Ձեր վստահելի աղբյուրը

«Այսօր կրկին ցույց տվեցինք, որ մեր առաջ փակ ճանապարհ, դուռ չկա, որևէ ոստիկանական պատնեշ չի կարող կանգնեցնել այս շարժումը»,- կառավարության շենքը շրջափակելուց հետո Ֆրանսիայի հրապարակում  կայացած հանրահավաքում ասաց ՀՅԴ ԳՄ ներկայացուցիչ Իշխան Սաղաթելյանը։

Նա նշեց, որ իրենք ունենք հստակ ձևակերպված նպատակ՝ աշխարհին ցույց տալ, որ վարչապետի աթոռին հայտնված անձը չունի մանդատ ժողովրդի անունից բանակցություններ վարելու, չի արտահայտում ժողովրդի կամքն ու ինքը լեգիտիմ չէ։

«Այսօր մեկ անգամ դուք դա ապացուցեցիք»,- ասաց Սաղաթելյանը՝ դիմելով հրապարակում հավաքված քաղաքացիներին։ 

Նա հայտարարեց, որ այս համազգային շարժումը կասեցնելու է հայոց պետականության կործանման ընթացքը և հայ ժողովրդի համար կերտելու է  նոր արշալույս։

«Մենք վաղուց գիտենք, որ մարդկանց կամքը, դիրքորոշումը, տեսակետը ինքը երբեք հաշվի չի առել։ Պարզապես միշտ ցույց է տվել, որ հաշվի է առնում՝ ժողովրդի թիկունքում շարունակ գնալով դավադրությունների և զիջումների։ Մենք դա թույլ չենք տալու»,- նշեց ընդդիմադիր գործիչը։

Նա հայտարարեց, որ ԱԺ արտահերթ նիստը, որը պահանջել էին խորհրդարանական երկու ընդդիմադիր խմբակցությունները, օրենքի ուժով նշանակվել է և կկայանա  հունիսի 3-ին։ Նիստի օրակարգում խորհրդարանական ընդդիմության հայտարարությունն է հայ-ադրբեջանական և հայ-թուրքական հարաբերությունների կապակցությամբ։ 

«Մենք արդեն ասել ենք, որ դա վերջնական ջրբաժանի օրն է։ Դա այն օրն է, որ մեր հասարակության այն հատվածները, որոնք դեռ մի նշույլ կասկածում են, որ սրանք հայրենադավ են և երկիրը փորձում են տանել նոր կապիտուլյացիայի, բոլորը պետք է համոզվեն։ Հունիսի 3-ին կամ իրենք  կգան խորհրդարան, կհիմնավորեն, որ Արցախը պետք է մնա Ադրբեջանի կազմում կամ կգան, կստորագրեն այդ հայտարարությունը։

Ես վստահ հայտարարում եմ՝ իրենք չունեն այդ համարձակությունը, վախենում են Ալիևից, որի հետ ունեն պայմանավորվածություններ և չեն ստորագրելու այդ հայտարարության տակ։

Եվ այդ օրը լինելու է իրենց վերջի սկիզբը և քաղաքական գերեզմանը»,- ասաց Իշխան Սաղաթելյանը։

Նա հայտարարեց, որ մայիսի 27-ին շարունակվելու են անհնազանդության ակցիաներ։ Ակցիաներ կլինեն նաև մարզերում։ Մայիսի 27-ին հանրահավաք չի լինելու, նրա խոսքով, աշխատանքային օր է լինելու իրենց համար։ Ի. Սաղաթելյանը բոլորին մայիսի 28-ին հրավիրվում է Ֆրանսիայի հրապարակ՝ համապետական հանրահավաք, այնուհետև երթ։ Դրանից առաջ՝ 16։00-ից, Սարդարապատից տեղի կունենա ավտոերթ դեպի Ֆրանսիայի հրապարակ։

Նա ասաց, որ մայիսի 28-ին Երևանում կայանալիք հանրահավաքին զուգահեռ հանրահավաք է կայանալու Ստեփանակերտում։

«Մայիսի 28-ը մեր ազգի, պետության համար խորհրդանշական օր է։ Կրկին դիմում եմ բոլորին, ովքեր մտածում են մեր երկրի, իրենց ծնողների, երեխաների մասին, ովքեր ունեն պատասխանատվություն մեր ապագայի նկատմամբ, դուրս եկեք փողոց, կանգնեք  ձեր քույրերի ու եղբայրների կողքին։ Վիճակն, իրոք, օրհասական է։ Դուրս եկեք, դուրս եկեք միանանք, համախմբվենք և վռդնենք սրանց։ Դուրս եկեք, որպեսզի միասին կառուցենք ուժեղ, արդար, հզոր, ժոովրդավար և առաջադեմ Հայաստան»,- ասաց Իշխան Սաղաթելյանը։