Ձեր վստահելի աղբյուրը

ՀՀ էկոնոմիկայի նախարարի պաշտոնակատար Արծվիկ Մինասյանն այսօր Ազգային ժողովում լրագրողների հետ զրույցում պատասխանելով հարցին, թե արդյոք ընդունել է Բնապահպանության նախարար նշանակվելու առաջարկը,  նշեց, որ պատշաճ չի այդ հարցին պատասխանելը, քանի դեռ չի կազմավորվել կառավարությունը, և  չկան համապատասխան հրամանագրեր:

«Ես բարձր եմ գնահատում ցանկացած նախարարի տեղն ու դիրքը»,- ասաց նա:
Հարցին՝ ի վերջո որքանո՞վ է տիրապետում բնապահպանական խնդիրներին, Արծվիկ Մինասյանը պատասխանեց. «Ինձ համար առաջնորդողը պետք է լինի Սահմանադրությունը, մասնավորապես շրջակա միավայրի պահպանությունը, վերականգնումը և ողջամիտ օգտագործումը պետական և հանրային իշխանության հիմնական պարտավորությունն են՝ որպես գալիք սերունդների առջև պատասխանատվություն: Այս մոտեցումն է, որ բնապահպանության ոլորտում պետք է ուղղորդի ցանկացած նախարարի»,-ընդգծեց Ա.Մինասյանը:

Ճշտող հարցին՝ պրոֆեսիոնալ առումով կկարողանա՞ բնապահպանության ոլորտը ղեկավարել, էկոնոմիկայի նախարարի պաշտոնակատարը մեկ անգամ ևս նշեց, որ այս պահին չի ցանկանում այդ հարցին պատասխանել, քանի որ կա բնապահպանության գործող նախարարի պաշտոնակատար. «Եւ քանի դեռ չկա հրամանագիր, այդ հարցին թույլ տվեք չպատասխանել: Կգա ժամանակը՝ կխոսենք»:

Լրագրողների դիտարկմանը՝  եթե բնապահպանության նախարար նշանակվի, ապա կարո՞ղ է պայքարել, օրինակ, Ամուլսարի ծրագրի դեմ, որ Արծվիկ Մինասյանը պատասխանեց, որ Ամուլսարի ծրագիրն անցել է համապատասխան փորձաքննություն և, եթե բնապահպանական հատվածում չկան կոպիտ միջամտություն կամ առարկություններ, կամ հավասարակշռությունը պահպանված է, ապա այդ թեման պետք է որ անհանգստություն չառաջացնի: «Իսկ եթե կան անհանգստություններ, ապա դրանք քննարկման հարցեր են»,- նշեց նա:

Հարցին՝ ինչպե՞ս է Արծվիկ Մինասյանը պայքարելու հանքերի ապօրինի շահագործման դեմ, երբ որևէ նախարար չի կարողացել այդ հարցին լուծում տալ, նա նշեց. «Իսկ եթե ձեզ նշանակեին նախարար, դուք կարո՞ղ էիք լուծում տալ: Օրինակ, դուք՝ որպես լրագրող, կկարողանայի՞ք լուծել այդ հարցը»:

Երբ լրագրողներից մեկը նկատեց, որ կհրաժարվեին այդ պաշտոնից ու չէին դառնա հանցագործությանը մասնակից, Արծվիկ Մինասյանը վրդովված պատասխանեց.«Եթե ձեզ թվում է, որ նախարար դառնալը հանցակից դառնալ է, ուրեմն այդ դեպքում տրամաբանություն չկա պետական ողջ կառավարման համակարգում ձեր իսկ մոտեցումների մեջ: Չի կարելի էդպիսի մոտեցումով երկիր տանել առաջ»:

Անդրադառնալով էկոնոմիկայի նախարարության անվան փոփոխությանը, Արծվիկ Մինասյանն ասաց, որ իր տեսակետը չի փոխել: «Հիմա որոշակիորեն մեղմվել է նախարարության անվանումը: Ինձ մտահոգում է նաև այլ բան, որ ցանկացած փոփոխություն մի կողմից որոշակի առումով նաև ֆինանսական հետևանք է առաջացնում, մյուս կողմից` անվանումը ինքը պետք է բովանդակությանը մոտ լինի, հետևաբար ես ունեմ իմ տեսակետը»,- նշեց նա:

Նրա խոսքերով՝  այնպես չէ, որ հիմա բովանդակություն կամ ուղղվածություն չկա նախարարության անվան մեջ, բայց դա չի նշանակում, որ «էկոնոմիկա»-ն մնար, ուղղվածություն չէր լինելու:

Անդրադառնալով վարչապետի արտահայտած այն մտքին, թե Արծվիկ Մինասյանը չունի բիզնես մտածողություն, այդ պատճառով վարչապետը չի ուզում, որ ինքը մնա այդ պաշտոնում, նա նշեց. «Պարոն վարչապետը նոր ձևավորված խնդիրների հարցով տեսնում է այլ անձ: Ես հարգանքով եմ մոտենում: Ես որևէ այլ ենթատեքստ այս հարցի շուրջ չկա, և անկախ նրանից, թե ես որտեղ կլինեմ, իմ գլխավոր խնդիրը, որպես դաշնակցականի, այն նորմերի իրացումն է, որն ամրագրված է թե ՀՀԿ-ՀՅԴ  հուշագրով, թե սահմանդրական նորմերը կյանքի կոչելով»:

Արծվիկ Մինասյանը նաև նշեց, որ իր սկսած գործերը ընթացքի մեջ են և հետագայում էլ կշարունակվեն. «Իմ սկսած գործերը, որպես էկոնոմիկայի նախարարի, ընթացքի մեջ են»:
Վերջում Արծվիկ Մինասյանը խոստովանեց, որ ինքը միշտ կարոտում է խորհրդարանը, որտեղ ազատությունը շատ ավելի որակյալ և ընդգրկուն է: