Ձեր վստահելի աղբյուրը

«Ոչ մի խախտում չպետք է արվի, ոչ մեկս իրավունք չունի սխալ բան անելու, կռիվ-դավի չի լինելու, մաքուր ընտրությունների ենք գնում, աշխարհին պետք է ցույց տանք, որ մենք ազնիվ, մաքուր ընտրություն պետք է անենք»,- ՀՀԿ-ում տեղի ունեցած հանդիպումից հետո լրագրողների հետ  զրույցում ասաց ՀՀԿ տարածքային ցուցակով (Արմավիրի մարզ) առաջադրված Սեյրան Սարոյանը՝ պատասխանելով հարցին, թե ինչ հանձնարարականներ տրվեցին:

Դիտարկմանը, թե խոսակցություններ կան, որ ընտրակաշառք է բաժանվում, վարչական ռեսուրսն է օգտագործվում, նա ասաց, «Ղալաթ են անում»:

ԱԺ ՀՀԿ խմբակցության ղեկավար Վահրամ Բաղդասարյանից, ով նույնպես  ՀՀԿ տարածքային ցուցակում է ընդգրկված, լրագրողները հետաքրքրվեցին, թե արդյո՞ք առանձին անդրադարձ եղել է Մասիսում տեղի ունեցած դեպքին, ասաց. «Ոչ, առանձին անդրադարձ չի եղել:  Ընդհանուր կարգապահության մասին է խոսվել, որ նման դեպքերն ընդհանրապես չպետք է լինեն և պետք է կանխարգելվեն: Այսինքն, թիմը պետք է լինի հաշտ, համերաշխ, և թիմը ոչ միայն իր համար  պատասխանատվություն կրի, այլ ընդհանուր մթնոլորտի, որպեսզի կարողանանք այնպիսի ընտրություններ անցկացնել, որոնք ընկալելի կլինեն և մեր  հանրության, և միջազգային հանրության համար»:

Հարցին, թե բացառո՞ւմ եք հետագայում նման դեպքերը, Վ. Բաղդասարյանն ասաց, որ իրենք պետք է հետևողական լինեն, որ նման դեպքեր ընդհանրապես չլինեն, խստագույն պատժվեն նման միջադեպերը:

Պատասխանելով հարցին, թե  նշվում էր, որ տարածքային  ցուցակները ներկուսակացկան պայքարի առիթ են հանդիսանալու, ՀՀԿ-ական գործիչն ասաց. «Ընդհանուր առմամբ, ոչ մեկը չի բացառում  պայքարը, բայց մեր նպատակը պետք է լինի մեկը՝  Հանրապետականի ընդհանուր արդյունքը  պետք է լինի, ոչ թե անհատների արդյունքը»: