Ադրբեջանը ցույց է տալիս, որ չափազանց ահաբեկված է ճշմարտությունից. Քերոլայն Քոքս
Լեռնային Ղարաբաղի ժողովուրդը պետք է իրավունք ունենա մասնակցել ղարաբաղյան հիմնախնդրի բանակցային գործընթացին: այդ մասին այսօր Ազգային ժողովում տեղի ունեցած ասուլիսում հայտարարեց Մեծ Բրիտանիայի և Հյուսիսային Իռլանդիայի Միացյալ Թագավորության խորհրդարանի Բրիտանահայկական համակուսակցական խորհրդարանական խմբի նախագահ բարոնուհի Քերոլայն Քոքսը:
Նշենք, որ նրա գլխավորած պատվիրակության անդամները արդեն երեք օր է` Հայաստանում են, նախօրեին այցելել են Ստեփանակերտ, ունեցել հանդիպումներ ու տպավորված վերադարձել Երևան:
«Ես չէ, որ պետք է գովեմ Ղարաբաղի ժողովրդին, բայց իսկապես առաջընթաց նկատել եմ: Մենք այնտեղ լսեցինք, որ Մինսկի խմբի ձևաչափով բանակցային գործընթացում առաջընթաց եղել է: Ղարաբաղն է, որ ամենամեծ զիջումներն է արել ՄԽ գործընթացի ժամանակ: Անշուշտ, լուրջ հարց է, և ես չեմ ուզում խոսել ԼՂ ժողովրդի անունից: Բայց ես կարծում եմ, որ ԼՂ ժողովրդը պետք է իրավունք ունենա մասնակցելու բանակցային գործընթացին: Ես տեսնում եմ, որ հայերը կամք են ցուցաբերել շարժվել սկզբունքների հիման վրա ու հիմա Ադրբեջանը պետք է քայլեր կատարի», -հավելեց Քերոլայն Քոքսը` պատասխանելով հարցին, թե հիմնախնդրի լուծման ի՞նչ ուղիներ է տեսնում:
Ասուլիսին ներկա Պահպանողական կուսակցության ներկայացուցիչ, հայ-բրիտանական խորհրդարանական խմբի անդամ Ջոն Վիկինգդեյլն իր հերթին խոստացավԲրիտանիա վերադառնալուն պես Բրիտանիայի խորհրդարանի Համայնքների պալատին ներկայացնել այն ամենը, ինչին ականատես է եղել Ղարաբաղում: «Իրականում մեզանում ոչինչ չգիտեն Լեռնային Ղարաբաղի մասին, իսկ ունեցած տեղեկությունն էլ թերի է», -ասաց նա:
Քոքսը շնորհակալություն հայտնեց խորհրդարանական իր գործընկերներին` Լեռնային Ղարաբաղ այցելելու համար: «Իմ խորհրդարանական գործընկերները ցանկացան իրենք այցելել և իրենց աչքերով ականատես լինել` ինչ է կատարվում այնտեղ», -նշեց նա ու անդրադառնալով Ադրբեջանի քաղաքականությանը` Ղարաբաղ այցելողներին Ադրբեջանի համար անցանկալի մարդկանց ցուցակում ընդգրկելու վերաբերյալ, հայտարարեց. «Ես կարծում եմ, որ Ադրբեջանը լավ բան չի անում ու ի վնաս իրեն է գործում, երբ փորձում է ահաբեկել Ղարաբաղ գնացողներին: Փաստորեն, իրենք այդպիսով ցույց են տալիս, որ չափազանց ահաբեկված ճշմարտությունից»:
Նշենք, որ նախօրեին Ադրբեջանի ԱԳՆ պաշտոնական ներկայացուցիչը հայտարարել էր, որ իրենք կուսումնասիրեն այն տեղեկատվությունը, թե իսկապես բրիտանացի պատգամավորները այցելել են Լեռնային Ղարաբաղ ու կընդգրկեն այդ խմբին Ադրբեջանի համար անցանկալի մարդկանց ցուցակում:
Լրահոս
Տեսանյութեր
Մելքոնյան. Եկեղեցու, սրբազանների ակտիվացումը ցույց է տալիս, որ գտնվում ենք խորը ճգնաժամի մեջ
