Ձեր վստահելի աղբյուրը

Մուլտիպլիկատոր, նկարիչ Նաիրա Մուրադյանի նոր՝ «Ամանոր» վերնագրով ֆիլմն արդեն պատրաստ է: Ֆեյսբուք սոցիալական ցանցում տեղադրելուց հետո  ռեժիսորը միայն դրական արձագանքներ է ստացել: Շատերը ոգևորված ֆիլմով՝ ցանկանում են Ամանորը շուտ գա: 

Նաիրա Մուրադյանը պատասխանեց Panorama.am-ի մի քանի հարցի.

Panorama.am. Ձեր մուլտֆիլմերը միշտ էլ ճանաչելի են՝ ինչքան էլ  «Ամանորի»-ի նման հեքիաթային, կամ՝ «Բալետ»-ի նման ֆանտաստիկ ու միաժամանակ իրատեսական բովանդակություն ունենան, կամ՝ «Մեկ անգամ մի օրը»-վա նման մանկական հիշողությունից բերված: Ճանաչելի են որպես Մուրադյան մուլտֆիլմ:  Փորձում եք ընդհանուր ձեռագիր պահե՞լ, թե՞ իրենք հենց այդպես ճանաչելի ստացվում են:
Նաիրա Մուրադյան. Իհարկե, ուրախ եմ, որ ճանաչվում եմ որպես հեղինակ, բայց միշտ նոր ֆիլմ սկսելիս նոր ոճ եմ փնտրում, նոր արտահայտամիջոց, գոնե արտաքին նմանությունից խուսափում եմ: Այդպես ավելի հետաքրքիր է աշխատելը:
«Մեկ անգամ մի օրը» ընկերուհուս՝ Հերմինե Ստեփանյանի սցենարով էր, իր մանկության հիշողություններն էին հիմքում, «Բալետը» Ավետ Տերտերյանի երաժշտության ստեղծած պատկերներից ծնված պատմություն էր: Եթե այս երկու ֆիլմերը ինչ-որ բանով իրար նման են, դա իմ հնարավորությունների սահմանն է)) :

Panorama.am. Ձեր հանդիսատեսից շատերն են ուզում, որ Ձեր անիմացիոն ֆիլմերը Հայաստանը ներկայացնեն արտասահմանյան փառատոներում, բայց, կարծես թե, Դուք դրան հետամուտ չեք: Ինչո՞ւ հետամուտ չեք լինում, թե՞ գտնում եք, որ Ձեր գործը միայն ստեղծագործելն է:
Նաիրա Մուրադյան. Ես էլ եմ ուզում ֆիլմերս փառատոների մասնակցեն, բայց հենց վերջացնում եմ, նորն եմ սկսում (նույնիսկ չվերջացրած եմ նորը մտմտում ) ու էլ ժամանակ չի մնում զբաղվել փառատոներին հետևելով: Հիմա ավելի քիչ ամբիցիոզ եմ, լրիվ բավարարված եմ ինձ զգում, եթե մոտիկներս տեսնում և հավանում են:

Panorama.am. «Ամանոր»-ը որևէ մրցույթի կամ փառատոնի ուղարկելո՞ւ եք, թե՞ ոչ:
Նաիրա Մուրադյան. «Ամանորը» Ֆեյսբուքում տեղադրելուց հետո առաջարկներ եղան կոնկրետ փառատոներից ու արդեն թարգմանված ուղարկել եմ: Թարգմանեց անգլերեն Ֆեյսբուքի ընկերներից, բայց ինձ անծանոթ մի աղջիկ: Այ սա ավելի տաքացնող ու հաճելի բան է, քան ինչ որ հեռու մի տեղից մրցանակ ստանալը:

Panorama.am. Ստեղծագործական ի՞նչ պլաններ կամ ցանկություններ ունեք:
Նաիրա Մուրադյան. Հիմա Զահրատի «Մարկոս և Մարկոսն» եմ սկսել Տիգրան Համասյանի երաժշտության տակ: Ահավոր հետաքրքիր են երկուսն էլ ու շատ մեծ ու հարազատ: Հուսով եմ՝ չեմ կորցնի ոչինչ նրանց հմայքից: Մեծ հաճույքով եմ աշխատում: