Ձեր վստահելի աղբյուրը

«Յոթ հեռուստաալիքներում հատկացված ընդհանուր եթերաժամանակի հաշվարկով մարտին ևս առաջատարը Ժողովրդական կուսակցությունն է, և դարձյալ այլ կուսակցությունների նկատմամբ առավելությունը նա ստացել է ի հաշիվ «ԱԼՄ» հեռուստաալիքի»,- այսօր լրագրողների հետ հանդիպման ժամանակ հայտարարեց Երևանի մամուլի ակումբի նախագահ Բորիս Նավասարդյանը: Ըստ նրա, «ԱԼՄ» կուսակցությունների գործունեությանը նվիրված նյութերի ¾-ը բաժին է ընկնում Ժողովրդական կուսակցությանը: Այսօր Բորիս Նավասարդյանը ներկայացրեց Ազգային ժողովի ընտրությունների պաշտոնական քարոզչության ժամանակաշրջանին նախորդող ամիսներին Հայաստանի հեռուսաալիքների դիտարկման արդյունքները:

Ըստ այդմ , մարտ ամսին 76 549 վայրկյան եթերաժամանակով առաջատարը Ժողովրդական կուսակցությունն է: Նրան հետևում են Հանրապետական (56 008 վրկ), «Բարգավաճ Հայաստան» (45 120 վրկ), ՀՅ Դաշնակցություն (31 496) կուսակցությունները: Մյուս կուսակցությունների գործունեությունը լուսաբանելու համար ևս հայրենի հեռուստաընկերությունները ժամանակ են հատկացրել: Միակ բացառությունը «Քրիստոնեա-ժողովրդական վերածնունդ» կուսակցությունն, որի անվան դիմաց ԵՄԱ ներկայացրած հաշվետվության մեջ գրված է «0» թիվը: Բորիս Նավասարդյանի խոսքերով, սա չի կարելի բացատրել քաղաքական դրդապատճառներով, քանի որ այդ կուսակցությունը դեռ նոր է ստեղծվել և իր մասին խոսելու առիթ չի տվել:


Ինչ վերաբերում է եթերից զրկված երեք ընդդիմադիր կուսակցություններին` «Հանրապետություն», «Նոր ժամանակներ», «Ժառանգություն», ապա մարտ ամսին նրանց ևս եթեր է հատկացվել: Ըստ հաշվետվության «Ժառանգությանը» հատկացվել է 7568 վրկ, «Նոր ժամանակներին»` 2721 վրկ, իսկ «Հանրապետությանը»` 1286 վրկ:

Կուսակցությունների անվան հիշատակման տեսանկյունից բացարձակ առաջատարը Հանրապետական կուսակցությունն է, ում համապատասխան ցուցանիշը ցուցակի իր մերձավոր հարևանին գերազանցում է մոտ երկու անգամ: Այս երևույթը ևս ունի իր բացատրությունը: Բորիս Նավասարդյանի խոսքերով, դա կապված է մարտի վերջին վարչապետ Անդրանիկ մարգարյանի մահվամբ պայմանավորված իրադարձություններով, երբ հեռուստաեթերում անընդհատ հիշվում էր հանրապետական վարչապետի գործունեությունը:

Բորիս Նավասարդյանի համոզմամբ, որքան մոտենում է ընտրությունների օրը, այնքան հեռուստաեթերում հավասարակշռություն է ստեղծվում: Նրա խոսքերով, սա էլ պայմանավորված է օտաերկրյա երկարաժամկետ դիտորդական առաքելությունների ներկայությամբ: «Դիտորդների ներկայությունը լավ է ազդել: Եթե նրանք այս երկու համապետական ընտրություններին մնան Հայաստանում, գուցե եթերի առումով իդեալին հասնենք»,- նկատեց նա: Ինչևէ պաշտոնական քարոզարշավի սկսվելուց առաջ իրականացված դիտարկումը թույլ է տվել ԵՄԱ փորձագետներին հանգել մի շարք հետաքրքիր եզրահանգումների:

Այսպես, հեռուստաալիքների մեծ մասում, այդ թվում հանրայինում, նկատվում է հասարակական-քաղաքական հաղորդումների ծավալների կրճատում: Մյուս կողմից քաղաքական ագիտացիայի համար հեռուստաեթերի մատչելիությունը սահմանափակ է, իսկ իրական բազմակարծություն ապահովող առավել գործուն միջոցը միջազգային կառույցների կողմից լրատվամիջոցների դիտարկումն է: