Ես ինձ մի քիչ հայ զգացի. Ժոնաթան Լաքոտ
Փետրվարի 12-ին ՀՀ սփյուռքի նախարար Հրանուշ Հակոբյանն ընդունել է Հայաստանի Հանրապետությունում Ֆրանսիայի արտակարգ և լիազոր դեսպան Ժոնաթան Լաքոտին: Այս մասին տեղեկացնում են ՀՀ սփյուռքի նախարարության մամուլի և հասարակայնության հետ կապերի վարչությունից:
Ջերմորեն ողջունելով հյուրին՝ նախարարը կարևորել է դեսպանի՝ Հայաստան գալուց առաջ հայ համայնքի ներկայացուցիչների հետ կայացած հանդիպումները և այն վառ տպավորությունը, որ նա թողել է համայնքի ներկայացուցիչների վրա, և նշել. «Կարծում եմ, որ գտնվում եք մի երկրում, որը ամենաջերմ ու առանձնաշնորհյալ հարաբերություններն ունի Ֆրանսիայի հետ: Հայաստանում կայանալիք Ֆրանկոֆոնիայի միջազգային կազմակերպության 17-րդ գագաթնաժողովը, կարծում եմ, ֆրանսիախոս հայկական համայնքներին հայրենիքի հետ կապելու մի նոր շրջափուլի սկիզբ կդառնա»:
Նախարարն ասել է՝ հայ համայնքը միշտ ջերմորեն նշում է, որ երախտապարտ է Ֆրանսիայի պետությանն ու ժողովրդին, որ եղեռնից մազապուրծ հայության բեկորներին ընդունեցին, նրանց կյանքի և գոյության համար նպաստավոր պայմաններ ստեղծեցին, հնարավորություն ընձեռեցին ֆրանսիական բարեգութ հողի վրա հայկական օջախներ ու համայնքներ հիմնել: «Ֆրանսիայում հաստատված հայությունը կազմակերպվել է, ինտեգրվել ֆրանսիական հասարակությանը, իր նպաստը բերել երկրի զարգացմանը՝ միաժամանակ պահպանելով իր ազգային նկարագիրը: Ինչպես Շարլ Ազնավուրն է բնորոշել, նրանք 100 տոկոսով ֆրանսիացի են և 100 տոկոսով հայ»,- ասել է նա:
Հրանուշ Հակոբյանը նշել է, որ Ֆրանկոֆոնիայի գագաթաժողովի շրջանակներում բազմաթիվ միջոցառումներ են կազմակերպվելու նաև հայկական Սփյուռքի մեկ միլիոնանոց ֆրանսիախոս համայնքներում: «Մինչև ամառ մենք քույրացնելու ենք Ֆրանսիայում գործող ամենօրյա հայկական դպրոցները Հայաստանի տարբեր դպրոցների հետ»,- ասել է նախարարը:
Շնորհակալություն հայտնելով ջերմ ընդունելության համար՝ դեսպան Ժոնաթան Լաքոտը նշել է, որ իր համար Հայաստանում Ֆրանսիայի դեսպան լինելը նշանակում է ապրել ծայրաստիճան հյուրընկալ երկրում և գործ ունենալ կազմակերպված ու կարող հայկական համայնքի հետ:
«Այո, Հայաստան գալուց առաջ ես գնացի Մարսել, եղա «A.R.A.M» թանգարանում, ընթերցեցի գաղթական հայերի տպավորությունները, հանդիպեցի համայնքի հետ ու ինձ մի քիչ հայ զգացի: Եվ հիմա ամեն շաբաթ ես լսում եմ որևէ միջոցառման մասին կամ մասնակիցն եմ դառնում նոր ձեռնարկի, որի նախաձեռնողը ֆրանսիայի հայ համայնքի ներկայցուցիչներն են: Կարծում եմ՝ այս տարի, ինչպես Նախագահ Մակրոնը հավաստեց հայ համայնքի հետ հանդիպման ժամանակ, ապրիլի 24-ը որպես Հայոց ցեղասպանության հշատակի օրի կլինի ոչ միայն ձեր, այլ նաև ֆրանսիական օրացույցում»,- ասել է նա:
Դեսպանը կարևորել է Երևանում ֆրանսիական համալիր կրթօջախ ստեղծելը՝ ամբողջացնելով մանկապարտեզ, տարրական, հիմնական և ավագ դպրոցի և ֆրանսիական համալսարանի շղթան, որպեսզի Հայաստանում ապրող ֆրանսիացիների և ֆրանսիախոս հայերի երեխաները լիարժեք կրթություն ստանան: Նա խոսեց նաև ինֆորմատիկայի լիցեյ բացելու նախաձեռնության մասին, որ հետագայում կդառնա համալսարանի ֆակուլտետներից մեկը:
Նախարարը և դեսպանը համակարծիք էին որ Երևան-Մարսել և Երևան-Լիոն չվերթների բացումը կնպաստի զբոսաշրջության և տնտեսական կապերի զարգացմանը:
Լրահոս
Տեսանյութեր
Ոստիկանները Բագրատ Սրբազանին և ԱԺ պատգամավորներին թույլ չեն տալիս մուտք գործել Կիրանց
