ԱԺ 14 պատգամավորներ անձնական երաշխավորություն են ներկայացրել Գերասիմ Վարդանյանի համար
Երևան քաղաքի դատարանի «Կենտրոն» նստավայրում, դատավոր Կարեն Ֆարխոյանի նախագահությամբ, շարունակվում է ՀՅԴ անդամ Գերասիմ Վարդանյանի գործով դատական քննությունը։ Նիստին քննվում է Գերասիմ Վարդանյանի խափանման միջոցի հարցը։
«Գերասիմ Վարդանյանի նկատմամբ իրականացվում է բացահայտ քաղաքական հետապնդում, և նա քաղաքական բանտարկյալ է»,- հայտարարեց պաշտպան Բենիկ Գալստյանը։
Նրա խոսքով, Գ Վարդանյանն ընդդիմադիր քաղաքական գործիչ է, հանդիսանում է ՀՀ անկյունաքարային ընդդիմադիր կուսակցություններից մեկի՝ ՀՅԴ և ԱԺ ընդդիմադիր «Հայաստան» խմբակցության անդամ, որոնք կտրականապես դեմ են արտահայտվում ներկայիս քաղաքական իշխանության գործելաոճին, ներքին, արտաքին քաղաքականությանը։
«Հատկանշական է, որ Գերասիմ Վարդանյանը ԱԱԾ քննչական դեպարտամենտ բերման է ենթարկվել, խոսքը վերաբերում է մայիսին 2-ին, և արգելանքի է վերցվել վերը նշված դիրքորոշման հետ կապված բողոքի ակցիայի իրականացման վայրից։ Վերոգրյալ պայմաններում առավել քան վստահ եմ, որ Վարդանյանը հանդիսանում է քաղաքական բանտարկյալ և ենթարկվում է քաղաքական հետապնդման»,- ասաց պաշտպանը։
Ըստ Բ.Գալստյանի, երկարատև կալանավորման պայմաններում պետք է համոզիչ կերպով ներկայացվեն այնպիսի փաստական տվյալներ, որոնք հիմնավորեն դատարանի կողմից արված հետևությունն առ այն, որ Գ.Վարդանյանը, գտնվելով ազատության մեջ, կարող է կատարել որևէ հանցանք, մինչդեռ քննարկվող դեպքում այդպիսի փաստական տվյալներ առկա չեն։
Նրա ներկայացմամբ, Գերասիմ Վարդանյանի նկատմամբ քրեական հետապնդում սկսվել է դեռևս 2020 թվականի նոյեմբերից, կալանավորվել է 2022 թ. մայիսին, մինչ այդ նախաքննական մարմինը մի քանի անգամ դիմել է դատարան կալանավորման միջնորդություններով, որոնք մերժվել են, մի դեպքում էլ նախաքննական մարմինը որոշում է կիրառել Վարդանյանի նկատմամբ գրավ՝ 60 միլիոն դրամի չափով։
«Բնականաբար, հնարավորություն չի ունենում վճարել գրավը, ինչից հետո նախաքննական մարմինը դիմում է դատարան կալանավորելու միջնորդությամբ՝ այս անգամ պատճառաբանություն բերելով գրավը չվճարելու հանգամանքը։ Յուրաքանչյուր պրակտիկ իրավաբան կհամաձայնվի ինձ հետ, որ նման դեպք ժամանակակակից հայ իրավաբանության մեջ ուղղակի տեղի չի ունեցել, սա առանձնահատուկ դեպք է, բոլորիս համար պարզ է Գերասիմ Վարդանյանի կալանավորման պատճառները։
Այդ իսկ պատճառով, թեկուզ եթե դատարանը գտնում է, որ այս պայմաններում առկա են որոշակի վտանգներ Գերասիմ Վարդանյանի կողմից ազատության մեջ գտնվելու պայմաններում ոչ պատշաճ վարքագիծ դրսևորելու հետ կապված, պաշտպանական կողմից առաջարկված այլընտրանքային խափանման միջոցները կարող են ամբողջովին չեզոքացնել այդ վտանգը։ Խոսքը վերաբերում է մի շարք հեղինակավոր անձանց երաշխավորություններին. Ազգային ժողովի 14 պատգամավոր դատարան ներկայացրել է համապատասխան դիմում։
Եթե դատարանը գտնի, որ նշված երաշխավորությունները բավարար չեն անձի պատշաճ վարքագիծն ապահովելու համար, պաշտպանական կողմը միջնորդում է Գերասիմ Վարդանյանի նկատմամբ կիրառել այլընտրանքային խափանման միջոց մինչև 10 միլիոնի սահմաններում»,- ասաց Բ.Գալստյանը։
Հիշեցնենք, որ Գերասիմ Վարդանյանը մեղադրվում է 2020 թ. նոյեմբերի 9-ին տեղի ունեցած իրադարձությունների առթիվ հարուցված քրեական գործի շրջանակներում` զանգվածային անկարգություններ կազմակերպելու և լրագրողի աշխատանքը խոչընդոտելու մեջ։ Նա կալանավորված է 2022թ. մայիսի 12-ից։
Հարակից հրապարակումներ`
- Լիահույս եմ` այս անգամ դատավոր Ֆարխոյանը կկարողանա հաղթահարել իր նկատմամբ առկա ճնշումները և ազատ արձակել Գերասին. Փաստաբան
- Փաստաբան. Արդեն 100 օր է, ինչ Գերասիմ Վարդանյանը անազատության մեջ է
- Գերասիմ Վարդանյանին գրավի դիմաց ազատ արձակելու միջնորդությունը մերժվել է
- Գերասիմ Վարդանյանի գործով դատական քննությունը տեղի կունենա օգոստոսի 2-ին
- Լինեմ բանտում, թե ազատության մեջ պայքարելում եմ հանուն մեր պետության, պետականության, արժանապատվության համար․ Գերասիմ Վարդանյան
- «Վզին դրած» արդարադատություն, ապօրինություններ ու խտրական մոտեցում․Գերասիմ Վարդանյանի պաշտպան
- Գերասիմ Վարդանյանի գործով դատական առաջին նիստը հետաձգվեց