Ձեր վստահելի աղբյուրը

Հայաստանը պետք է անի հնարավոր և անհնար ամեն բան, որպեսզի Եվրոպայի խորհրդի խորհրդարանական վեհաժողովում ընդունված հակահայկական զեկույցը 2016թ-ի հունվարին կայանալիք լիագումար նիստում չընդունվի և չդառնա բանաձև: Այս մասին այսօր լրագրողների հետ հանդիպման ժամանակ ասաց  ԱԺ ՀՀԿ խմբակցության անդամ, ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը՝ անդրադառնալով ԵԽԽՎ-ում բրիտանացի պատգամավոր Ռոբերտ Ուոլթերի  ներկայացրած հակահայկական զեկույցին, որը պետք է ներկայացվի ԵԽԽՎ ձմեռային նստաշրջանում։

«Մենք պետք է աշխատենք ուժերի գերագույն լարումով, պետք է փորձենք այնպես անել, որ որևէ անգամ որևէ հակահայկական ձևակերպում չընդունվի»,- նշեց նա:

Գ.Մինասյանի խոսքերով՝ բոլորն էլ գիտեն, թե ովքեր են կողմ և դեմ քվերակել այդ դեստրուկտիվ առաջարկությանը:

«Դա միայն մեր կարծիքը չէ, որ ոչ կառուցողական է, դա համանախագահող երկրների ամենաբարձր ներկայացուցիչների կարծիքն է: Իրականում այդ որոշումները որևէ ազդեցություն չեն կարող ունենալ ԼՂ հակամարտության կարգավորման վերջնական արդյունքի վրա, բայց կարող են առաջացնել խնդիրներ վերջնական արդյունքին հասնելու համար»,- ընդգծեց Գագիկ Մինասյանը:

Ըստ պատգամվորի՝ Հայաստանը պետք է բոլորի համար դարձնի ակնհայտ այն գործիքակազմը, որով ադրբեջանական կողմը հասնում է այդպիսի ոչ կոնստրուկտիվ առաջարկությունների ընդունման. «Մենք պետք է ցույց տանք, որ կաշառելով ճշմարտություն ձեռք չես բերի: Սուտի ոտքը կարճ է, այդ բոլոր անպարկեշտ գործարքները վաղը կամ մյուս օրը պետք է սև խարան լինեն ոչ միայն կաշառք տվող, այլ վերցնող երկրի համար»: