Անճշտությունը հայտնաբերվել է երկու ձեռքի մատների վրա հաշված դեպքերում. Վիգեն Սարգսյան
«Մարտական գործողությունների մասնակիցների զինվորական գրքույկների հետ կապված խնդիրն ի հայտ գալուն պես անմիջապես մեր կողմից տարածվեց հայտարարություն, և ՊՆ թեժ գիծն անհատական դիմումներ ընդունելով, յուրաքանչյուր զանգի հետևից գնալով բոոր զինկոմիսարիատները, հատ-հատ նայում էր դեպքերը»,- խորհրդարանում կառավարության հետ հարցուպատասխանի ժամանակ պատասխանելով զինվորական գրքույկներում մարտական գործողությունների նշումների հետ կապված «Ելք» խմբակցության պատգամավոր Մանե Թանդիլյանի հարցին՝ ասաց պաշտպանության նախարար Վիգեն Սարգսյանը։
«Բազմաթիվ դիմումների պարագայում անճշտությունը հայտնաբերվել է երկու ձեռքի մատների վրա հաշված դեպքերում։ Անճշտությունները եղել են մեկ տասնյակից ոչ ավելի։ Յուրաքանչյուր դեպքում ընդունվել է որոշում և կատարվել է ուղղում այդ գրքույկներում»,- ասաց նախարարը։
Նրա խոսքով, միևնույն ժամանակ, բոլոր այն տղաներին, ովքեր նույնիսկ չեն մասնակցել մարտական գործողություններին, բայց ապրիլյան քառօրյայի օրերին եղել են մարտական հերթապահություն իրականացնող զորամասում, միայն այդ հիմքով արդեն նույն արտոնությունները տրվել են Հայաստանի երիտասարդական հիմնադրամի ծրագրի միջոցով։
Ինչ վերաբերում է պատգամավորի հարցի մյուս մասին, որ ծնողները շարունակում են հիգիենիկ պարագաներ ուղարկել զինվորներին, նախարարն ասաց. «Յուրաքանչյուր զինծառայող բյուջեով նախատեսված չափաբաժնով ամսական ստանում է գումար, իր համար անհրաժեշտ հիգիենիկ պարագաներ գնելու համար։ Սովորաբար այդ պարագաները գրում են անմիջապես զորամասի կողքին գտնվող խանութներից որևէ մեկից։ Եթե սրանից բացի լրացուցիչ կարիք են ունենում, շատ հնարավոր է, որ տնից են ուղարկում։ Մենք ամեն ինչ անում ենք, որ դրա կարիքը չլինի։ Եթե խնդիրը նրանում է, որ ուղղակի չի հերիքում տրվածը, դա շատ վատ է, մենք պատրաստ ենք ամեն նման դեպք անհատական ուսումնասիրել և գալ եզրահանգման»։
Անդրադառնալով ինչպես զինծառայողների , այնպես էլ նախկին զինծառայողների համար քաղցկեղի բուժմանը, նախարարն ասաց, որ այն գտնվում է պետպատվերի շրջանակներում։
«Ձեր կողմից նշված զինծառայողը՝ ստանալով ախտորոշում, որոշում է կայացրել բուժման կուրս անցնել, որը պետպատվերից դուրս է և որոշել է ձեռք բերել այլ դեղամիջոցներ արտերկրից։ Նա դիմել է ՊՆ և նախարարությունն աընդառաջելով նրա խնդրանքին՝ գտել է այլ՝ ոչ բյուջետային միջոցներ և շուրջ 5 մլն դրամի օգնություն է ցուցաբերել քաղաքացուն՝ դեղեր գնելու համար։ Մենք այդքանով ենք կարողացել աջակցել, շատ կուզենայի, որ մենք խնդիր ունեցող յուրաքանչյուր զինծառայողի կարողանայինք այդքան աջակցել»։
Հարակից հրապարակումներ`
- Ընդամենը 5 զինվորական գրքույկում է հայտնաբերվել անճշտություն. Վիգեն Սարգսյան
- ՊՆ-ն հետամուտ է զինգրքույկներում մարտական գործողություններին մասնակցելու մասին նշումի հարցերին
- Մարտական գործողություններին մասնակցած լինելու վերաբերյալ զինգրքույկում գրառումներ կատարելու կարգը դեռևս սահմանված չէ. ՊՆ
Լրահոս
Տեսանյութեր
Ոստիկանները Բագրատ Սրբազանին և ԱԺ պատգամավորներին թույլ չեն տալիս մուտք գործել Կիրանց