Ձեր վստահելի աղբյուրը

Ազգային ժողովում կառավարության հետ հարցուպատասխանին ներկա ընդդիմադիր միակ պատգամավոր՝ «Հայաստան» խմբակցությունից Քրիստինե Վարդանյանը մեջբերումներ արեց երեկ թշնամական Ադրբեջանի ղեկավարի՝ Ալիևի, հայտարարություններից. «Եթե Հայաստանը զինեն, մենք դա  բացասական կընկալենք։ «Զանգեզուրի» միջանցքը  բացվելու է, եթե Հայաստանը  դրան կամավոր չհամաձայնվի, ապա կդիմենք այլ մեթոդի։  Մենք ասել ենք՝  Լեռնային Ղարաբաղ անունով  վարչատարածքային միավոր չկա։ Բրյուսելում  ես ևս մեկ անգամ հստակեցրել եմ, որ  Հայաստանն ընդունում է մեր պայմանները, իսկ հակամարտություն և  Լեռանային Ղարաբաղ բառերը չկային հայտարարության մեջ,  որովհետև դրանք լուծված են և  չեն կարող քննարկվել։ Արցախցիները պետք է ընդունեն, որ իրենք Ադրբեջանի քաղաքացիներ են, պետք է ապրեն Ադրբեջանի դրոշի ներքո»։

Այնուհետև Ք.Վարդանյանը նշեց, որ այս ամենն իմանալով՝ այսօր մի քանի  ժամանոց շոուն, որը կազմակերպել էին իշխանության ներկայացուցիչները ԱԺ-ում,  ոչ միայն չեն անդրադարձել  այս հայտարարություններից որևէ մեկին, այլև հայտարարել են, որ ինչ նախապայման ներկայացնում է  Ադրբեջանը,  իրենց համար ընդունելի է, անընդունելի ոչինչ չկա։

«Շատ լավ իմանալով, որ թուրք-ադրբեջանական տանդեմը, Ադրբեջանը  կանգ չի առնելու  ոչ մի բանի դիմաց, անկախ նրանից՝ նրանց ինչ կզիջեք,  դուք խոսում եք խաղաղության դարաշրջանի մասին, որի  միակ երաշխիքը թուրքի խոսքն է և որի վերջնարդյունքը  լինելու է  նոր ցեղասպանությունը։

Այս ամենը հաշվի առնելով՝  ես արցախցիներին միայն կասեմ՝ սիրելի արցախցիներ, լավ իմացեք, որ սա միայն ձեր հարցը չէ, Հայաստանում կան  հարյուր հազարավոր արժանապատիվ քաղաքացիներ, ովքեր  դա գիտակցում են, որ սա հայկական հարց է, իսկ ձեզ միայն մի բան ասեմ՝  հետևելով վերջին իրադարձություններին պարզ է դառնում որ Հայաստանի անունից հիմա բանակցում է սա», - ասաց Ք. Վարդանյանը՝  ցույց տալով օգտագործած շորի կտոր։

«Դուք սա եք, սա է ձեր դեմքը, սա է ճշմարտությունը և սրանից  փախչել դուք չեք կարող»,- նշեց ընդդիմադիր պատգամավորը։

ԱԺ նախագահ Ալեն Սիմոնյանը պահանջեց անջատել Ք. Վարդանյանի խոսափողը։

ՔՊ-ական պատգամավորներից որոշները տեղից բղավում էին։ Ա.Սիմոնյանը նախազգուշացում արեց Վահագն Ալեքսանյանին և Քրիստինե Վարդանյանին։

«Ոնց որ մանկապարտեզ լինի»,- ասաց Ա.Սիմոնյանը։