Մահացած զինծառայողի հարազատների կասկածները կանգ են առել բարձրաստիճան զինվորականի վրա
Այս տարի հուլիսի 3-ին Տավուշի մարզի զորամասերից մեկի խրամատախորշում զինծառայող Արսեն Մխիթարյանի մահվան դեպքի առթիվ հարուցված քրեական գործի նախաքննությունն, արդեն մի քանի ամիս է, արդյունքներ չի տալիս, և Արսենի հարազատները կասկածներ ունեն, թե այս ամենի հետևում բարձրաստիճան զինվորական է կանգնած: Այդ մասին այսօր լրագրողների հետ հանդիպմանը հայտարարեց գործով տուժողի իրավահաջորդ հոր՝ Արթուր Մխիթարյանի ներկայացուցիչ-փաստաբան Նորայր Նորիկյանը:
Ժամկետային զինծառայողին հայտնաբերել են կզակի շրջանում ստացած հրազենային մահացու վնասվածքով և դեպքի առթիվ քրեական գործը հարուցվել է ինքնասպանության հասցնելու հոդվածով:
Փաստաբանի ներկայացմամբ, Արսենը 19 տարեկան էր, ծնողների միակ որդին, սիրում էր կյանքը, սովորում էր Երևանի պետական բժշկական համալսարանում, ուներ ապագայի ծրագրեր և, վերջապես հարազատների պնդմամբ՝ չէր կարող դիմել ինքնասպանության:
Տուժողն ու իր ներկայացուցիչը, Նորիկյանի խոսքով, սեփական նախաձեռնությամբ այցելել են զորամաս, զրուցել դեպքի օրը այնտեղ գտնված զինծառայողների հետ և եկել համոզման. «Արդյունքները, որոնք մենք ձեռք ենք բերել, խոսում են մի բանի մասին՝ մահվանը նախորդող ժամանակահատվածում Արսեն Մխիթարյանը ունեցել է շատ լուրջ հոգեբանական խնդիրներ, եղել է ճնշված վիճակում և ունեցել է որոշակի խնդիրներ որոշ զինվորների հետ»:
Փաստաբանը տեղեկացրեց, որ այդ ամենի մասին իրենք իրազեկել են վարույթն իրականացնող մարմնին ու միջնորդել ձեռնարկել համապատասխան քայլեր:
«Անցել է շուրջ երկու ամիս, բայց՝ ձայն բարբառո հանապատի: Ունեցած նյութերից տուժող կողմը հանգել է եզրակացության ու համոզվածության, որ Արսեն Մխիթարյանի մահվան գործում կան մեղավորներ, այդ մեղավորները մինչ օրս հայտնաբերված չեն: Ավելին, տուժող կողմը խորը կասկածներ ունի, որ ենթադրյալ մեղավորները կամ մեղավորը կարող են ունենալ ազդեցիկ հովանավոր կամ հովանավորներ, այդ թվում նաև Զինված ուժերում բարձրաստիճան սպայի կամ սպաների մակարդակով, ովքեր անում են ամեն հնարավորը Արսեն Մխիթարյանի մահվան իրական հանգամանքները չբացահայտելու համար», -նկատեց փաստաբանը:
Նորայր Նորիկյանը և տուժող կողմը ունեն մտավախություններ, որ նախաքննություն իրականացնող մարմինը կարող է այս քրեական գործով որևէ մեկին մեղավոր չճանաչի: Այդ պատճառով էլ նրանք դիմում են Գլխավոր դատախազին, Քննչական կոմիտեի ղեկավարին ու Պաշտպանության նորանշանակ նախարարին համապատասխան միջոցներ ձեռնարկել գործն օբյեկտիվ, բազմակողմանի և լրիվ քննելու համար:
Եվ բացի այդ, փաստաբանն ասաց, թե պատրաստվում է նույն պաշտոնյաներին գաղտնի ռեժիմով գրություն ուղարկել, որում կնշվեն իրենց կասկածները.
«Մենք գրության մեջ նշելու ենք տուժող կողմի մոտ առաջացած կասկածի արդյունքում ծնված այն մտահոգությունները, այդ թվում այն բարձրաստիճան զինվորականի անունը, որը որոշակի պայմաններում նշված քրգործի ընթացքի վերաբերյալ ցուցաբերում է որոշակի շահագրգռվածություն հնարավոր մեղավոր անձի քրեական պատասխանատվությունից խուսափելու հարցում»:
Հարակից հրապարակումներ`
Լրահոս
Տեսանյութեր
Ոստիկանները Բագրատ Սրբազանին և ԱԺ պատգամավորներին թույլ չեն տալիս մուտք գործել Կիրանց