Ձեր վստահելի աղբյուրը

«Մենք պետք է գիտակցնեք, որ ապրում ենք աննախադեպ ժամանակաշրջան»,-«Գործող աշխարհակարգի փլուզումը. առկա վտանգները մեր տարածաշրջանի համար» թեմայով քննարկմանն ասաց Սթենֆորդի համալսարանի քաղաքագիտության դոկտոր Արթուր Խաչիկյանը։

Նրա գնահատմամբ, վտանգավոր իրադրություն է, մեծ պատերազմի վտանգ կա։

«Արդեն որոշ սպառնալիքներ կա ՌԴ կողմից, որ օգտագործվել է միջուկային զենք, ի պատասխան դրան որոշ հայտարարություններ եղան Արևմուտքից, որ ՆԱՏՕ-ն կարող է միջուկային զենք օգտագործել Սև ծովի ռեգիոնում և Ղրիմի մոտակայքում, սարսափելի վտանգավոր հայտարարություններ են։ Մի քանի օր առաջ Արևմուտքում խոսակցություններ սկսվեցին, որ ՌԴ-ն  կարող է օգտագործել «Պոսեյդոն» միջուկային ծովային դրոններ ու ցունամի առաջացնել։

Այսինքն, աննախադեպ վիճակ է։ Անգամ 1962 թվականին Կարիբյան ճգնաժամի ժամանակ բացեիբաց սպառնալիքներ չկային։ Այն ժամանակ  շատ ավելի լուրջ, խորամիտ ղեկավարներ էին։ Իմ կարծիքով, մեր  ժամանակի անեծքն այն է, որ ոչ կոմպետենտ, ծայրահեղ, կիսակրթված մարդիկ են ղեկավարում այս աշխարհը»,- ասաց քաղաքագետը։

Ըստ Արթուր Խաչիկյանի, կարող է լինել այնպիսի իրադրություն, որ  եթե անգամ ՌԴ-ն, ՆԱՏՕ-ն դա չեն ցանկանում, բայց ստիպված սկսեն միջուկային պատերազմ, հատկապես  որ նման հայտարարություններ են եղել։

«ԱՄՆ-ն հայտարարել է՝ ոչ մի դեպքում չի ճանաչելու Ղրիմը, մյուս շրջանները ՌԴ կազմում, իսկ ՌԴ-ն պաշտոնապես դրանք ընդունել է  որպես իր տարածք։  Սա նշանակում է, որ հակամարտությունը կարող է տասնյակ տարիներով շարունակվել։ Չի կարող վաղը Պուտինը որոշի դուրս հանել ՌԴ կազմից այդ շրջանները։ Սա նոր սառը պատերազմ չէ։ ԱՄՆ-ն, ցավոք սրտի, վերցրել է այն քաղաքականությունը, որ ՌԴ-ին պետք է ուժասպառ անեն։ Այդ ղեկավարները չեն հասկանում, թե ինչի կարող է դա բերել»,- ասաց քաղաքագիտության դոկտորը։

Արթուր Խաչիկյանի խոսքով, սարսափելի սխալ գործեցին այն մարդիկ, ովքեր քանդեցին ընդհանուր անվտանգության համակարգի գաղափարը, ընդհանուր եվրոպական համակարգի գաղափարը, սկսեցին միակողմանի ձևով ուժ  օգտագործել Սերբիայում, նաև ՆԱՏՕ-ի միակողմանի ընդլայնումը։

«Ես անձամբ  ծանոթ եմ այն մարդկանց, ովքեր նման որոշուներ են կատարել։ Ես այն ժամանակ էլ, հիմա էլ ասում եմ՝ դա սարսափելի սխալ էր, հիմա տեսնում ենք դրա հետևանքները։ Ցավոք սրտի, նրանք ռեալ պոլիտիկ մտածողություն չունեին, մտածում էին  որպես ծայրահեղ լիբերալներ։

Համաձայն եմ այն ամերիկացի վերլուծաբանների, պրոֆեսորների հետ, որոնք երկար ժամանակ բացատրում են, որ այս էսկալյացիայի պատճառն այն է, որ Ռուսաստանին ստիպեցին այսպիսի ռեակցիա տալ, այսպես պատասխանել ՆԱՏՕ-ի անընդհատ ընդլայնմանը»,- ասաց Ա. Խաչիկյանը։