Ձեր վստահելի աղբյուրը

Կառավարության հետ հարցուպատասխանի ընթացքում հանրապետական խմբակցության պատգամավոր Արման Սաղաթելյանը ՀՀ առողջապահության նախարար Լևոն Ալթունյանից հետաքրքրվեց սոցփաթեթի շրջանակներում ներդրված բուժծառայության ապահովագրական սկզբունքից։

«2017 թվականի հոկտեմբերի 1-ից սոցիալական փաթեթի շրջանակներում ներդրվեց բուժծառայության ապահովագրական սկզբունքը։ Սա մեր երկրում  առաջին փորձն է, մասնավոր ապահովագրությունը չհաշված, երբ քաղաքացիները մասնակցում են առողջապահական ապահովագրությանը ոչ իրենց նախաձեռնությամբ։ Այսինքն՝ սա կարելի է դիտարկել որպես պիլոտ։ Չորս ամիս է անցել, այնուամենայնիվ, ի՞նչ հարց լուծեց սա, ի՞նչ հարցերի առնչվեցինք, և արդյոք սա հիմք է տալիս լավատեսության ապագայում առողջապահական ապահովագրական համակարգը ներդնելու վերաբերյալ»,- հարցրեց պատգամավորը։

Լևոն Ալթունյանն ասաց, որ անցած ամիսների ընթացքում մոտ 96 հազար ապահովագրվածներից ծառայություններ են մատուցվել 38 հազար քաղաքացու։

«Պետք է ասել, որ վիճակագրության վերլուծությունը ցույց է տալիս, որ սոցիալական փաթեթի ծառայություններ մատուցելու ներքո մենք ունենք վիրաբուժական ծառայությունների կտրուկ աճ։  Այսօր մոտ 96 տոկոս ծառայությունները վիրաբուժական միջամտություններ են, այնինչ նախկինում այս խավը ստացել է մոտ 60 տոկոս վիրահատություններ, մնացածը ձևակերպվել է որպես թերապևտիկ ծառայություններ։ Սա խոսում է նրա մասին, որ օգնությունն ավելի հասցեական է և արդյունավետ»։

Արման Սաղաթելյանն արձագանքեց. «Ընդհանուր լուսաբանման տեսանկյունից լայն և հանրային  իրազեկում չի եղել։ Գուցե այդ նախագիծն առանձին ինչ-որ ձևով ներկայացվի՞ հանրությանը, դրա առավելություններն ու լուծած հարցերը, եթե ապագայում միտված ենք գնալ այդ ճանապարհով»։