Ձեր վստահելի աղբյուրը

Բնածին արատները, որպես կանոն, վիրուսային ինֆեկցիաների հետևանք են, այնպիսին, ինչպիսիք են ցիտոմեգալովիրուսը և հերպեսը: Այս մասին այսօր լրագրողների հետ հանդիպման ժամանակ ասաց գինեկոլոգ Գեորգի Պողոսյանը:

Նրա խոսքերով՝ ցիտոմեգալովիրուսը, կարող է հանգեցնել նորածնի մոտ ծայրանդամների բացակայություն, մեծ կամ փոքր գլխի, ողնաշարի ճողվածքի, նապաստակի շուրթի և այլն:

Անդրադառնալով հերպեսին, նշեց, որ այն հաճախ բերում է վիժումների՝ մինչև 14 շաբաթական ժամկետը, կամ պտղի մահի՝ մոր արգանդում:

«Շատ դեպքերում հերպեսի հետևանքով ծնվում են խուլ, համր, կույր կամ Դաունի սինդրոմով երեխաներ: Ընդ որում, վիրուսները «արթնանում» են դիմադրողականության անկման հետևանքով, երբ աղջիկներն ու կանայք մինչև հղիանալը հետևում են տարբեր դիետաների, ինչի արդյունքում էլ ընկնում է կնոջ դիմադրողկանությանը»,- ընդգծեց Գ.Պողոսյանը՝ հավելելով, որ առողջ երեխաներ ծնվում են առողջ մայրերից:

Գինեկոլոգի խոսքերով՝ պետք է ձևավորել այնպիսի մշակույթ, որը զույգերը մինչ ամուսնանալը անցնեն բժշկական հետազոտություն, որպեսզի հետագայում նվազեցնեն բնածին արատներով երեխա ունենալու ռիսկը:

«Այդքան ճոխ հարսանիքներն են անում, թող այդ գումարից մի փոքր մաս էլ տրամադրեն հետազոտմանը»,- ասաց Գ.Պողոսյանը:

Անդրադառնալով վերջին դեպքին, երբ «Մալաթիա» ծննդատանը առանց երկու ձեռքի և մեկ ոտնաթաթի երեխա էր լույս աշխարհ եկել, Գ. Պողոսյանն ասաց, որ ուլտրաձայնային հետազոտություն անցկացնող բժշկին չպետք է դատապարտել:

«Բժիշկներին միանգամից մեղադրելը, սենսացիաների գնալը հեշտ է: Դիագնոստիկ սխալներ միշտ էլ կարող են լինել»,- նշեց նա՝ հավելելով, որ առավել ծանր դեպք է, երբ ժամանակին չի հայտնաբերում երեխայի՝ մոր արգանդում մահացած լինելու հանգամանքը: Այդ դեպքում գինեկոլոգը գտնում է, որ կարելի է բժշկին մեղադրել:

Լրագրողներից մեկի հարցին՝ եթե ինքն առանց վերջույթների կամ բնածին այլ արատներով երեխա ունենար, ապա ինչպես կվարվեր, Գ.Պողոսյանը խոստովանեց, որ մանկատուն կհանձներ:

«Նման երեխաները միշտ էլ բազմաթիվ խնդիրներ են ունենում: Եթե նա ունի արտաքին արատ, կունենա նաև ներքին արատ: Արատները կարճացնում են երեխայի կյանքը: Ընտանիքում նման երեխային պահելը քայքայում է ընտանիքը, իսկ ծնողներին դարձնում է դժբախտ: Ծնողների համար մեծ ցավ է, երբ այդքան դժվարությամբ պահելուց հետո տեսնեն երեխայի մահը»,- ասաց Գ.Պողոսյանը:

Նշենք, որ ՀՀ ԱՆ առողջապահության ազգային ինստիտուտի տվյալներով՝ 2013թ.-ին մեր երկրում ծնվել է ֆիզիկական խնդիրներ ունեցող 768 երեխա, որը 2012 թվականի համեմատ 21-ով ավելի է, իսկ 2011թ.-ի համեմատ՝ 49-ով: