Իմ նկատմամբ քաղաքական հետապնդում է իրականցվում. Վոլոդյա Ավետիսյանը մանրամասներ է ներկայացրել
Այսօր Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում ազատամարտիկ Վոլոդյա Ավետիսյանը ներկայացրեց իրեն կալանքի տակ պահելու և իր նկատմամբ քրեական գործ հարուցելու նախապատմությունը: Նաև հայտարարեց, որ ինքը համաձայն չէ մեղադրանքի հետ:
«Ես համաձայն չեմ մեղադրանքի հետ, համարում եմ, որ իմ նկատմամբ քաղաքական հետապնդում է իրականացվում, որի հետևանքով էլ հայտնվել եմ այստեղ: Երբ նստացույց կազմակերպեցին ազատամարտիկները, բարձրաձայնելով իրենց սոցիալական խնդիրները, անընդհատ մարդ էին ուղարկում ինձ ծանոթ, կոչումներով, առաջարկեցին նստացույցը դադարեցնել, հետո կլորիկ գումար, աշխատանք կամ ծառայությունում վերականգնում առաջարկեցին, բիզնես՝ էջմիածնում կամ Երևանում: Բայց այդ ամենից հրաժարվեցի, որից հետո բազմիցս առաջարկել են, որ գործ չունես, խնդիրներ կունենաս, հեռախոսս գաղտնալսել են, ձերբակալվելուց հետո կալանատանը ինձ մոտ եղել է քննիչը, առանց դատապաշտպանի, ասել, որ եթե ես հրաժարվում եմ հետագա պայքարից, ուրեմն հաջորդ դատին միջնորդում է ինձ բաց թողնլ: Ես քննիչին ասացի՝ պարոն Խաչիկյան, ես իմ հոգին ու հայրենիքս չեմ ծախի»,-Ավետիսյանի այս հայտարարությունն ավարտվեց դահլիճում ներկա նրա համակիրների ու կողմնակիցների ծափահարություններով:
Սակայն նիստը նախագահող դատավոր Լևոն Ավետիսյանը դիտողություն արեց դահլիճում ներկաներին, հորդորեց նիստը միտինգի չվերածել և նկատեց, որ եթե այդպես շարունակի ինքը ստիպված է լինելու նիստը դռնփակ անցկացնել:
Նիստի սկզբում Վոլոդյա Ավետիսյանի պաշտպան Արա Զաքարյանը ինքնաբացարկի միջնորդություն ներկայացրեց դատավորին` հիմնավորելով. «Գործը վարույթ ընդունելուց հետո կատարել եք այնպիսի գործողություններ, որոնք օբյեկտիվորեն կասկածի տակ են դնում Ձեր անաչառությունը, ուստի Դուք չեք կարող մասնակցել սույն գործի քննությանը: 2014 թ. մարտի 19-ին մուտք է արվել իմ միջնորդությունը, բերվել են հիմնավորումներ այն մասին, որ սույն գործը այս դատարանի ընդդատյա չէ, ուստի չեք կարող նշանակել դատական քննություն: Նույն օրը ստացել եմ 2014 թ. մարտի 18-ին փոստին հանձնած ծանուցագիրը այն մասին, որ դատաքննություն է նշանակվել այսօր, թեև դատարանը իրավունք չուներ մարտի 22-ից շուտ նման որոշում կայացնել: Իմ պաշտպանյալին վերագրվող հանցանքներից ոչ մեկը չի կատարվել Արաբկիր համայնքում, Դուք պարտավոր էիք այն որպես ընդդատյա ուղարկել, ինչը չեք արել, այլ թողել եք անփոփոխ կալանավորումը, այն հիմքով, որ կալանքից ազատելու մասով հիմքեր չկան»:
Միջնորդությունը խորհրդակցական սենյակում քննարկելուց հետո դատավոր Ավետիսյանը մերժեց այն: Դատավորը մերժեց նաև Վոլոդյա Ավետիսյանի խափանման միջոց կալանքը գրավով փոխարինելու մասին միջնորդությունը: Դատարանի այս որոշմանը դահլիճում ներկաները արձագանքեցին «ա-մոթ, ա-մոթ» վանկարկումներով:
Փաստաբան Արա Զաքարյանը դատարանի դահլիճում հայտարարեց, որ պատրաստվում է բացարկի միջնորդություն հայտնել դատարանում մեղադրանքը պաշտպանող դատախազին և դրա համար մի քանի օր ժամանակ է հարկավոր: Այդ հիմնավորմամբ դատական նիստը հետաձգվեց և կշարունակվի ապրիլի 2-ին:
Հարակից հրապարակում`
Վոլոդյա Ավետիսյանի գործով առաջին դատական նիստը կկայանա մարտի 26-ին
Լրահոս
Տեսանյութեր
Ոստիկանները Բագրատ Սրբազանին և ԱԺ պատգամավորներին թույլ չեն տալիս մուտք գործել Կիրանց