«Ընկերուհի, լսի…». Ավագանու ԲՀԿ-ական անդամը հերքում է Նոր Նորքի ոստիկանապետին
Երևանի ավագանու անդամ, «Բարգավաճ Հայաստանը» ներկայացնող Արտակ Ավետիսյանը հերքում է Նոր Նորքի ոստիկանապետ Մուշեղ Օհանյանի հայտարարությունը, թե նրա որդիները Նոր Նորքում տեղի ունեցած հանցագործությանը մասնակից են:
«Իմ երեխաները մասնակից չեն եղել, հանցագործություն չեն արել», -Panorama.am-ի թղթակցի հետ հեռախոսազրույցում ասաց «Բարգավաճ Հայաստանի» անդամը: Երբ մենք հետաքրքրվեցինք, թե փաստորեն Մուշեղ Օհանյանը ճիշտ չի ասում, երբ խոսում է նախաքննության ընթացքից, Ավետիսյանն արձագանքեց. «Ընկերուհի լսի, ես իրավունք ունեմ չպատասխանելու: Ես ղեկի վրա եմ, շարժվում եմ չեմ կարող խոսել»: Ու խոսափողը կախեց:
Panorama.am-ը, վկայակոչելով Նոր Նորքի ոստիկանապետ Մուշեղ Օհանյանին, ավելի վաղ տեղեկացրել էր, որ Նոր Նորքի 4-րդ զանգվածում 24-ամյա Դավիթ Օհանյանի սպանության գործով մեղավորների շրջանակը հայտնի է. նրանց մեջ են մտնում նաև Երևանի ավագանու անդամ, «Բարգավաճ Հայաստան» խմբակցության ներկայացուցիչ Արտակ Ավետիսյանի որդիները: Օհանյանը փոխանցել էր, որ այսօրվա դրությամբ բացի Վարաժ Մանուկյանից, որը կասկածվում էր Օհանյանի սպանության մեջ, դեռևս այլ ձերբակալված չկա:
«Ենթադրվում է, որ բոլորը, ովքեր մասնակցել են խուլիգանությանը, ձերբակալվելու են», -մեզ հետ զրույցում ասել էր Մուշեղ Օհանյանը: Հարցին, թե դրանք քանիսը կարող են լինել, ոստիկանապետը պատասխանեց, որ հանցագործների թիվը հնարավոր է հասնի շուրջ տասնյակի ու նրանց նկատմամբ քրեական գործեր կհարուցվեն: «Պարտադիր: Արդեն հանցագործների շրջանակը ամբողջությամբ հայտնի է», -հավելել էր Օհանյանը:
Հետաքրքրվել էինք նաև, թե արդյո՞ք, հանցագործների կազմում են նաև Երևանի ավագանու անդամ Արտակ Ավետիսյանի որդիները, Օհանյանը պատասխանեց. «Այո, հաստատ ասում եմ, նրանք մտնում են հանցագործների շրջանակի մեջ: Նրանց նկատմամբ քրեական գործ կհարուցվի, որովհետև խուլիգանության մասնակից են»:
Հիշեցնենք, որ այս թաղամասում սեպտեմբերի 20-ին, ըստ պաշտոնական հաղորդագրության, մի խումբ երիտասարդների միջև տեղի ունեցած վիճաբանության արդյունքում 24-ամյա Դավիթ Օհանյանն էր սպանվել, իսկ Հակոբ Բուդաղյանը դանակի հարվածի հետևանքով կրծքավանդակի շրջանում ստացած վնասվածքներով տեղափոխվել էր հիվանդանոց: Ոստիկանության լրատվական ծառայությունից հայտնել էին, որ կատարվածի առնչությամբ հարուցվել է քրեական գործ` Քր. Օր.-ի 34 (հանցափորձ)-104 հոդվածի 2-րդ մասի 1-ին կետի «երկու կամ ավելի անձնաց սպանությունը» հատկանիշներով: Հանցագործությունը կատարելու կասկածանքով ձերբակալվել է 1987 թվականին ծնված Վարաժ Մանուկյանը, 2005 թվականի քիք-բոքսինգի Եվրոպայի առաջնությունում դարձել է ոսկե մեդալակիր, 2006 թվականին` ԱՊՀ երկրների առաջնության ոսկե մեդալակիր, աշխարհի առաջնության արծաթե մեդալակիր:
Լրահոս
Տեսանյութեր
Բագրատ Սրբազան. ՔՊ անդամներ արդեն իսկ ներքին ուղերձներ են հղում, թե ինչպես կարող են միանալ մեզ