Ձեր վստահելի աղբյուրը

«ՀՀ տրանսպորտի, կապի և տեղեկատվական տեխնոլոգիաների նախարարության միջպետական կանոնավոր ուղևորափոխադրումների երթուղային ցանցում Երևան-Օրենբուրգ երթուղի ներառված չէ»: Panorama.am-ի գրավոր հարցման ի պատասպան հայտնեց տրանսպորտի, կապի և տեղեկատվական տեխնոլոգիաների նախարարություն աշխատակազմի ղեկավար Սամվել Ամիրխանյանը:

Հիշեցնենք, օրեր առաջ Երևան-Օրենբուրգ չվերթի ավտոբուսը ճանապարհին փչացել է, ուղևորները մնացել էին կես ճնապարհին: Վերանորոգման  ընթացքում մասնագետները նշել էին, որ  նման մեքենայով ուղևորների փոխադրում ուղղակի չէր կարելի: Քանի որ երկար ժամանակ չեն կարողացել ավտոբուսը կարգի բերել, 60 ուղևորներն ինքնուրույն են շարունակել ճանապարհը:

Քանի որ ուղևորներին փաստացի տեղ չէր հասցրել ուղևորափոխադրում իրականացնողը, հնարավո՞ր է ոլորտի պատասխանատու հանդիսացող մարմինը միջամտի, քաղաքացիների տոմսերի գումարը վերադարձնելու  համար:

«Տվյալ ուղղությամբ փոխադրում իրականացրած կազմակերպության վերաբերյալ նախարարությունը տեղեկատվություն չունի: Համապատասխանաբար քաղաքացիների գումարները վերադարձնելու գործընթացն էլ նախարարության իրավասությունից դուրս է»,-նշել է նախարարության պաշտոնյան:

Այս տարվա ընթացքում Հայաստանից դեպի Ռուսաստանի տարբեր քաղաքներ ուղևորափոխադրում իրականացնող ավտոբուսներ վթարի ենթարկվեցին, նախարարությունից շտապեցին հայտարարել, դրանք պատկանում են ոչ կանոնավոր ուղևորափոխադրում իրականացնող ընկերություններին, կամ էլ վթարված ավտոբուսը ներգրավված չի եղել մրցույթին ներկայացված տրասնպորտային միջոցների ցանկում։ Նման դեպքերը կանխելու, նվազեցնելու համար ի՞նչ քայլեր է ձեռնարկում նախարարությունը:

Ս. Ամիրխանյանի խոսքով, միջպետական կանոնավոր ուղևորափոխադրումները կանոնակարգելու նպատակով 2016 թ. դեկտեմբերին ընդունվել են ՀՀ տրանսպորտի, կապի և տեղեկատվական տեխնոլոգիաների նախարարության կողմից մշակված «Ավտոմոբիլային տրանսպորտի մասին» օրենքում փոփոխություններ և լրացումներ կատարելու մասին, «Վարչական իրավախախտումների վերաբերյալ» ՀՀ օրենսգրքում փոփոխություններ և լրացումներ կատարելու մասին, «Պետական տուրքի մասին» ՀՀ օրենքում լրացումներ կատարելու մասին ՀՀ օրենքները, որոնց պահանջներին համապատասխան՝ հստակեցվել են ոչ կանոնավոր ուղևորափոխադրումների իրականացման  պայմաններն ու պահանջները:

«Դրանք չկատարելու դեպքում խստացվել է վարչական պատասխանատվությունը: Միաժամանակ տեղեկացնում եմ, որ 2017 թ. հունվարին ՀՀ տրանսպորտի, կապի և տեղեկատվական տեխնոլոգիաների նախարարության կողմից դեպի ՌԴ ձևավորվել են 10 միջպետական երթուղիներ, որոնք սպասարկող կազմակերպություններն ընտրվել են ՀՀ Կառավարության N1587–Ն որոշման («Հայաստանի Հանրապետության տարածքից ավտոմոբիլային տրանսպորտով ուղևորների ուղեբեռների միջպետական փոխադրումների իրականացման կարգ») պահանջներին համապատասխան, իսկ փոխադրումներում ներգրավված տրանսպորտային միջոցները լիարժեք բավարարում են տեխնիկական և սպասարկման որակի միջազգային պահանջներին: Անվտանգության պահանջներից ելնելով՝ դրանք սպասարկվում են մեկից ավելի վարորդներով»,-նշել է աշխատակազմի ղեկավարը:

Հիշեցնենք, որ միջպետական ոչ կանոնավոր ուղևորափոխադրումներն արգելվում են: Կանոնավոր ուղևորափոխադրումներ կարող են իրականացնել նախարարության կողմից հայտարաված մրցույթում հաղթող ընկերությունները:

Ավելի վաղ նախարարությունից հայտնել էին, որ դեպի Ռուսաստան միջազգային ուղևորափոխադրումներն այսուհետ կիրականցվեն բացառապես ավտոկայարաններից: Դեպի Ռուսաստանի Դաշնություն կանոնավոր նոր երթուղիների կազմակերպման համար հայտարարված մրցույթում  ընտրվել են լավագույն 11 ընկերությունները, որոնք ներկայացրել են մեծ տեղատարողությամբ, հարմարավետ և ուղևորափոխադրման չափանիշներին համապատասխանող ավտոբուսներ և փորձառու վարորդներ:

«Կոչ ենք անում ուղետոմսեր գնել միայն ավտոկայարաններից ու օգտվել  կանոնավոր ուղևորափոխադրողների ծառայություններից, քանի որ այդ փոխադրումները որակապես շա՛տ ավելի բարձր են և, որ ամենակարևորն է, անվտանգ»,- խորհուրդ էին տվել  նախարարությունից: