Ձեր վստահելի աղբյուրը

Վերջին տարիներին էներգահամակարգում իրականացվել են մեծածավալ աշխատանքներ: Այս մասին այսօր լրագրողների հետ հանդիպման ժամանակ ասաց ՀՀ էներգետիկայի և բնական պաշարների նախարար Երվանդ Զախարյանը՝ ամփոփելով 2014թ-ին էներգետիկայի և բնական պաշարների ոլորտում կատարված աշխատանքներն ու մակրոտնտեսական ցուցանիշները:

Նախարարի խոսքերով՝ աշխատանքներն ուղղված են էլեկտրաէներգիայի արտադրության նոր, ավելի արդյունավետ հզորությունների ստեղծմանը (Երևանի ՋԷԿ-ի ՀՇԳՑ էներգաբլոկ, Հրազդանի 5-րդ էներգաբլոկ), տեղական ռեսուրսների օգտագործմանը, բնական գազի մատակարարման դիվերսիֆիկացմանը, բարձրավոլտ ենթակայանների վերականգմանը:

Անդրադառնալով 2014 թվականի ընթացքում էներգահամակարգի գործունեության հիմնական ցուցանիշներին՝ Ե.Զախարյանը տեղեկացրեց, որ անցած տարվա ընթացքում հանրապետությունում արտադրվել է 7750,0 մլն կՎտժ էլեկտրաէներգիա, որը 0,52 տոկոսով գերազանցում է նախորդ տարվա ցուցանիշը:

Ըստ ներկայացված տվյալների` ընթացիկ տարում էլեկտրաէներգիայի արտահանման ծավալը կազմել է 1305,3 մլն կՎտժ, որը հավասար է նախորդ տարվա ցուցանիշներին: Միևնույն ժամանակ, 2014 թվականին ներքին շուկայում սպառվել է 4915,83 մլնկՎտժ էլեկտրաէներգիա, իսկ 2013 թ-ին՝ 4840,91 մլն կՎտժ էլեկտրաէներգիա:

Նշվեց նաև, որ 2014թ. Հայաստան է ներկրվել 2, 451 մլրդ խորանարդ մետր գազ` նախորդ տարվա 2,361 մլն խորանարդ մետրի դիմաց: Ե.Զախարյանը հայտնեց, որ 2,062 մլրդ խմ գազը ներկրվել է ՌԴ-ից, 0,389 մլրդ խմ գազը՝ Իրանից:

«Պետք է նկատենք, որ նախորդ տարի բնակչության շրջանում գազի սպառման ծավալները նվազել են»,-ասաց նախարարը:

Նա միաժամանակ նշեց, որ նախորդ տարի էլեկտրաէներգիայի սպառումը աճել է ինչպես բնակչության շրջանում, այնպես էլ կազմակերություններում, ոռոգման համակարգում, արդյունաբերությունում, այլ սպառողների մոտ:

Անդրադառնալով էներգահամակարգում ստեղծված ֆինանսական վիճակին, Ե.Զախարյանն ասաց, որ ֆինանսական միջոցների անարդյունավետ օգտագործման հետևանքով ընկերություններում առաջացել են առևտրային կրեդիտորական պարտավորություններ օգտագործված էներգակիրների, ապրանքների և ծառայությունների գծով՝ 23,8 մլրդ դրամի չափով:

«Ընկերությունների առկա ֆինանսական վիճակի ուսումնասիրությունները ցույց են տալիս, որ համակարգում կան չլուծված խնդիրներ, որոնց հիմնական պատճառներից են 2012-2014թթ. մարժային տարիներին ոչ իրատեսական էներգահաշվեկշիռները, ատոմակայանի լրացուցիչ կանգառը, ջրի սակավությամբ պայմանավորված՝ ՀԷԿ-երում թերի արտադրված էլեկտրաէներգիայի հետևանքով «Հայաստանի էլեկտրական ցանցեր» ՓԲԸ-ում առաջացած ֆինանսական ճեղքվածը, որը կազմել է 27,6 մլրդ դրամ: Դա էականորեն ազդել է վերջինիս ֆինանսական վիճակի վրա»,- նշեց Ե.Զախարյանը:

Նախարարը նաև հայտնեց, որ «Հայաստանի էլեկտրական ցանցերը» ընկերությունը արտադրող կայանների նկատմամբ կուտակել է մեծ պարտքեր. միայն պետական մասնակցությամբ ընկերություններին, 2015թ-ի հունվարի 1-ի դրությամբ, պարտքը կազմել է 15,8 մլրդ դրամ, այդ թվում ժամկետանց պարտքը՝ 7,8 մլրդ դրամ: Բանկերի նկատմամբ ընկերության պարտավորությունները գերազանցում են 220 մլն դոլարը, իսկ պետական ընկերությունների առևտրային բանկերից ներգրաված վարկերը կազմում են 10,8 մլրդ դրամ: Ընդ որում, ըստ Ե. Զախարյանի, վարկերի սպասարկման հիմնական ծախսերը ներառված չեն սակագներում, ինչն էլ իր հերթին լրացուցիչ բեռ է ընկերությունների համար: