Ձեր վստահելի աղբյուրը

Այս տարի ապրիլի 24-ին աշխարհի շատ երկրներում երևանյան ժամանակով 19:15-ին (ժամ, որը խորհրդանշում է 1915 թվականը) եկեղեցական զանգերը կսկսեն ղողանջել՝ ի հիշատակ Հայոց ցեղասպանության զոհերի: Այդ ժամանակ զոհվեցին մեկ ու կես միլիոն հայեր, հարյուր հազարավոր մարդիկ ստիպված եղան լքել իրենց երկիրը: Այս մասին գրում է Ուկրաինայի Գերագույն ռադայի՝ «Ուկրաինայի ձայն» թերթը:

Ինչպես նշվում է նյութում, այդ ողբերգական իրադարձությունների 100-ամյա տարելիցին էր նվիրված վերջերս Երևանում կայացած «Արարատի ստորոտին» միջազգային մեդիա ֆորումը, որի ընթացքում Հայաստանի նախագահ Սերժ Սարգսյանը պատասխանեց լրագրողների բազմաթիվ հարցերին, մասնավորապես՝ Ադրբեջանի, Ռուսաստանի, Թուրքիայի հետ հարաբերություններոււմ եղած խնդիրների վերաբերյալ:

«Հայաստանը Ցեղասպանության ճանաչումը չի համարել Թուրքիայի հետ հարաբերությունների կարգավորման նախապայման»,- մեդիա ֆորումին հայտարարել է Հայաստանի նախագահ Սերժ Սարգսյանը:

Նյութում նշվում է, որ մեդիա ֆորումը հավաքել էր աշխարհի 34 երկրներից միջազգային ԶԼՄ-ների ավելի քան 200 ներկայացուցիչների, գիտնականների, հասարակական և քաղաքական գործիչների և դարձավ Հայոց ցեղասպանության պատմության, վերջինիս ճանաչման, դրա փաստի ժխտման պատասխանատվության, և, գլխավորը, ապագայում համանման հանցագործությունների կանխարգելման հետ կապված հարցերի քննարկման հարթակ:

Հայոց ցեղասպանության 100-րդ տարելիցին նվիրված միջոցառումները համակարգող, ՀՀ նախագահի աշխատակազմի ղեկավար Վիգեն Սարգսյանը նույնպես գտնում է, որ Ցեղասպանության և դրա ժխտման հետ կապված հարցը այսօր արդիական քաղաքական խնդիր է: Այդ պատմական իրադարձությունների մասին մեծաքանակ փաստաթղթեր կան, որոնք պահվում են արխիվներում կամ բազմաթիվ միջազգային կենտրոններում:

Թերթը ընդգծում է, որ ֆորումին ՀՀ նախագահի աշխատակազմի ղեկավարը հաղորդեց նաև Հայոց ցեղասպանության 100-ամյա տարելիցին նվիրված ապրիլյան միջոցառումների ծրագրի մասին և որ «Արարատի ստորոտին» միջազգային մեդիա ֆորումի մասնակցները ընդունեցին Հայոց ցեղասպանությունը դատապարտող հռչակագիր:

Լրագրողները՝ անդրադառնալով հնագույն պատմական իրադարձություններին, ընդգծեցին. «Մենք դիմում ենք աշխարհի բոլոր երկրների մեր գործընկերներին՝ կոչ անելով Հայոց ցեղասպանության 100-րդ տարելիցի նախաշեմին գործադրել բոլոր ջանքերը զոհերի հիշատակը վառ պահելու , ԶԼՄ-ներին՝ անցյալի սարսափելի հանցագործությունների մասին լռելու փորձերին խոչընդոտելու կոչով՝ որակելով դրանք որպես նոր հանցագործություններին մասնակից լինելու փորձ, Հայոց ցեղասպանության, Հոլոքոստի և ռասիզմի ու մարդատյացության հողի վրա մարդկության դեմ կատարած այլ հանցագործությունների նշանակությունը նվազեցնող ժխտումների դեմ պայքարելու համար ...»:

