Արա Պողոսյան. «Մեր մասնակցությունը Ռուսաստանի «Սուպերլիգային» կախված է ակումբների որոշումից»
Բասկետբոլի Եվրոպայի փոքր երկրների առաջնությունում Հայաստանի հավաքականի փայլուն ելույթը սկիզբ դրեց երկրում մարզաձևի վերելքին: Հայաստանի բասկետբոլի ֆեդերացիայի կողմից մշակված ծրագրով ստեղծվեց բասկետբոլային ակումբ, որն անվանվեց «Ուրարտու» և մասնակցության հայտ ներկայացվեց Ռուսաստանի «Սուպերլիգա»:
ՀԱՕԿ-ի լրատվական բաժինը խոսել է Հայաստանի բասկետբոլի ֆեդերացիայի փոխնախագահ Արա Պողոսյանի հետ և պարզել, թե գործընթացային ի՞նչ փուլում է գտնվում հայկական ակումբի՝ ռուսական լիգայում մասնակցելու հարցը:
«Մենք Ռուսաստանի բասկետբոլի ֆեդերացիային «Սուպերլիգային» մասնակցելու հայտ ենք ներկայացրել: Վերջինս ընդունել է այն, սակայն մեր մասնակցությունն այդ առաջնությանը կախված է միմիայն ակումբների համաձայնությունից: Օգտվելով առիթից՝ ցանկանում եմ նշել, որ ռուսական մեդիայում տեղ գտած հրապարակումները, ըստ որոնց Ռուսաստանի բասկետբոլի ֆեդերացիայի ղեկավարությունը տվել է իր համաձայնությունը և մեր ակումբը «Սուպերլիգայի» մասնակից է, սխալ են: Ցանկանում եմ ևս մեկ անգամ ճշտում մտցնել. մեր մասնակցությունը կախված է ակումբների որոշումից, Ռուսաստանի ֆեդերացիան և նրա ղեկավարությունը չեն, որ որոշում են այդ հարցը: Այժմ մենք սպասում ենք ակումբների պատասխանին»,- ասել է Պողոսյանը:
Հավելենք, որ «Ուրարտու» բասկետբոլային ակումբը հիմնականում համալրված կլինի բասկետբոլի Հայաստանի հավաքականի անդամներով, կհրավիրվեն նաև արտասահմանցի բասկետբոլիստներ: Թիմը կմարզի Հայաստանի հավաքականի գլխավոր մարզիչ Տիգրան Գյոկչյանը:
Լրահոս
Տեսանյութեր
Բագրատ Սրբազան. ՔՊ անդամներ արդեն իսկ ներքին ուղերձներ են հղում, թե ինչպես կարող են միանալ մեզ