Մեր պետական համակարգում նորարարություն ենք մտցում, երբ մասնագիտական ստաժ չունեցող մեկը կարող է ղեկավարել ՊՈԱԿ. Աղվան Վարդանյան
ՀՀ կառավարության ներկայացրած «Պետական ոչ առևտրային կազմակերպությունների մասին» օրենքում փոփոխություններ կատարելու մասին օրենքը բացում է մի սողանցք, հնարավորություն, որ ՊՈԱԿ-ների ղեկավարներ նշանակվեն մարդիկ, ովքեր չունեն մասնագիտական աշխատանքի փորձ: ԱԺ-ում «Պետական ոչ առևտրային կազմակերպությունների մասին» օրենքում փոփոխություններ կատարելու մասին օրենքի նախագծի քննարկմանն ասաց «Հայաստան» խմբակցության պատգամավոր Աղվան Վարդանյանը:
Նա նշեց, որ կառավարությունը ԱԺ է բերել մի օրենքի նախագիծ, որը, չգիտես ինչու, ներկայացնում է շրջակա միջավայրի նախարարությունը, մինչդեռ տրամաբանական կլիներ ՊՈԱԿ-ներին վերաբերող նախագիծն արդարադատության նախարարությունը ներկայացներ: Նրա կարծիքով, ենթատեքստը հասկանալի է:
«Նախկինում գործող օրենքով ՊՈԱԿ-ի տնօրեն նշանակելու համար մարդը պետք է ունենար մասնագիտական աշխատանքի ստաժ: Մեր կառավարությունը բերել է օրենքի նախագիծ, որով մասնագիտական աշխատանքի ստաժը փոխարինել է ընդամենը համապատասխան բնագավառի աշխատանքային ստաժով, այսինքն որևէ մեկը՝ բանվոր, առաջին կարգի մասնագետ կարող է նշանակվել ՊՈԱԿ-ի ղեկավար: Եթե ընդլայնել ասելով դուք սա եք հասկանում, այո, ընդլայնել եք շրջանակն այնքան, որ շրջակա միջավայրի նախարարության ՊՈԱԿ-ներում նշանակվեն մարդիկ, ովքեր չունեն մասնագիտական աշխատանքի ստաժ: Սրանով մեր պետական համակարգում նորարարություն ենք մտցում, երբ մասնագիտական ստաժ չունեցող մեկը կարող է ղեկավարել ՊՈԱԿ-ը»,- ասաց ընդդիմադիր պատգամավորը:
«Հայաստան» խմբակցության պատգամավոր Արամ Վարդևանյանն ասաց, որ 2020 թ. հունիսի 4-ին կառավարությունը որոշում է ընդունել, որով կարգ են սահմանել, բայց օրենքը բերել են փոխելու 2021 թվականի դեկտեմբերին:
«Այսինքն, 2020 թվականի հունիս ամսից Հայաստանում օրինականության սկզբունքը խախտվել է ու դա շատ ուղիղ է ասվում»,- նշեց նա:
Արամ Վարդևանյանը նաև ասաց, որ պետք է այսուհետև ուշադիր լինել ՊՈԱԿ-ների տնօրենների կենսագրությանը ու կարող է վստահեցնել, որ «Քաղաքացիական պայմանագիր» կուսակցության առնչությունը նոր տնօրենների դեպքում հստակ է լինելու:
«Պետական ոչ առևտրային կազմակերպությունների մասին» օրենքում փոփոխություններ կատարելու մասին օրենքի նախագծով առաջարկվող փոփոխությունները հնարավորություն կընձեռեն հանրային ծառայության կամ մասնագիտական աշխատանքային ստաժ ունեցող անձանց ևս մասնակցելու գործադիր մարմինների ընտրությանը (նշանակմանը), ինչպես նաեւ ամրագրելու դրույթ այն մասին, որ պետական ոչ առեւտրային կազմակերպություններին անհատույց օգտագործման իրավունքով ամրացված գույքը վարձակալության է տրամադրվում ոչ թե Կառավարության որոշմամբ, այլ Կառավարության որոշմամբ հաստատված կարգով: