Ձեր վստահելի աղբյուրը

44-օրյա պատերազմում զոհված զինծառայողների հարազատները հավաքվել են ՀՀ քննչական կոմիտեի մոտ՝ ի աջակցություն Գալեյանների։

Նշենք, որ պատերազմում զոհված զինծառայող Մխիթար Գալեյանի հորեղբայրը՝ Արթուր Գալեյանն այսօր հրավիրվել է Քննչական կոմիտե՝ քննչական գործողությունների։

Նրա եղբայրը՝ Գարիկ Գալեյանը լրագրողների հետ զրույցում ասաց, որ տեղյակ չէ, թե ինչի համար են Արթուր Գալեյանին հրավիրել Քննչական կոմիտե։ «Միգուցե կանչել են ասեն, որ գործը կարճում են, գուցե բարոյական ինչ-որ բան շարժվել է»,- ասաց նա։

Հիշեցնենք, որ մայիսի 18-ին ռազմական ոստիկանությունը ձերբակալել էր Գարիկ և Արթուր Գալեյան եղբայրներին։ Ըստ Քննչական կոմիտեի՝ նրանք մեղադրվում են զորամաս ապօրինի մուտք գործելու, իշխանության ներկայացուցչի նկատմամբ բռնություն գործադրելու եւ ծանր վիրավորանք հասցնելու մեջ: Ավելի ուշ Գալեյանները ազատ էին արձակել։

Գարիկ Գալեյանը հայտնեց, որ իրեն դեռ չեն հարցաքննել, սակայն հունիսի 24-ին հրավիրել են ՔԿ։

Անդրադառնալով Արգիշտի Քյարամյանի ու զոհված զինծառայողների ծնողների հանդիպման վերաբերյալ ՔԿ-ի տարածած պարզաբանմանը, թե հանդիպման ընթացքում չեն եղել քաշքշուկներ ծնողների և Քյարամյանի միջև, Գարիկ Գալեյանը նշեց, թե ինչպես կարող է ՔԿ-ն հերքի ծնողների ասածը։

«Եթե կարող է Արգիշտի Քյարամյանն առանց իրեն վատ զգալու հերքել 30 ծնողի, այն էլ՝ այն ծնողների, որոնց հաշվին դեռ ինքը և իր ընտանիքը գոյություն ունեն ու հայ են կոչվում։ Ինչպես կարող է 30 ծնող սուտ ասել, որ ինքն իրեն ոչ ՔԿ նախագահին հարիր է պահել, կարելի է ասել՝  չգիտակցելով ոչ ադեկվատ է պահել ծնողների նկատմամբ, ահաբեկել նրանց»,- նշեց Գալեյանը:

Ծնողներից մեկը հաստատեց Գալեյանի խոսքը՝ ասելով, որ ՔԿ նախագահը անհարգալից վերաբերմունք է ցուցաբերել ծնողների նկատմամբ։ «Այդ վիճաբանությունից հետո մենք դուրս եկանք, քանի որ պետք չէր իր հետ խոսել կամ որևէ բան քննարկել, անիմաստ էր ինչ-որ բան ասելը»,- ասաց նա։

Լրագրողների հարցին, թե օրերս Ռուբեն Վարդազարյանի և Գագիկ Ջհանգիրյանի մասնակցությամբ ձայնագրություն հրապարակվեց, արդյոք դրանից հետո Հայաստանի արդարադատական համակարգից սպասելիքներ ունեն, Գարիկ Գալեյանը նշեց՝ բնականաբար չունեն։

«Համակարգն ընդհանրապես աշխատո՞ւմ է, կամ որևէ համակարգ աշխատո՞ւմ է։ Քննչական կոմիտեն ասսում է, որ անաչառ քննություն են վարելու մեր տղաների գործով, բայց մեկ տարի յոթ ամսվա ընթացքում ոչ մի գործողություն չեն իրականացրել, մենք նույնիսկ տուժողի իրավահաջորդ չենք եղել։ Այս երկրի ցանկացած պետական համակարգում քաոս է, շունը տիրոջը չի ճանաչում», - ընդգծեց նա։

Դիտարկմանը, եթե ծնողները վստահություն չունեն ՔԿ ղեկավարի նկատմամբ, ինչպես են պատկերացնում գործի հետագա քննությունը, Գարիկ Գալեյանը խորհուրդ տվեց սպասել՝ ասելով, որ  կանխատեսումներ չի ցանկանում անել և տեղյակ չէ, թե այս պահին էլ ինչ ա կատարվում ՔԿ-ում։

«Եկեք սպասենք, եղբայրս նոր է ներս մտել ու չգիտեմ, թե ինչ է այնտեղ կատարվում։  Ժամանակը կգա և ամեն ինչ ասելու եմ, ոչ մեկ ինձ վրա չի կարող ազդել, որ վախենամ։ Ես գնում եմ Վա բանկ։ Ով հինգ հազար տղաների արյան հարցի հետ կապված կփորձի ծածկադմփոց անել, ուրմեն իրենք բոլորն էլ թուրք են»,- նշեց Գարիկ Գալեյանը։