Կոչ եմ անում խորհրդարանական մեծամասնության չդառնալ կառավարության կցորդը. Նարիա Զոհրաբյան
ԱԺ-ում այսօր քննարկման դրվեց «Ծառուկյան» խմբակցության կողմից ներկայացված «ՀՀ հարկային օրենսգրքում լրացում կատարելու մասին» օրենքի նախագիծը, որը եկամտային հարկի փոփոխությանն է վերաբերում։ ԱԺ Տնտեսական հարցերի մշտական հանձնաժողովում նախագիծը բացասական եզրակացություն էր ստացել:
Հիմնական զեկուցող, ԱԺ փոխնախագահ Միքայել Մելքումյանն իր ելույթում հայտնեց, որ առաջարկում են մինչև 150 հազար դրամ աշխատավարձ ստացողների՝ հունվարի 1-ից փոխված 23 տոկոս եկամտահարկն իջեցնել 21 տոկոսի, իսկ 150 հազարից 300 հազար եկամուտ ունեցողներինը՝ գործող 28-ից իջեցնել 26 տոկոսի:
«Այս փոփոխությունների անհրաժեշտությունը պայմանավորված է հետևյալ գործոններով՝ 2015-ից հետո կառավարությունը թոշակ, աշխատավարձ չի բարձրացնում և միջնաժամկետ ծախսերի ծրագրով ենթադրվում է ևս երեք տարի չի բարձրացնելու: Ստեղծված գնաճը դասակարգային բնույթ չի կրում, այսինքն՝ չի վերաբերում միայն գյուղատնտեսությանը, քանի որ եկամտահարկով չեն գանձվում: Եթե մենք ասում ենք՝ քանի դեռ թոշակ, աշխատավարձ չեք բարձրացնում, ինչը վերաբերում է բոլորին, գործող միջոցը եկամտահարկի նվազեցումն է, որը գնաճի զսպման միակ լուծումն է»,-մանրամասնեց Մելքումյանը՝ շեշտելով, որ պետք է ժողովրդին շանս տալ, որ շնչի։
Տնտեսական հանձնաժողովի նախագահ Խոսրով Հարությունյանն ասաց, որ եկամտահարկին պետք է անդրադառնալ արմատական ձևով:
«Այսպես կիսատ-պռատ լուծումները ոչինչ չեն բերում, տնտեսական պարզ վերլուծությունները ցույց են տալիս, որ ոչ թե քաղաքական լուծում են պարունակում, այլ կներեք՝ իբրև թե մի բան ուզում ենք անել, իմիտացիա ենք անում, որ լուծում ենք: Սա ճիշտ ճանապարհ չէ, և սխալ ազդակներ է փոխանցում հանրությանը»,-ասաց նա՝ ներողություն խնդրելով իր այսպիս խոսքերի համար։
Նաև նշեց, որ ինքը հանձնաժողովում ձեռնպահ է քվեարկել այս առաջարկություններին։ «Կոչ եմ անում խորհրդարանական մեծամասնության չդառնալ կառավարության կցորդը, անհարմար է, մեծ-մեծ խոսում եք պառլամենտական համակարգի անցման մասին, խորհրդարանի դերի մասին, բայց կառավարությունը ոնց մատով ճտացնում է, բոլորդ նստած հլու-հնազանդ ենթարկվում եք»,- վարման կարգով ասաց «Ծառուկյան» խմբակցության պատգամավոր Նաիրա Զոհրաբյանը՝ կոչ անելով կողմ քվեարկել նախաձեռնությանը։
Հանրապետական խմբակցության ղեկավար Վահրամ Բաղդասարյանը խնդրեց կրքերը չբորբոքել. «Եվ կառավարությունը, և խորհրդարանական մեծամասնությունը մեկ թիմ են և քննարկումների արդյունքում են որոշումները կայացնում: Մոտ ժամանակներում եկամտահարկի մասին մենք կունենանք փաթեթ, որտեղ բովանդակային քննարկում կկազմակերպենք և գլոբալ փոփոխությունների կգնանք: Մենք դեմ ենք կոսմետիկ փոփոխություններին, որը արդյունք չի կարողանում տալ»,- ասաց նա և հայտնեց, որ իրենց խմբակցությունը ձեռնպահ կքվեարկի այս օրենսդրական նախաձեռնությանը:
Նախագծին կողմ քվերակեց 33 պատգամավոր, ձեռնպահ 54 պատգամավոր, դեմ քվեարկողներ չեղան։ Այսպիսով որոշումը չընդունվեց։
Հարակից հրապարակումներ`
Լրահոս
Տեսանյութեր
«Տավուշը հանուն հայրենիքի» շարժման անդամները քայլերթով գալու են Երևան. Բագրատ Սրբազան