Բյուջեի նախագծում ներկայացված չէ տնտեսական քաղաքականության մոդելը. Բագրատյան
ՀՀ Ազգային ժողովում 2016թ-ի պետական բյուջեի նախագծի քննարկման ժամանակ պատգամավոր Հրանտ Բագրատյանը հայտարարեց, որ բյուջեի նախագծում ներկայացված չէ տնտեսական քաղաքականության մոդելը:
«Այս բյուջեի հետ կապված խնդիրն այն չէ, որ բյուջեն պակասում է, ինձ դա չի հետաքրքրում, 2 տոկոս տնտեսական աճն էլ ինձ չի հետաքրքրում: Այս բյուջեի ամենավտանգավորն այն է, որ եթե սա ընդունենք և անցնի, ապա մյուս տարվա բյուջեն էլ ավելի է պակասելու, և մենք տեսնելու ենք, որ մեր երկիրն օրեցօր հետ է գնում»,- ընդգծեց Հ.Բագրատյանը:
Նրա խոսքերով՝ եթե բյուջեի նախագծում չեն ներակայացրել տնտեսական քաղաքականության մոդելը, ապա դա այն բանի հետևանք է, որ կառավարությունում չեն վերլուծել իրավիճակը: Արդյունքում այս կառավարությունը, ըստ պատգամավորի, մոտավորապես նույն բախտին է արժանանալու, ինչ նախորդ կառավարությունը:
«Այս կառավարությանը մենք զգուշացրել ենք՝ տնտեսությունն աճելու համար պետք է այլ քաղաքականություն: Նախորդ կառավարությունը չէր հասկանում, քաղաքականություն չուներ, ասում էր՝ մակրոտնտեսական ստաբիլիզացիա: Մակրոտնտեսական ստաբիլիզացիան վերաբերում է միջավայրին, ասենք, բաղնիքի ջերմաստիճանը պետք է լինի 30 աստիճան, բայց բաղնիքում լողանալու համար նաև տաք ջուր է պետք: Խնդիրը տաք ջուրն է ու լողանալն է: Ահա դուք մնում եք նույն մեթոդաբանության մեջ, դուք չեք լսում, բայց կան մարդիկ, որ ձեզ ասում են այդ քաղաքականությունը»,- ասաց Հ.Բագրատյանը:
Ըստ նրա՝ քաղաքականությունն այն չէ, որ ասում են՝ բնօգտագործման ոլորտում պետք է միջոցառումներ արվեն, որ գետերը չկեղտոտվեն:
«Պետք է միջոցառում անեի՞ք, որ գետերը կեղտոտվեի՞ն: Քաղաքականություն չէ, պարոն Ասատրյան, վեր կենալ ու ասել, թե հաշմանդամներին այսքան սայլակ կտանք: Էդ էլ չանե՞ք: Իսկ ո՞րն է սոցիալական քաղաքականությունը, ինչպե՞ս եք եկամուտները բաշխելու, որ նպաստի տնտեսության աճին, ինպե՞ս է եկամուտների բաշխումը նպաստելու համախառն պահանջարկի կորի վրա, այ սա չկա: Այ սա դուք պետք է ասեք»,- ընդգծեց պատգամավորը:
Բագրատյանի խոսքերով՝ վերականգնողական աճը սպառվել է, 90-ականներին արվել են բարեփոխումներ, որոնք պատգամավորի գնահատմամբ՝ լավագույնն էին աշխարհում, բայց դրանից հետո գալիս է աճի մեկ այլ փուլ՝ ինչ անել, որ զարգացնեն, խրախուսեն տնտեսության զարգացումը:
«Էսօր դուք կարող եք ինձ ասել՝ այ Բագրատյան, ի՞նչ վերականգնողական աճ, մենք փող չունենք աշխատավարձ տալու: Լսեք, փող ունեցողը չի խնայում, սկսում են խնայել, երբ որ փող չունեն: Մենք ձեզ ասում ենք բերեք 100-200 մլրդ փող, դրեք երկու-երեք կլաստեր, ասեք՝ սա զարգացնում ենք, մասնավոր սեկտորի արի, վրեն դիր փողը, որ ավելանա: Այս ճանապարհը եթե չանեք, ոչինչ չի ստացվելու, կամ կաճենք, կամ չենք աճի: Էս բաներն ասում ենք, բայց չի մտնում, այ մարդ: Մի հատ էլ հիմնադրամ դնեիք, ասեիք՝ ժողովուրդ, ձեզ հրավիրում ենք խնայողության, գիտենք աղքատ ես, թոշակդ քիչ ա, արի հազար դրամ ներդրի, ես քեզ հինգ տոկոս եկամտաբերության գարանտիա եմ տալիս: Ձեր ներդրումներն էլ են մոնոպոլիզացվել, որևէ օլիգարխի անվան հետ են կապված, ասում եք՝ ախպերս ներդրում արեց: Այդպես չէ, էն աղքատ գյուղացին պիտի ներդնի»,- ասաց նա:
Այսպիսով, Հրանտ Բագրատյանը նշեց, որ բյուջեի խնդիրը հաջորդ տարի ավելի լարված է լինելու:
«Խնդրում եմ՝ գնացեք լուրջ տնտեսական քաղաքականության, սխալ կամ ճիշտ, բայց կարդալով թուղթը՝ տեսնենք, որ կա տնտեսական քաղաքականություն»,- եզրափակեց պատգամավորը:
Լրահոս
Տեսանյութեր
Ոստիկանները Բագրատ Սրբազանին և ԱԺ պատգամավորներին թույլ չեն տալիս մուտք գործել Կիրանց