Տարածքների զիջման մասին խոսակցությունները միայն ներքին ամրությունն են խարխլում. Աշոտ Ղուլյան
Այսօր ԱԺ-ում լրագրողներն Արցախի հանրապետության Ազգային ժողովի նախագահ Աշոտ Ղուլյանին խնդրեցին անդրադառնալ ՀՀ նախագահ Սերժ Սարգսյանի այն հայտարարությանը, թե «Արցախի հարցի լուծման հետ կապված ցավոտ լուծումներ» և փոխզիջումներ են լինելու:
«Երևի կոռեկտ չէ, որ ես մեկնաբանեմ Հայաստանի հանարապետության նախագահի խոսքերը, որովհետև վստահ եմ, որ այդ խոսքերը եղել են շատ ավելի երկար խոսքից հետո: Մենք փոխզիջումների մասով մի քիչ առաջ ենք ընկնում: Իմ խորին համոզմամբ մենք շատ հեռու ենք այդ փուլից: Այսօր պարզ է, որ Ադրբեջանը ցանկություն չունի գնալ կոնկրետ լուծումների:
Պետք է շարունակել բանակցային գործընթացը: 2016 թվականի ապրիլից հետո մենք շատ ավելի ճիշտ ենք պատկերացնում մեր անվտանգության համակարգի բաղադրիչները: Մենք այսօր չենք կարող մեր պաշարները թուլացնել, որպեսզի չասված բաների փոխարեն ինչ-որ բաներ տանք»,- ասաց Ղուլյանը` հավելելով, որ տարածքների զիջման մասին խոսակցությունները միայն ներքին ամրությունն են խարխլում:
Դիտարկմանը, թե ՀՀ վարչապետի պաշտոնի հետ կապված Հայաստանի քաղաքական օրակարգում այժմ անորոշ վիճակ է, արդյո՞ք պաշտոնական Ստեփանակերտին չի անհանգստացնում հարցը, թե 2018-ից հետո Ադրբեջանի նախագահի հետ ով է նստելու բանակցությունների սեղանի շուրջ, արցախցի պաշտոնյան պատասխանեց.
«Արցախի Հանրապետությունում շատ հարգալից են վերաբերվում այն դիրքորոշմանը, որ դա Հայաստանի սուվերեն իրավունքն է: Այս պահին չեմ կարծում, թե մենք բոլոր հարցերի պատասխաններն ունենք: Կարծում եմ՝ ժամանակը կգա, և այդ հարցերի պատասխանը կտրվի հանրությանը: Ի դեմս Հայաստանի գործող նախագահի՝ մենք ունենք շատ լավ պատրաստվածություն Ղարաբաղի բանակցությունների հարցում, բայց վստահեմ, որ մենք նաև ունենք պատրաստվածություն այլ առումով, որովհետև դա մի պրոցես է, որում և արտաքին քաղաքական հարցերով, և անվտանգության հարցերով շատ ավելի մեծ շրջանակ է ներգրավված»:
Հաջորդ դիտարկմանը, թե ՀՀԿ-ականները գործող նախագահ Սերժ Սարգսյանին համարում են անփոխարինելի, Աշոտ Ղուլյանը պատասխանեց.
«Ես չեմ կարող հանրապետականների փոխարեն պատասխանել: Դա ՀՀԿ-ի որոշելիք հարցն է, եթե ես ձեզ հիմա բան ասեմ, կարո՞ղ է՝ դա լինելու է վերջնական որոշում»:
Անդրադառնալով Սարգսյան-Ալիև Ժնևյան վերջին հանդիպմանը՝ Արցախի խորհրդարանի նախագահն համոզմունք հայտնեց, որ հայկական կողմը իր դիրքորոշումը չի թուլացրել:
«Մենք Ժնևի հանդիպումից առաջ և հետո մեր դիրքորոշումը չենք թուլացրել: Մենք ցանկացած առիթ պետք է օգտագործենք բանակցային գործընթաց վերսկսելու համար: Այն, որ 2016 թվականի ապրիլից հետո մեր դիրքորոշումը կոշտացել է, միանշանական է և չկան հիմքեր, որ մեր դիրքորոշումը մեղմանալու են»,- նշեց Արցախի ԱԺ նախագահը:
Ղուլյանը կարևորեց բանակցությունների սեղանի շուրջ պաշտոնական Ստեփանակերտի ներկայությունը, սակայն միևնույն ժամանակ նշեց, որ դա ձեռնտու չէ բացառապես ադրբեջանական կողմին: Պաշտոնական Բաքուն, ըստ նրա, չի ցանկանում իրական բանակցություններ սկսել:
«Ղարաբաղի մասնակցությունը բանակցություններին ոչ ոք չի հերքում, բացի Ադրբեջանից: Խախված նրանից, թե Ադրբեջանը կհամաձայնվի կամ միջավայր կստեղծվի, որ Արցախը մասնակցի բանակցություններին, դա կվկայի, որ կա ցանկություն՝ հիմնախնդիրը լուծելու: Այն բոլոր հարցերը, որոնք կան բանակցությունների սեղանին և կարող են ծագել բանակցությունների ժամանակ, դրա մեծ մասի պատասխան տվողը Արցախի Հանրապետությունն է: Քանի Ադրբեջանը ցույց չի տալիս, որ կամք ունի Արցախին տեսնել բանակցությունների սեղանի շուրջ, դա վկայում է այն մասին, որ այդ երկիրը փորձում է հեռու պահել իրական բանակցային գործընթացը»,- ասաց արցախցի պաշտոնյան:
Հարակից հրապարակումներ`
- Ընդունելի չէ, որ Արցախի խնդրի լուծումն իրականացվում է առանց Արցախի մասնակցության. Արզիկ Մխիթարյան
- Աշխարհը դարձել է ավելի ցինիկ և Արցախյան խնդիրն ունիկալ չի դիտում. Արմեն Աշոտյան
- Արցախի անկախությանն այլընտրանք չկա. Էդուարդ Շարմազանով
- ՀՀ ԱԺ-ի հետ համագործակցությունն Արցախի ԱԺ-ի համար ամենակայացածն ու արդյունավետն է. Ղուլյան
- Ադրբեջանը պետք է հրաժարվի Արցախն անգամ տեսականորեն իր կազմում պատկերացնելու մտքից. Բաբլոյան
Լրահոս
Տեսանյութեր
Հայաստանում փոքրահասակ բնակչության շրջանում բավականին տարածված է գժախոտով թունավորումը. Ռ. Աբովյան