Ձեր վստահելի աղբյուրը

«Թուրք-ադրբեջանական ուժերը, որ Նիկոլին բերեցին իշխանության, լավ գիտեն, թե ինչպես քայքայեն ընդդիմադիր շարժումը և կիրառում են շատ պրիմիտիվ գործիքակազմ»,-«Հայելի» մամուլի ակումբում հայտնեց ՀՀԿ կուսակցության անդամ Գագիկ Մինասյանը՝ մեկնաբանելով այն խոսակցությունները, թե «Դիմադրություն» շարժման ներսում հակասություններ կան, և շատ վիրավորական համարեց, որ այդ մեթոդը տալիս է իր արդյունքները:

Նրա խոսքով՝ այդ ուժերին հաջողվում է հասարակության մեջ այն մտայնությունն տարածել, որ ընդդիմության ներսում մեծագույն հիմնահարցեր կան և դրանք են խանգարում Նիկոլ Փաշինյանի հեռացնելուն:

Մինասյանն ասաց, որ ընդդիմության շարքերում համագործակցության ուղղությամբ աշխատանքն արդյունավետ առաջ է գնում, ինչի մասին հայտարարվել է «Դիմադրության»  վերջին հանրահավաքի ժամանակ:

Ըստ բանախոսի՝ ընդդիմության հիմնական խնդիրն է աշխատանքն այլ քաղաքական ուժերի հետ, այն աշխատանքային խմբերում, որոնք պետք է ձևավորեն հետնիկոլյան Հայաստանի տեսլականը և ապահովել հասարակության լայն շերտերի աջակցությունը, ինչը կապահովի իշխանափոխությունը:

«Առանց լայն հանրային ճնշման, որևէ ձևով Նիկոլին հեռացնել հնարավոր չէ»,-հայտարարեց Գագիկ Մինասյանը:

Նա հավանական համարեց նաև իմպիչմենտի մեխանիզմի կիրառումը, որն արդեն մեկ ամիս է օրենքով հնարավոր է իրականացնել, բայց դրա համար անհրաժեշտ է պատգամավորների համապատասխան քանակ և այն ձևավորելու համար՝ հասարակական լայն զանգվածների ճնշում:

Մինասյանը հայտնեց, որ առաջիկա շաբաթվա ընթացքում ընդդիմության ձևավորած հանձնախմբերից երկուսի՝ Քաղաքականի և Սոցիալ-տնտեսական նիստերն են լինելու համապատասխանաբար երկուշաբթի և երեքշաբթի օրերին «Անի գրանդ» հյուրանոցում և ցանկացողներին հրավիրեց մասնակցել այդ նիստերին:

Ընդդիմության համատեղ աշխատանքի այդ օրինակը բանախոսը համարեց մտածող հասարակության համար ազդակ, որ չլսեն սուտ մտածածին տեսակետներ ներկայացնողներին:

«Ինչ-ինչ, բայց մենք չենք կարող երկու ճակատով կռվել: Մեր ուժերը չեն հերիքի, որ հա՛մ Նիկոլի դեմ պայքարենք, հա՛մ սուտ տարածողների դեմ, որոնք ցանկանում են ներսից տրոհել ընդդիմությանը»,-հայտարարեց ՀՀԿ պատգամավորը:

Գագիկ Մինասյանը նաև  հերքեց այն տեսակետը, որ ՀՀԿ փոխնախագահ Արմեն Աշոտյանն վերջին իր ելույթում քննադատել է «Հայաստան» դաշինքին՝ հավաստիացնելով, որ Աշոտյանի հետ պարբերաբար քննարկումներ է ունենում և վերջինս կատեգորիկ դեմ է  նման մոտեցումներին:

Նա նաև հիշեցրեց, որ համագումարի ժամանակ ՀՀԿ-ն հայտնել էր ամբիցիաներ չունենալու մասին:

«Մեր իրավիճակն այնքան լավ չէ, որ մենք մեզ թույլ տանք շռայլություն և մարդիկ, որոնք ջուր են լցնում Նիկոլի ջրաղացին, պետք է պիտակավորվեն, նրանք նիկոլական են՝ անկախ նրանից, թե այն հասկանում են, թե ոչ»,-ասաց ՀՀԿ անդամը՝ հավելելով, որ ՀՅԴ-ում շատ ընկերներ ունի, որոնցից ներքին հակասության մասին բան չի լսել և նման բան չի էլ կարող լինել: