Սամվել Բաբայանի ունեցած փորձը օգտագործելու անհրաժեշտություն կա. Ռուստամյան
«Ես տեսնում եմ Սամվել Բաբայանի կարևորությունը, նրա ունեցած փորձը օգտագործելու անհրաժեշտություն», -այսօր լրագրողների հետ ճեպազրույցում հայտարարեց ԱԺ Դաշնակցություն խմբակցության ղեկավար Արմեն Ռուստամյանը:
Նշենք, որ Արցախում ընդդիմադիր պատգամավոր Հայկ Խանումյանը նախաձեռնել էր ստորագրահավաք՝ Բաբայանին ԼՂՀ ՊԲ հրամանատար նշանակելու պահանջով:
Ըստ Ռուստամյանի, այլ հարց է, թե ունեցած փորձը ինչպես է հնարավոր օգտագործել: «Պարտադիր չէ անպայման ունենալ ինչ-որ պաշտոն, որ էդ օգտակարությունը ունենաս: Այսօր Կոմանդոսը (Արկադի Տեր-Թադևոսյան-խմբ.) որտեղ էլ լինի, օգտակար է, ուզում եք պաշտոն տվեք, ուզում եք մի տվեք: Էդ մարդու ցանկացած հայտարարություն մեզ օգուտ է, մեր պաշտպանության համար է օգուտ», -ասաց Ռուստամյանը:
Անդրադառնալով պատգամավոր Հայկ Խանումյանի նկատմամբ կիրառած բռնությանը, Ռուստամյանը ասաց, թե չի բացառում, որ կատարվածի մեջ քաղաքական ենթատեքստ լինի:
«Առաջիկայում ընտրություններ են ոչ միայն Հայաստանում, այլ նաև Ղարաբաղում: Ղարաբաղում նաև խնդիր կա Սահմանադրական փոփոխությունների հետ կապված: Լուրջ քաղաքական իրադարձություններ են, և ցանկացած քաղաքական ուժ փորձում է տեղավորվել այս դասավորումների մեջ ու որոշել իր հարաբերություններում ինչպես օգտագործել այս կամ այն ինտրիգը», -հավելեց պատգամավորը՝ դատապարտելով բռնության դեպքը:
Դաշնակցական պատգամավորի խոսքով, կա ընդհանուր թշնամի և պետք է այդ պարագայում ամուր պահել թիկունքը և ոչ թե միմյանց նկատմամբ «ինչ-որ ոտնձգություններ» իրականացնել:
«Ավելի լավ է ամրապնդենք մեր ներքին թիկունքը, ամրապնդենք մեր ճակատը, որպեսզի կարողանանք առաջիկա հարվածներին դիմակայենք: Ինչ է վերջացա՞վ, թվում է, թե նոր սպառնալիքներ չե՞ն լինելու մեր սահմանների վրա։ Չարաչար սխալվում են, առջևում շատ ավելի լուրջ փորձություններ են մեզ սպասվում, ուրեմն պետք է նման բաներից հեռու մնալ, մեր միասնականությունը պահպանել, բոլորի փորձն էլ օգտագործել մեր պաշտպանունակությունը բարձրացնելու համար», - հավելեց Արմեն Ռուստամյանը:
Հարակից հրապարակումներ`
- Քաղաքական ենթատեքստ չկա, այդ մարդը ուղղակի անհավասարակշիռ է. Դավիթ Բաբայան
- Ստեփանակերտի ոստիկանությունը պատգամավորին ծեծելու վերաբերյալ հաղորդում է ստացել
- Ես եկել եմ իմ ժողովրդի հետ լինելու, ինձ պաշտոն չի հետաքրքրում. Սամվել Բաբայան