Ձեր վստահելի աղբյուրը

Հայաստան եկած օտարերկրացիները Էրեբունի ամրոց թանգարանում պոռնոգրաֆիկ տեսանյութ են նկարահանել, տեղադրել պոռնո կայքում։

«Հայաստանում տուրիստական բարդակը մի օր լուրջ պրոբլեմներ է բերելու մեր գլխին...Էսօր պատմամշակութային օբյեկտներում պոռնո են նկարում, վաղը թշնամու հատուկ ծառայությունների առաջադրանքով առանձնապես ծանր հանցագործություններ են կատարելու (հանցագործությունների ցանկը մեծ է, չեմ թվարկում)...

Ես համոզված եմ նաև, որ այդ պոռնո-ֆիլմի հետևում էլ են թուրքերը կանգնած։
Ալո, տանը մարդ կա՞...»,- ֆեյսբուքյան էջում գրել է անվտանգության հարցերով արցախցի փորձագետ Ալեն Ղուլյանը։

Քաղաքացիները ոստիկանության ուշադրությանն են հրավիրում թանգարանի տարածքում տեղի ունեցածի վերաբերյալ։

«Էրեբունի» պատմահնագիտական արգելոց-թանգարանի տնօրեն Միքայել Բադալյանը Panorama.am-ի հետ զրույցում ասաց, որ երեկ են  տեղեկացել դրա մասին, արդեն դիմել են Երևանի քաղաքապետարան, որպեսզի իրենց վերադասը դիմի ոստիկանության համապատասխան ստորաբաժանում՝ ծառայողական քննություն իրականացնելու և պարզելու՝ երբ է  նկարահանվել։

«Կարծում եմ ոչ շուտ, քան հուլիսի 24-ը, քանի որ այդ օրվանից պեղումներ  ենք իրականացրել, իսկ այդ տեսանյութի մեջ պեղումների բացված որևէ հող չկա»,- նշեց նա։

Մ.Բադալյանի փոխանցմամբ, տարածքի պահպանության համար իրենք չեն պատասխանատու, այլ  ոստիկանության  պետական պահպանության վարչության Էրեբունու ստորաբաժանումը։

«Իհարկե, մեկ ոստիկանը չի կարող այդ ահռելի տարածքը հսկել, բայց պատասխանատվությունն այդ բաժինն է իրականացնում։ Պետք է նախաքննությամբ պարզել՝ աշխատանքային ժամի՞ն է եղել դա, թե՞ ոչ»,- ասաց թանգարան-արգելոցի տնօրենը։

Ցանկացած ոք, տոմսը գնի, կարող է մուտք գործել թանգարանի, ամրոցի տարածք մինչև 18։00-ն։

«Թանգարանը փակվում է ժամը 16։40-ին։ Այն տրամաբանությամբ, որ այցելուն կարող է թանգարանից դուրս գալ ժամը 16։40-ին, ժամանակ ենք դրել, որ մինչև 18։00 կարող է բարձրանալ ամրոց, տեսնել այն և իջնել, ամրոցը փակվում է 18։00-ին»,- նշեց Մ. Բադալյանը։ 

Ըստ նրա, այստեղ հնարավոր է խոսքը մոլագարների մասին է. «Մոլագարական երևույթ է, քանի որ այդ զույգն  անընդհատ թաքուն մտնում է մի տեղ, ու նման տեսանյութեր նկարում։ Ամեն տեղ կարող են նկարել»։

Միքայել Բադալյանը չի բացառում, որ այս տեսանյութը միտումնավոր է տարածվել. «Իրավապահ մարմինների քննությունից պարզ կադառնա։ Չի բացառվում, որ թանգարանի դեմ ուղղված արշավ լինի, ունեցել ենք նման նախադեպ, իհարկե, ոչ նման բնույթի, երբ փորձել են ցեխ շպրտել թանգարանի վրա»։

Հայաստանում պոռնկագրական նյութեր կամ առարկաներ տարածելը քրեորերն պատժելի արարքներ են.

Հայաստանի Քրեական օրենսգրքի 263-րդ հոդված. Պոռնկագրական նյութեր կամ առարկաներ, այդ թվում` տպագիր հրատարակություններ, կինոյի և տեսաֆիլմերի նյութեր, պատկերներ կամ պոռնկագրական բնույթի այլ առարկաներ տարածելը, գովազդելը, իրացնելը, ինչպես նաև այդ նպատակով պատրաստելը,

պատժվում են տուգանքով` նվազագույն աշխատավարձի երկուհարյուրապատիկից չորսհարյուրապատիկի չափով, կամ կալանքով` առավելագույնը երկու ամիս ժամկետով, կամ ազատազրկմամբ` առավելագույնը երկու տարի ժամկետով: