Չեմ կարող օր կամ ժամ ասել, թե երբ ռուսական կողմը կտրամադրի սպառազինությունը. Պատգամավոր
Հայաստանին սպառազինություն տրամադրելու մասին վարկային համաձայնագիրը Ռուսաստանը վավերացրել է փետրվարին և զենքի տրամադրման գործողություններն իրականացվում են համաձայնագրի շրջանակներում: Այդ մասին այսօր ճեպազրույցում հայտարարեց ԱԺ Պաշտպանության, ազգային անվտանգության և ներքին գործերի մշտական հանձնաժողովի նախագահ Կորյուն Նահապետյանը:
«ՀՀ Պաշտպանության նախարարության, Զինված ուժերի գլխավոր շտաբի պատասխանատուները ռուսական կողմի հետ ձեռք բերված պայմանավորվածության հիման վրա ռուսական կողմի հետ ակտիվ աշխատանքներ են իրականացնում», -հայտարարեց պատգամավորը:
Այդուհանդերձ, ինչո՞ւ այդպես էլ տեղ չի հասնում ռուսական սպառազինությունը, կա՞ն կոնկրետ ժամկետներ համաձայնագրով, որ դրա շրջանակներում իրականացվի մատակարարումը լրագրողի հարցին, Նահապետյանը պատասխանեց.
«Համաձայնագրով կոնկրետ որոշակի ժամկետներ նշվում են, և գործընթացն իրականացվում է հենց այդ ժամկետների շրջանակում: Ես հիմա չեմ կարող օր կամ ժամ ասել, թե երբ ռուսական կողմը կտրամադրի: Ուղղակի պետք է վստահ լինել, որ համաձայնագրով նախատեսված պարտավորությունները երկու կողմերը կիրականացնեն սահմանված ժամկետներում»:
Հիշեցնենք՝ դեռ 2015 թվականի հունիսի 26-ին Երևանում ստորագրվել էր «ՀՀ կառավարությանը պետական արտահանման վարկ տրամադրելու մասին» հայ-ռուսական համաձայնագիր, որով Հայաստանը պետք է Ռուսաստանից 200 միլիոն ԱՄՆ դոլարի զենք ու ռազմական նշանակության գույք գներ՝ դրա գումարը վճարելով 10 տարիների ընթացքում: Համաձայնագիրը Հայաստանի Ազգային ժողովում վավերացվել էր դեռևս նախորդ տարվա հուլիսի 2-ին՝ 98 կողմ (1 դեմ, 0 ձեռնպահ) ձայներով:
Վարկային համաձայնագիրը, ինչպես ավելի վաղ տեղեկացրել էին ռուսական աղբյուրները, նախատեսում է, որ Հայաստանը Ռուսաստանից կգնի «Смерч» համազարկային կրակի ռեակտիվ համակարգեր եւ ռազմամթերք, «Игла-С» զենիթային հրթիռային համակարգեր և դրա հրթիռներ, «Автобаза-М» ռադիոտեխնիկական հետախուզության ցամաքային համակարգեր, «ТОС-1А» ծանր կրականետ համակարգեր` «ТЗМ-Т» տրանսպորտային լիցքավորող մեքենաներով, «9М113М» հրթիռներ, «РПГ-26» ականանետեր, «B-429Е» պայթուցիչներ, «СВД» դիպուկահարի հրացաններ, զրահատանկային տեխնիկա, «Тигр» զրահապատ մեքենաներ, ինժեներական եւ կապի միջոցներ:
Հարակից հրապարակումներ`
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին