Ժոնաթան Լաքոթը պատրաստ է ներդրում կատարել Հայաստանում
Դիվանագիտությունն ամենևին էլ գաղտնի առաքելություն չէ, այն ենթադրում է հաղորդակցման հնարավորություն լայն հասարակության հետ: Դեկտեմբերի 12-ին Երևանում լրագրողների հետ իր առաջին հանդիպմանն այս մասին նշեց Հայաստանում Ֆրանսիայի արտակարգ և լիազոր դեսպան Ժոնաթան Լաքոթը: Նա նաև խոստացավ գրանցվել Ֆեյսբուքում, քանի որ այն Հայաստանում ավելի տարածված է, քան Թվիթերը: Լաքոթն ընդամենը երկու ամիս է՝ ստանձնել է Հայաստանում Ֆրանսիայի դեսպանի պաշտոնը:
Հայ-ֆրանսիական քաղաքական հարաբերություններն, ըստ դեսպանի, շատ հագեցած են կամ, ինչպես նշում է ՀՀ ԱԳ նախարար Էդուարդ Նալբանդյանը, առանձնաշնորհյալ հարաբերություններ են: Դեսպանը նշեց, որ թեպետ երկու ամիսը կարճ շրջան է, սակայն իր պաշտոնավարման այս երկու ամիսները բավական հագեցած են եղել: Նա հասցրել է հանդիպել 11 նախարարների հետ, անդրադարձել է երկկողմ հարաբերություններին, քննարկել հեռանկարներն ու հնարավորությունները, այցելել ֆրանսիական կրթական հաստատություններ, ձեռնարկություններ, ծանոթացել դրանց գործունեությանը, խնդիրներին:
«Բացի զուտ դիվանագիտական գործունեությունից, վերջին շաբաթները կարևոր նշանակություն են ունեցել մանավանդ Հայաստանի համար: Ես նկատի ունեմ ԵՄ հետ ընդլայնված համաձայնագրի ստորագրումը: Համաձայնագրի ստորագրման հաջորդ օրը Հայաստանը ստանձնեց Ֆրանկոֆոնիայի միջազգային կազմակերպության նախագահությունը: Սրանք հայ-ֆրանսիական հարաբերություններն ամրապնդող իրադարձություններ են»,- ասաց նա:
Դեսպանն ընդգծեց՝ իր բախտը բերեց, քանի որ Հայաստան ժամանեց ԵՄ հետ հարաբերությունների սերտացման շրջանում: Լաքոթը նշեց, որ 2018-ը Հայաստանի համար իրադարձություններով հագեցած տարի է. նախ՝ կնշվի Հայաստանի առաջին հանրապետության հարյուրամյա հոբելյանը, որի առիթով կլինեն այցեր՝ Ֆրանսիայի կառավարության ներկայացուցիչների մակարդակով, կտոնենք Էրեբունի-Երևանի 2800-ամյակը:
«2018 թ. դեկտեմբերի 7-ին լրանում է Սպիտակի երկրաշարժի 30-րդ տարելիցը, ողբերգություն, որը մեծ հետք թողեց Ֆրանսիայում: Այն կարելի է ասել նաև Ֆրանսիայի հետ համագործակցությանը սկիզբ դրեց՝ Հայաստանի անկախացումից փոքր-ինչ առաջ: Մեզ սպասվում է հարուստ 2018 թ., և իմ ցանկությունն է ավելի խորացնել, նոր հեռանկարներով ապահովել հայ-ֆրանսիական հարաբերությունները»,- ասաց նա: Դեսպանի գնահատմամբ՝ հայ-ֆրանսիական քաղաքական հարաբերությունները գերազանց են, բայց ինքը կցանկանար դրանք ևս երկու ասպարեզներում զարգացնել, առաջինը՝ կրթական-բուհական ոլորտում:
Նրա գնահատմամբ՝ Ֆրանսիական համալսարանն այսօր Հայաստանում Ֆրանսիայի ներկայության ամենահաջողված օրինակներից կարելի է համարել, այն այսօր արդեն ունի 2000 ուսանող: Ու քանի որ շատ են ֆրանսիական այն կազմակերպությունները, որոնք ցանկանում են խորացնել համագործակցությունը ՀՀ-ում ինֆորմացիոն տեխնոլոգիաների ոլորտում, այդ իսկ պատճառով Ֆրանսիական համալսարանը եկող տարվանից իր ֆակուլտետներին կավելացնի ևս մեկը՝ հինգերորդը՝ Կիրառական մաթեմատիկայի և ինֆորմատիկայի ֆակուլտետը: Լաքոթի համոզմամբ՝ այս ոլորտում իսկապես աշխատաշուկայում մեծ պահանջարկ կա:
«Մենք նկրտումներ ունենք զարգացնել Ֆրանսիական դպրոցը, մոտեցումը հետևյալն է՝ ունենալ համընդգրկուն մի կառույց՝ մանկապարտեզից բուհ, նախ՝ Հայաստանում աշխատող ֆրանսիացիների, բայց նաև այն հայերի համար, ովքեր կցանկանան իրենց երեխաներին երկլեզվյա ուսուցման հնարավորություն տալ»,- ասաց նա:
Դեսպանը նշեց նաև երկրորդ ոլորտը, որտեղ հարաբերությունների խորացման կարիք կա: Նա ընդգծեց՝ այդ ոլորտում անձամբ է պատրաստ ներդրումներ կատարել, դա տնտեսական ոլորտն է: Լաքոթի պատկերացմամբ՝ այստեղ մեծ ներուժ կա՝ թե ներդրումային տեսանկյունից, թե առևտրատնտեսական ուղղվածությամբ անելիքները շատ են:
Հարակից հրապարակումներ`
- ԼՂ հակամարտությանը Ֆրանսիայում ամենաբարձր մակարդակով ուշիուշով հետևում են. Ջոնաթան Լաքոթ
- Դեսպան. Նախապատրաստում ենք Ֆրանսիայի նախագահի այցը Հայաստան
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին