Ձեր վստահելի աղբյուրը

«Առաջիկա օրերին՝ մինչև նոյեմբերի 30-ը ներառյալ, գտնվելու ենք ցուրտ օդային հոսանքների ազդեցության գոտում, բացառությամբ Լոռիի, Տավուշի, Սյունիքի և Արցախի, որտեղ ջերմաստիճանը պայմանավորված Իրանի տարածքից ներթափանցող համեմատաբար տաք օդային հոսանքների՝ կբարձրանա  8-10 աստիճանով»,-այսօր լրագրողների հետ հանդիպմանը հայտարարեց ՀՀ ԱԻՆ «Հիդրոմետ» ծառայության օդերևութաբանության կենտրոնի պետի տեղակալ Գագիկ Սուրենյանը։

Նա նշեց, որ Արարատյան դաշտում դիտվել է ցուրտ օդի լճացում, ցերեկային ժամերին Արարատյան դաշտում ջերմաստիճանը հավասարվել է լեռնային շրջանների ջերմաստիճանին. «Մեզ փրկության է հասնում այդ լճացումը ցրելու կիպրոսյան ցիկլոնը: Արդեն  30-ին կնկատվի  ամպամածություն և բավականին ինտենսիվ տաք օդի ներհոսք և 30-ից 1-ը ընկած ժամանակաշրջանում օդի ջերմաստճանը հանրապետության ամբողջ տարածքում  8-10 աստիճանով կբարձրանա: Այսինքն, եթե հիմա Երևանում -8,-10 աստիճան է, արդեն  դեկտեմբերի 1-ին մենք կարող ենք մայրաքաղաքում և Արարատյան դաշտում գիշերային ժամերին  ակնկալել  0-ից +2 աստիճան: Ցերեկային ժամերին առանձնապես ջերմաստիճանի փոփոխություն չի լինի, որովհետև դեկտեմբերի 1-ից տեղումներ են սկսվելու,  Երևանում և Արարատյան դաշտում օդի ջերմաստիճանը կլինի +3-ից +5-ի սահմաններում»:

Սուրենյանը տեղեկացրեց, որ դեկտեմբերի 1-ից հանրապետությունում սպասվում են տեղումներ. «Լեռնային մարզերում՝ Շիրակ, Կոտայք, Գեղարքունիք, Արագածոտնի լեռնային շրջաններ, Վայոց ձորի լեռնային բնակավայրերում սպասվում են ձյան առատ տեղումներ, բուք, հորիզոնական ցածր տեսանելիություն, ճանապարհներին մերկասառույց։ Իսկ հանրապետության նախալեռնային և հովտային գոտիներում՝ Արագածոտնի նախալեռներ, Արարատյան դաշտում, Կոտայքի նախալեռնային հատվածներում, Վայոց ձորի նախալեռնային հատվածներում, քանի որ սպասվում է լուրջ ջերմաստիճանի բարձրացում , տեղումներն այդ օրերին կլինեն թաց ձյան, ձնախառն անձրևի և  անձրևի տեսքով»:  

ԱԻՆ «Հիդրոմետ» ծառայության օդերևութաբանության կենտրոնի պետի տեղակալը հիշեցրեց, որ նոյեմբերի 15-ից Սիբիրից մեր երկրի տարածք էին ներխուժել արկտիկական ցուրտ օդային հոսանքներ, օդի ջերմաստիճանը զգալի նվազել էր, նույնիսկ ունեցել ենք ռեկորդային ցածր ջերմաստիճաններ. «Հատկապես վերջին երեք-չորս օրերին նոյեմբեր ամսվա համար բավականին ցածր ջերմային ֆոն է գրանցվել, որը կարելի է ասել առանձին հատվածների համար վերջին 45-50 տարիների ամենացուրտ օրերն են եղել»:

Նա, մասնավորպես առանձնացրեց  Տաշիրը, որտեղ օդի ջերմաստիճանը գիշերը նվազել է մինչև -26 աստիճան ցրտի, սովորաբար այդ հատվածում նման ջերմաստիճան լինում է հունվարի երկրորդ տասնօրյակում, իսկ Աշոցքում հասել է մինչև -25 աստիճանի:

«Ընդհանրապես բոլոր լեռնային բնակավայրերում այս վերջին օրերին օդի ջերմաստիճանը հիմնականում գիշերային ժամերին -15-ից -20 աստիճանի սահմաններում է եղել: Արարատյան դաշտում օդի ջերմաստիճանը նվազել է մինչև -8-ից -10, -10 գրանցվել է նաև Երևանի ցածրադիր հատվածներում, բարձրադիրում մինչև -7 աստիճանի է հասել: Նման ջերմային ֆոնը բնորոշ է դեկտեմբերի 20-25-ն ընկած ժամանակահատվածին: Այսինքն ներկա պահին մենք ինչ որ ունենք, դա զուտ ձմեռային ջերմաստիճան է և օդի օրական ջերմաստիճանը կլիմայական նորմայից ցածր է, Արարատյան դաշտում 7-8 աստիճանով, իսկ շրջաններից Լոռիում, Տավուշում, Սյունիքի առանջին հատվածներում այն կլիմայական  նորմայից ցածր է 10-15 աստիճանով»,-մանրամասնեց Սուրենյանը: