Ձեր վստահելի աղբյուրը

Անմոռուկը հասավ իր նպատակին այն առումով, որ ապրիլի 22-24-ին Հայոց ցեղասպանության 100-րդ տարելիցի հիշատակի միջոցառումներն ուղիղ եթերում հնարավորություն է ունեցել դիտել մեկ միլիարդ երեք հարյուր միլիոն մարդ: «Հիշում եմ և պահանջում» փորձագիտական համաժողովի նիստից առաջ լրագրողների հետ զրույցում ասաց ՀՀ նախագահի աշխատակազմի ղեկավար, Հայոց ցեղասպանության 100-րդ տարելիցի միջոցառումների համակարգող Վիգեն Սարգսյանը:

«Հսկայական թիվ է, բայց հաշվի առնելով, որ բոլոր միջազգային ալիքները հեռարձակում էին ուղիղ եթերով, հնարավորություն տվեց շատ լայն զանգվածի ծանոթանալ մեր միջոցառումների բովանդակությանը, ստանալու այն ազդակները, որոնք մենք ուզում էինք փոխանցել աշխարհին»,- ասաց նա:

Պատասխանելով հարցին, թե այդ միջոցառումներն ի՞նչ փոխեցին Թուրքիայում, Վ. Սարգսյանն ասաց. «Համահայկական հռչակագրում կա հստակ հղում Թուրքիայի քաղաքացիական հասարականության այն զանգվածին, որ այսօր արդեն պատրաստ է առերեսվել իր պատմությանը, նորովի ընկալել, ընդունել իրականությունը, որից մեզ բաժանում է այս մեկ դարը: Եղել եմ այն համոզման, որ ճանաչման պայքարի գործում առանձնահատուկ նշանակություն ունի քաղաքացիական հասարակությունների դերը: Վստահ եմ, որ Թուրքիայի կողմից Հայոց ցեղասպանության ճանաչումը ուղղակիորեն պայմանավորված է լինելու այդ երկրում քաղհասարակության կայացմամբ և առաջընթացով»:

Միաժամանակ նա նշեց, որ Հայոց ցեղասպանության 100-րդ տարելիցի միջոցառումների համատեքստում տեղի ունեցած ամենագլխավոր փոփոխությունը մեր ինքնընկալման և մեր անցած ճանապարհի վերագնահատման փոփոխությունն էր:

Վ. Սարգսյանի խոսքով, միջոցառումները հանգեցրեցին նրան, որ Հայաստանի և Սփյուռքի միջև ձևավորվեց փոխգործակցության բացարձակ նոր մոդել:

«Հայոց ցեղասպանության 100-րդ տարելիցի միջոցառումների հաջողություններն ապացուցել են փոխգործակցության հսկայական, բացառիկ ուժը, որն ունի ազգային խնդիրներին պետական միջոցներով տեր կանգնելու այս մոտեցումը»,- ասաց 100-րդ տարելիցի միջոցառումները համակարգող Վիգեն Սարգսյանը:

Ըստ նրա, մի շարք կարևոր ձեռքբերումներ, որ միջոցառումների տարվա ծրագիրը տվել է, դա միջազգային հանրության, հատկապես մասնագիտացված կառույցները, միջազգային կազմակերպությունները, մարդու իրավունքներով զբաղվող միջազգային հասարակական կազմակերպությունները բոլորը միաձայն ընդունել և հենց իրենք հնչեցրել են Հայաստանի պարտավորությունը առաջնորդելու միջազգային պայքարը ցեղասպանության հանցագործության դեմ:

«Մենք դա լսեցինք «Ընդդեմ ցեղասպանության» գլոբալ ֆորումի նիստերի ժամանակ, Ցեղասպանագետների միջազգային ընկերակցության համաժողովի ընթացքում: Կարծում եմ, որ Հայոց ցեղասպանության միջոցառումները համակարգող պետական հանձնաժողովի վաղվա նիստում որոշում կընդունվի «Ընդդեմ ցեղասպանության» գլոբալ ֆորումը երկու տարին մեկ կանցկացվի Երևանում՝ նվիրվելով ցեղասպանության խնդիրներին առնչվող ամենատարբեր խնդիրներին կամ արդի փուլում տեղի ունեցող ցեղասպանություններին»,-ասաց Վիգեն Սարգսյանը:

Խոսելով իրավական թղթածրարի մասին, ՀՀ նախագահի աշխատակազմի ղեկավարն ասաց, որ այս գործընթացի բաղկացուցիչ մասն է կազմում իրավական բաղադրիչը. «Սահմանադրական դատարանի նախագահ Գագիկ Հարությունյանի գլխավորությամբ ստեղծվել է հանձնախումբ, որը զբաղված է ցեղասպանության հետևանքների վերացմանն ուղղված իրավական թղթածրարի մշակմամբ: Վաղը Հայոց ցեղասպանության միջոցառումները համակարգող պետական հանձնաժողովի նիստին զեկուցվելու է գործընթացի ընթացքի մասին: Արդեն կան առաջին իրավական հայցերը: Այս գործընթացը շարունակվելու է, քանի որ մարդիկ սկսում են գնահատել նորովի այն ժառանգությունը, փաստաթղթերը, ապացույցները, որ ունեն»: