Կլիմայական վայրիվերումներով ձմեռ է սպասվում
«Դեկտեմբեր-փետրվար ամիսներին մենք ունենալու ենք կլիմայական վայրիվերումներով ձմեռ»,-այսօր լրագրողների հետ հանդիպմանն ասաց ՀՀ ԱԻՆ «Հիդրոմետ» ծառայության օդերևութաբանության կենտրոնի պետի տեղակալ Գագիկ Սուրենյանը։
« Հանրապետության տարածքը այդ երեք ամիսներին էլ շատ հաճախ ենթարկվելու է հիմնականում Սկանդինավիայի կողմից ներթափանցող արկտիկական ցուրտ օդային հոսանքների ազդեցությանը, որոնք կառաջացնեն օդի ջերմաստիճանի լուրջ նվազումներ, առանձին ձյան առատ տեղումներ, բուք, այսինքն` կհաստատվեն բավականին սառնամանիքային եղանակներ: Շատ հաճախ կենթարկվենք նաև Մերձավոր Արևելքից ներթափանցող արևադարձային տաք օդային հոսանքների ազդեցությանը, որի արդյունքում այդ օրերին էլ կնկատվի օդի ջերմաստիճանի զգալի բարձրացում: Այսինքն` այս ձմռան ընթացքում մենք կունենանք և շատ սառնամանիքային օրեր և շատ տաք օրեր: Կունենանք օրեր, որ օդի ջերմաստիճանը կլիմայական նորմայից ցածր կլինի 7-10 աստիճանով, կունենանք օրեր էլ, որ կլիմայական նորմայից բարձր կլինի 7-10 աստիճանով»,-ներկայացրեց Սուրենյանը:
Նա չբացառեց, որ առանձին օրերին Արարատյան դաշտում սառը օդի լճացում, մառախուղներ լինեն. «Բոլոր երեք ամիսներին էլ տեղումների քանակը կանխատեսվում է նորմայից ավելի, դա բերում է այն եզրակացության, որ սպասվում է ձնառատ ձմեռ, բայց քանի որ շատ հաճախ մենք կենթարկվենք արևադարձային տաք օդային հոսանքների ներթափանցմանը, ձմռան ընթացքում կլինեն օրեր, որ հանրապետության հովտային շրջաններում՝ Երևանում, Արարատյան դաշտավայրում և մյուս ցածրադիր գոտիներում նույնիսկ կլինեն անձրևներ»:
ԱԻՆ «Հիդրոմետ» ծառայության օդերևութաբանության կենտրոնի պետի տեղակալն առանձնացրեց այն ծայրահեղ ցածր ու բարձր ջերմաստիճանները, որոնք կանխատեսում ենք այս ձմռան ընթացքում. «Շիրակում, Գեղարքունիքում, Արագածոտնի, Վայոց Ձորի և Կոտայքի լեռնային գոտիներում, Լոռիում այն օրերին, երբ կլինեն արկտիկական ցուրտ օդային զանգվածների ներխուժումներ, այդ օրերին օդի ջերմաստճանը կնվազի մինչև -25-ից -30 աստիճանի: Իսկ արևադարձային տաք օդային հոսանքների ներթափանցման դեպքում առանձին ժամանակահատվածներում ցերեկային ժամերին նշված տեղերում օդի ջերմաստիճանը նշված տեղերում ցերեկը կհասնի մինչև +5-ից +9 աստճանի: Տավուշի, Սյունիքի, Արցախի ցածրադիր գոտիներում արկտիկական ցուրտ օդային զանգվածների ներխուժման դեպքում գիշերային ժամերին առանձին ժամանակահատվածներում ջերմաստիճանը կհասնի մինչև -10-ից -15-ի, իսկ տաք օդային զանգվածների դեպքում՝ ցերեկային ժամերին մինչև +12-ից +17 աստիճանի:
Տավուշի, Սյունիքի, Արցախի լեռնային գոտիներում ցուրտ օդային հոսանքների դեպքում գիշերային ժամերին կլինի մինչև -17-22, իսկ տաք օդի ալիքների դեպքում ցերեկային ժամերին՝ մինչև + 10, +13 աստիճան:
Արարատ, Արմավիր, Արագածոտնի, Վայոց Ձորի և Կոտայքի նախալեռնային գոտիներում արկտիկական ցուրտ օդային զանգվածների ներհոսքի դեպքում գիշերային ժամերին այս երեք ամիսների ընթացքում կլինեն ժամանակահատվածներ, որ ջերմաստիճանը կհասնի -18-ից -23 աստիճանի, իսկ տաք օդի ալիքների դեպքում ցերեկային ժամերին այն կհասնի +10-ից +15 աստիճան տաքութուն»:
Ինչ վերաբում է մայրաքաղաքին, Սուրենյանի ներկայացմամբ, ցուրտ օդային զանգվածների դեպքում ձմռան ընթացքում գիշերային ժամերին կգրանցվի մինչև -19-ից մինչև -24 աստիճան, իսկ տաք օդի հոսքի դեպքում՝ +12-ից +15 աստիճան:
«Եթե ընդհանուր գնահատենք այդ ցուրտ և տաք ժամանակահատվածներն իրար գումարելով և միջինացնելով՝ ստացվում է, որ ամսկան միջին ջերմաստիճանները այս ձմռան ընթացքում կլինեն նորմայի սահմաններում: Այսինքն ասել, որ սպասվում է ծայրահեղ ցուրտ կամ տաք ձմեռ սխալ կլինի, միջին ջերմաստիճանը կլինի նորմայի սահմաններում, բայց շատ ցուրտ և շատ տաք ջերմաստիճանները կհաջորդեն իրար»,-նշեց նա՝ գյուղատնտեսներին խորհուրդ տալով անպայման կատարել այգեթաղ՝ ցրտահարություններից խուսափելու համար:
Հարակից հրապարակումներ`
Լրահոս
Տեսանյութեր
Ունենք մի իշխանություն, որ լավ լինելը չի երաշխավորում, վատ լինելը հաստատ երաշխավորում է. Ռուստամյան