Հիշեցնենք, որ «Արարատի ստորոտին» 5-րդ միջազային մեդիա ֆորումի մասնակիցները, որը անց էր կացավում մարտի 18- 20-ը Երևանում և նվիրված էր 1915 թվականին Օսմանյան կայսրությունում Հայոց ցեղասպանության 100-րդ տարելիցին, միջոցառման եզրափակիչ օրը ընդունեցին Հայոց ցեղասպանությունը դատապարտող համընդհանուր հռչակագիր:

Հռչակագրում նշվում է. «Մենք՝ լրագրողներս, «Արարատի ստորոտին» խորագրով միջազգային մեդիա ֆորումի մասնակիցներս, տարբեր երկրների, ազգությունների և կրոնների ներկայացուցիչներս, հարգանքի տուրք ենք մատուցում հայ ժողովրդին և հարգում ենք 1915թ. Օսմանյան կայսրությունում Ցեղասպանության 1.5 մլն անմեղ զոհերի հիշատակը։ Մենք կոչ ենք անում դատապարտել այդ իրադարձությունները, որոնք ուղղված էին հայ ազգի և նրա բազմադարյա յուրահատուկ մշակույթի ոչնչացմանն ու հայ ազգին սեփական հայրենիքից զրկելուն։ Իրադարձություններ, որոնք ուղեկցվում էին զանգվածային ջարդերով, կոտորածներով և էթնիկական զտումներով»։

Հռչակագրի համաձայն՝ մասնակիցները շեշտել են, որ հայ ժողովրդի ողբերգության 100-ամյա տարելիցի շեմին չեն կարող անտարբեր մնալ Թուրքիայի կողմից Օսմանյան կայսրության տարածքում իրականացված Հայոց ցեղասպանությունը մոռացության մատնելու փորձերի հանդեպ։

«Մենք դատապարտում ենք 1915թ. Ցեղասպանության ժխտումը՝ որպես պատմական փաստերի կեղծում, որոնք աղավաղում են այս ողբերգության պատճառները, մեխանիզմներն ու հետևանքները։ Դիմելով պատմական փաստերին՝ մենք հարգանքի տուրք ենք մատուցում այն լրագրողներին, որոնք աշխարհին հայտնել են Օսմանյան կայսրության տարածքում կատարվող սարսափելի ոճրագործությունների մասին։ Մենք գիտակցում ենք լրատվամիջոցների դերն ու նշանակությունը և կարծում ենք, որ նրանց հիմնական խնդիրը բոլոր ազգերի միջեւ երկխոսությունը պաշտպանելն է», - ասվում է փաստաթղթի մեջ։
Ֆորումի մասնակիցները ընդունված հռչակագրում դիմել են աշխարհի բոլոր երկրների իրենց գործընկերներին՝ կոչ անելով.
- գործադրել բոլոր ջանքերը զոհերի հիշատակը վառ պահելու, անցյալի հանցագործությունների մասին լռելու փորձերին խոչընդոտելու,
- Հայոց ցեղասպանության, Հոլոքոստի և ռասիզմի ու մարդատյացության հողի վրա մարդկության դեմ կատարած այլ հանցագործությունների նշանակությունը նվազեցնելու դեմ պայքարելու համար,
- կենտրոնացնել ջանքերը պատմական արդարությունը վերականգնելու եւ ՄԱԿ Գլխավոր Ասամբլեայի կողմից Հայոց ցեղասպանության ճանաչմանը հասնելու համար»:

Հռչակագիրը ստորագրած ԶԼՄ-ների ներկայացուցիչներն ողջունել են նաև Եվրախորհրդարանի, Եկեղեցիների համաշխարհային խորհրդի, Ուրուգվայի, Ռուսաստանի, Ֆրանսիայի, Իտալիայի, Գերմանիայի, Հոլանդիայի, Բելգիայի., Լեհաստանի, Լիտվայի, Սլովակիայի, Շվեդիայի, Շվեյցարիայի, Հունաստանի, Կիպրոսի, Լիբանանի, Կանադայի, Վենեսուելայի, Արգենտինայի, Չիլիի և Վատիկանի կառավարություններին, որոնք ճանաչել և դատապարտել են 20-րդ դարի առաջին ցեղասպանությունը։

Նախորդիվ`
«Արարատի ստորոտին» մեդիաֆորումը Հայոց ցեղասպանությունը դատապարտող հռչակագիր է ընդունել