույց չկան, մառախուղ չէ, արդեն խոշոր խցանումներ են առաջանում:

«Կապան-Ճակատեն ճանապարհը կորցնելով՝ 4 գյուղի՝ Սրաշեն, Ճակատեն, Շիկահող, Վերին Հանդ, 600 բնակիչ, մնացին շատ բարդ  կացության մեջ: Այդ գյուղերը Կապան խոշորացված համայնքի մեջ են մտնում, եթե 10 կմ էին հատում Կապան հասնելու համար, հիմա ստիպված պետք է գնան Մեղրիով, Քաջարանով, 150 կմ շրջանց կատարելով՝ գան Կապան»,- ասաց ընդդիմադիր պատգամավորը:

Այնուհետև նա հարցադրում արեց՝ այս պայմաններում ի՞նչ է անում կառավարությունը:

«Փոխանակ անվտանգության հարցերը փորձի լուծել, բեմադրություններ է անում՝ նախարար է հանում, նշանակում: Ինչո՞ւ հեռացվեց պաշտպանության նախարարը, պատշաճ դիմադրություն չէ՞ր իրականացնում, թե՞ հակառակը: Ինչո՞ւ հանրությունը դրա մասին չգիտի: Ի՞նչ կապ ունի Սուրեն Պապիկյանը պաշպանության նախարարության հետ:

Այս ամեն ինչը մի կողմ դրած՝ Փաշինյանը շարունակում է իր մանր վրեժխնդրությունը՝ կալանավորելով մեր գործընկերներին»,- պատասխանելով իր հարցադրմանը՝ ասաց Վահե Հակոբյանը:

Նա համոզված է՝ այս կառավարության օրոք մեր պարտությունները, կորուստները լինելու են շարունակական, մինչև  մեր պետականության կորուստը:

«Այս իշխանությունները չունեն հասկացողություն՝ ինչ է նշանակում պետական և ազգային շահ: Իրենք ունեն մեկ շահ՝ աթոռներից կառչել, իրենց պաշտոններում մնալ»,- ասաց «Հայաստան» խմբակցության պատգամավոր Վահե Հակոբյանը: