Ձեր վստահելի աղբյուրը

«Էկո պայուսակ #ինձհետ» սոցիալական ձեռնարկատիրությունը   մեկնարկել է #ինձհետ սոցիալ-բնապահպանական էկո-արշավը, որի նպատակն է աջակցել պոլիէթիլենային տոպրակներից սահուն անցումը դեպի էկո/կտորե բազմակի օգտագործման պայուսակների գործընթացին։ Panorama.am-ի հետ զրույցում Սոցիալական ձեռնարկատիրության հիմնադիր Հռիփսիմե Քոչարյանն ասաց, որ կտորե տոպրակները կարում են այն մայրիկները, որոնք ունեն առողջական խնդրով երեխաներ:

«ԱՄՆ-ում նկատեցի, որ կտորե պայուսակներ են շատ օգտագործում։ Հայաստան գալով որոշեցի այստեղ էլ ներդնել այդ մշակույթը։ Մոտ մեկ տարի այդ միտքը եփվում էր իմ մեջ։ Մեկ տարի առաջ կոնֆերանսներից մեկում մի կին խնդրեց օգնել Նաիրա անունով կնոջը, որն ունի դաունի ախտորոշումով երեխա։ Նա միայնակ էր խամում իր բալիկին և հնարավորություն չուներ աշխատանքի գնալու, բալիկին խնամող չուներ։ Տանն ուներ կարի մեքենա։ Սա եղավ խթան՝ իրագործելու կտորե պայուսակներ կարելու գաղափարը։ Ներգրավվեցինք նաև այլ մայրիկների նույնպես, որոնք ունեն հաշմանդամություն ունեցող երեխաներ»,- պատմեց Քոչարյանը։

Հռիփսիմե Քոչարյանի խոսքով ՝ այսօր 12 մայր ունի զբաղվածություն, 55 մայրիկ էլ օգնել են հմտանալ ՝ կար ու ձևի  գործում։

«Եթե պատվերները շատ են լինում , ապա այս մայրերին էլ ենք դիմում։ Ուղարկում ենք նաև մարզեր՝ Վարդենիս, Իջևան, մտածում ենք նաև Լոռու մարզում մասնաճյուղ ունենալու մասին»,- ասաց Քոչարյանը։

Նրա խոսքով՝ հիմնականում միջազգային և տեղական կառույցներն են գնորդները։ Հիմա արդեն , երբ հունվարի մեկից ուժի մեջ մտավ պոլիէթիլենային տոպրակների իրացումն արգելող օրենքը, Քոչարյանն ասում է, որ էկո-աշրավ են սկսել և  ինքնարժեքից ցածր գներով առաջարկում են  կտորե տոպրակներ,մոտ՝ 300 դրամով։ Միևնույն ժամանակ հույս ունենալով , որ կմեծանա մայրիկների զբաղվածությունը։

«Սկսել եմ ինձ լավ զգալ, որ կարողանում եմ ինչ-որ աշխատանք անել։ Կարում եմ կտորե պայուսակներ և դրանով փորձում եմ հոգալ իմ երեխայի դեղերի ծախսերը կամ այլ կարիք»,- Panorama.am-ի հետ զրույցում ասաց Միլենա Ավագյանը, ում աղջիկը  մանկուց  առաջին կարգի հաշմանդամություն ունի։

«Աղջիկս հաճախակի է նոպաներ ունենում, արդեն 21 տարեկան է և չեմ կարող  մենակ թողնել և գնալ աշխատանքի։ Այս աշխատանքն ինձ համար շատ կարևոր է, քանի որ ընտանիքի հոգսը, երեխայի խնամքը թույլ չեն տալիս անընդհատ աշխատել։ Գուցե մեկ օր ընդհանրապես չկարեմ, մեկ այլ օր էլ ազատ լինեմ և ամբող օրը կարեմ։  Օրական չեմ կարող ասել, թե որքան պայուսակ եմ կարում։ Պայամանավորվում ենք ժամանակահատված և պատվերն այդ ժամանակահատվածում հասցնել։ Այս առումով սա շատ հարմար աշխատանք է»,- ասաց Միլենան։

Այսպիսով՝ #ինձհետ սոցիալ-բնապահպանական էկո-արշավը նպատակ ունի լուծելու և′ բնապահպանական, և′ սոցիալական խնդիր։ Նախաձեռնողներն ասում են ՝ ի տարբերություն թղթե տոպրակների, կտորե տոպրակները բազմակի օգտագործման համար են և ծառահատման պատճառ չեն դառնում։