Ձեր վստահելի աղբյուրը

«Միայն նիկոլի թվին և ժողովրդավարության աննախադեպ պայմաններում է հնարավոր նման բան՝ փաստացի 9 % ստացած քաղաքական ուժը կարողացավ քաղաքապետ ընտրել»,-«Հայելի» մամուլի ակումբում հայտարարեց  քաղաքագետ Սուրեն Սուրենյանցը՝ անդրադառնալով Տիգրան Ավինյանի՝ քաղաքապետ ընտրվելու փաստին:

Նրա խոսքով՝ օրենքի սողանցքից օգտվելով՝ ՔՊ-ն 32 ձայնով ստացավ քաղաքապետի պաշտոնը:

Սուրենյանցը հայտնեց, որ գործ ունեն ամբողջովին դելիգիտիմացված քաղաքային իշխանությունների հետ, երբ ձևավորման պահից լեգիտիմության կորուստ ունեցող քաղաքային իշխանություն կա:

Քաղաքագետի կարծիքով՝ այս իրավիճակի պատասխանատվությունը մնում է երկու ուժի վրա՝ «Հանրային ձայնք» կուսակցության, որը մասնակցեց նիստին, քանի որ եթե չէր մասնակցում կրկնակի ընտրություններ էին տեղի ունենում, և «Հանրապետություն» կուսակցության:

Հասարակությունը գնում մերժում է ՔՊ-ին և «Մեր դեմ խաղ չկայի» սկզբունքով  ՔՊ-ն կարգում է Երևանի քաղաքապետ

«Իսկ ՔՊ-ի և «Հանրապետություն» խմբակցությունների համագործակցության հուշագրի միջոցով վերացավ այն ձևական տարբերությունը, որը կար նրանց միջև ընտրարշավի ժամանակ՝ «Հանրապետության» կուսակցության կողմից կոշտ հռետորաբանության ձևով»,-հայտարարեց Սուրենյանցը և շարունակեց. «Հասարակությունն այս պահին իրեն տոտալ խաբված է զգում, որովհետև նա չէր գնացել ընտրության՝ մերժելով ՔՊ-ին, ինքը չէր ընտրել ՔՊ՝ մերժելով ՔՊ-ին, հասրակությունը ձայն էր տվել մնացած երեք կուսակցությանը և «Մայր Հայաստան» դաշինքին՝ էլի մերժելով ՔՊ-ին: Արդյունքում՝ հասարակությունը գնում մերժում է ՔՊ-ին, բայց «Մեր դեմ խաղ չկայի» սկզբունքով  ՔՊ-ն կարգում է Երևանի քաղաքապետ: Կարծում եմ սա լրացուցիչ ազդակ է հասարակության կոնսոլիդացիայի համար»:

Նա կարծիք հայտնեց, որ ընտրություններով հնարավոր չէ իշխանություն փոխել, քանի որ նույնիսկ երբ ՔՊ-ն չի հաղթում, մանիպուլյացիաներով իշխանություն են վերցնում:

Կրկնելով, որ Երևանում ՔՊ-ն ստացել է 9 % ձայն՝ Սուրենյանցն ասաց. «Հիմա Ավինյանին կարելի է ասել «Փաշինյանի 9-ոց»՝  6-նոցի իմաստով 9-ոց»:

Այն ինչ Գրանադայում հայտարարեցին միջնորդ պետությունները, մի քանի օր հետո Ալիևի, Էրդողանի ներկայացուցիչները և ՌԴ պաշտոնկյաները ջրեցին

Սուրենյանցն անդրադարձավ նաև Գրանադայի հանդիպման արդյունքներին:

«Գրանադայի հայտարարությունը կարող էր մի պարագայում արդարացված լինել երբ դրան չի մասնակցում Ադրբեջանը, եթե ստորագրող մյուս երեք կողմերը Հայաստանին երաշխիքներ տային, բայց Հայաստանը ստացել է 0 երաշխիք»,- նկատեց քաղաքագետը:

Նա ասաց, որ այն, ինչ Գրանադայում հայտարարեցին միջնորդ պետությունները, մի քանի օր հետո Ալիևի, Էրդողանի ներկայացուցիչները և ՌԴ պաշտոնկյաները չեղարկել են:

Սուրենյացնն անդրադառնալով Փաշինյանի աշխատակազմի ղեկավար Արայիկ Հարությունյանի հաղթանակների մասին գրառմանը՝ ասաց, որ հանդիպումից մեկ օր անց Ալիևը Շարլ Միշելի առաջ է դնում 8 գյուղերի վերադարձի խնդիրը, իսկ Էրդողանն էլ հայտարարում է, որ Հայաստանի հետ հարաբերությունները կկարգավորեն, եթե «զանգեզուրի միջանցքի» հարցը լուծվի՝հիշեցնելով, որ նույն Արայիկ Հարությունյանը հայտարարում էր, թե միջանցքի և անկլավների հարցերը փակ են:

Բանախոսն ասաց, որ Հայաստանը պետք է իր խնդիրների լուծումը գտնի տարածաշրջանում, այլ ոչ թե եվրոպաներում, քանի որ միջազգային ոչ մի երաշխիք և մեխանիզմ չի գործում: