Ձեր վստահելի աղբյուրը

«Արցախից բռնագաղթածներին 300 հազար դրամի աջակցություն հատկացնելու ծրագրով որոշակի չարաշահումներ եղել են, որը նաև Արցախի Հանրապետության Տարածքային կառավարման նախարարությունն էր բացահայտել և Արցախի իրավապահ մարմինները նույնպես զբաղվել են  դրանով»,-«Հայաստան» համահայկական հիմնադրամի կողմից հավաքագրված և ՀՀ պետական բյուջե փոխանցված միջոցների օգտագործումը ուսումնասիրող ԱԺ քննիչ հանձնաժողովի նիստում հայտնեց աշխատանքի և սոցիալական հարցերի նախկին նախարար Մեսրոպ Առաքելյանը:

Նրա խոսքով՝ Արցախի Հանրապետության  վերահսկողությունից դուրս մնացած տարածքներում նախկինում բնակվող անձանց տրամադրվել էր միանվագ աջակցություն 300 հազար դրամի չափով և այն ստանալու չափանիշն այն էր եղել, որ այդ քաղաքացիները պետք է հաշվառված լինեին և վերջին 3 ամսում փաստացի բնակվեին Ադրբեջանի կողմից բռնազավթած տարածքներում:

Առաքելյանը հայտնեց, որ փաստացի բնակության վերաբերյալ տեղեկանքը ներկայացնում էին գյուղապետերը  և խոսքը գնում էր 36-38 հազար քաղաքացիների մասին:

Աշխատանքի և սոցիալական հարցերի նախկին նախարարը հայտնեց, որ իրենց կողմից նույնպես ստուգումներ էինք անցկացվում, այլ բազաների հետ էին համեմատվում և պարզել էին, որ կային շահառուներ, որոնք այդ ընթացքում գրանցված են եղել և աշխատել էին Հայաստանի Հանրապետությունում, օրիկնակ՝ դպրոցում:

Նրա խոսքով՝ անճշտությունները վերաբերում էին մի քանի տասնյակ մարդկանց, որոնց տվյալները Աշխատանքի և սոցիալական հարցերի նախարարությունը ներկայացրել էր Արցախի Հանրապետության իրավապահ մարմիններին:

«Եթե չեմ սխալվում այդ մասով քրեական գործեր կան և մեղադրանքներ են ներկայացվել գյուղապետերին»,-հայտարարարեց Մեսրոպ Առաքելյանը և պարզաբանեց, որ ՀՀ Աշխատանքի և սոցիալական հարցերի նախարարությունը հիմք էր ընդունել Արցախից ներկայացված ցուցակները և գումարներն հատկացրել էր առանց լրացուցիչ ուսումնասիրության:

Պատասխանելով քննիչ հանձնաժողովի նախագահի տեղակալ, ՔՊ պատգամավոր Բաբկեն Թունյանի հարցին՝ Առաքելյանը նշեց, որ գումարը հատկացնելուց հետո վերահսկողություն է իրականացվել, քանի որ շատ գյուղեր բռնազավթելուց հետո փաստացի բազաներ էլ չեն եղել և գյուղապետերը հիշելով էին ներկայացրել ցուցակները: