Ձեր վստահելի աղբյուրը

«Եթե կան այդպիսի անձինք, որոնք փորձել են, կամ մտադիր են եղել, կամ գործադրել են ջանքեր մսխելու «Հայաստան» հիմնադրամի հեղինակությունը, պատիվը, համբավը կամ անվստահություն են սերմանել, ապա պետք է կարողանանք այդ ամենին սպառիչ պատասխան տալ»,- «Հայաստան» համահայկական հիմնադրամի կողմից հավաքված և ՀՀ պետական բյուջե փոխանցված միջոցների օգտագործումն ուսումնասիրող ԱԺ քննիչ հանձնաժողովի առաջին նիստում հայտնեց «Հայաստան» խմբակցության քարտուղար, հանձնաժողովի նախագահ Արծվիկ Մինասյանը:

Նա պնդեց, որ հիմնադրամի վերաբերյալ վերջերս հանրության մոտ առաջացած կասկածները պետք է լիարժեքորեն փարատվեն, եթե կան չարաշահումներ, ապա նրանց մեղավորները պետք է բացահայտվեն և պատժի ենթարկելու առաջարկները ներկայացվեն, իսկ եթե նման բան չբացահատվի, ապա ոչինչ չի  խանգարում, որ այդ մասին հանձնաժողովի բոլոր անդամները հրապարակային հայտարարություն անեն:

«Ես՝ որպես հանձնաժողովի նախագահ, ասել եմ ու կրկնում եմ, մեր նպատակը ճշմարտությունը վեր հանելն է, միջոցների օգտագործման օրինականությունը հաստատելը, կամ հերքելը, եթե կան չարաշահումներ, ապա մեղավորներին պատժի հենթարկելու համապատասխան վարույթներ  հարուցելը, անարդյունավետ կամ ապօրինի օգտագործված գումարների վերականգնումը, որպեսզի վերականգնվի այն խաթարված հեղինակությունը, որը, ցավոք սրտի, հանրության տարբեր հատվածներում ձևավորվել է հիմնադրամի հանդեպ»,- ասաց Մինասյանը՝ շեշտելով, որ «Հայաստան»  հիմնադրամն անկախության 30 տարիների ամենակայացած կառույցներից մեկն է եղել և նրա հեղինակությունն առաջնային է:

Հանձնաժողովի նախագահը նկատեց, որ հանձնաժողովը պետք է հնարավորություն ունենա իր նիստերին հրավիրել և հարցեր ուղղել բոլորին, որոնք առնչվել են հիմնադրամի գործունեության հետ՝ սկսած ՀՀ նախագահից, նախարարներից, իսկ քննության հիմնական նպատակը պատերազմի օրերին հավաքված մեծ գումարի մի մասի՝ կառավարության բյուջե փոխանցված 52 մլրդ դրամի օգտագործման հարցն է:

«Պատիվ ունեմ» խմբակցության պատգամավոր Հայկ Մամիջանյանը ներկաներին հիշեցրեց, որ խնդրով քննիչ հանձնաժողովի ձևավորման նախաձեռնությունն իրենց խմբակցությանն է եղել և, Արծվիկ Մինասյանի կարողությունը հաշվի առնելով, նրան առաջարկել են ղեկավարել այն:

Արծվիկ Մինասյանը նաև շեշտեց, որ հանձնաժողովի անդամ պատգամավորների ցուցակը ընդդիմադիր խմբակցությունները ներկայացրել են նոյեմբերի 3-ին, իսկ ՔՊ-ն՝ նոյեմբերի 23-ին և այդ պատճառով աշխատելու համար էական ժամանակ են կորցրել, որը լուրջ խնդիր է:

ԱԺ նախագահի հաստատած քննիչ հանձնաժողովի կազմում ընդգրկված են՝

Հանձնաժողովի նախագահ՝ Արծվիկ Մինասյան - Ազգային ժողովի «Հայաստան» խմբակցության քարտուղար

Հանձնաժողովի անդամներ՝

Էլինար Վարդանյան - «Հայաստան» խմբակցություն
Թադևոս Ավետիսյան - «Հայաստան» խմբակցություն
Հայկ Մամիջանյան- «Պատիվ ունեմ» խմբակցություն

Գևորգ Պապոյան - «Քաղաքացիական պայմանագիր» խմբակցություն
Բաբկեն Թունյան  - «Քաղաքացիական պայմանագիր» խմբակցություն
Ծովինար Վարդանյան - «Քաղաքացիական պայմանագիր» խմբակցություն
Արուսյակ Մանավազյան- «Քաղաքացիական պայմանագիր» խմբակցություն
Հովիկ Աղազարյան- «Քաղաքացիական պայմանագիր» խմբակցություն
Արուսյակ Ջուլհակյան - «Քաղաքացիական պայմանագիր» խմբակցություն
Սերգեյ Բագրատյան- «Քաղաքացիական պայմանագիր» խմբակցություն:

Հանձնաժողովը քվերակությամբ նախագահի տեղակալ ընտրեց ՔՊ պատգամավոր Սերգեյ Բագրատյանին: