Ձեր վստահելի աղբյուրը

Թուրքիան հստակ հայտարարել է, որ ոչ մի խարտիա, հրադադարի ոչ մի ռեժիմ չի կանգնեցնի իրեն՝ լուծելու այն խնդիրները, որոնք առնչվում են Թուրքիայի ազգային անվտանգությանը։ Panorama.am-ի թղթակցի հետ զրույցում այս մասին ասաց թուրքագետ Մուշեղ Խուդավերդյանը՝ անդրադառնալով Անկարայի այն հայտարարությանը, որ Սիրիայում հրադադարի մասին ՄԱԿ-ի անվտանգության  խորհրդի բանաձևը չի ազդի Աֆրինում Թուրքիայի ռազմական գործողությունների վրա, քանի որ այն «ահաբեկիչների դեմ է»։

«Թուրքիայի ղեկավարությունը ցույց տվեց, որ ոչնչի առաջ կանգ չի առնի, քանզի ամեն օր Աֆրին են գործուղվում մեծ քանակությամբ մարդկային  ռեսուրսներ և զինտեխնիկա։ Բացի այդ՝ Թուրքիայի նախագահ Ռեջեփ Թայիփ Էրդողանը հայտարարել է, որ Աֆրինով չեն սահանափակվելու, հարվածելու են նաև Մանբիչին, ուր թեև առկա են ամերիկյան զորամիավորումներ, սակայն դա ևս չի կանգնեցնելու թուրքական զորամիավորումների առաջխաղացումը»,- նկատեց թուրքագետը։

Մուշեղ Խուդավերդյանն ուշադրություն հրավիրեց այն հանգամանքի վրա, որ թուրքական կողմի դիրքորոշումը չփոխեց անգամ ԱՄՆ պետքարտուղար Ռեքս Թիլերսոնի այցն Անկարա։

«Այսքանով հանդերձ, կարելի է ասել, որ էրդողանը տրամադրված է մինչև վերջ կանգ չառնելու ոչ մի բանի առաջ։ Ինչ վերաբերում է զուտ ՄԱԿ-ի անվտանգության խորհրդի ընդունած բանաձևին, ապա Թուրքիան մեկ անգամ չէ, որ ՄԱԿ-ն անվանել է ձևական, միջազգային կարևորագույն հարցերում երկակի ստանդներ կիրառող կառույց»,- հիշեցրեց մեր զրուցակիցը։

Թուրքագետն ընդգծեց՝ Էրդողանը շատ լավ հասկանում է, որ քրդերը որքան Սիրիայում ամրանան, այնքան ուժեղանալու է Քրդական բանվորական կուսակցությունը, որը նոր, հակաթուրքական քայլեր է իրականացնելու։

Ամփոփելով՝ Մուշեղ Խուդավերդյանը չբացառեց, որ միջազգային կառույցները կարողանան ինչ-որ պահի զսպել թուրքական գործողություններն Աֆրինում։

Հիշեցնենք, որ ՄԱԿ-ի անվտանգության խորհուրդը փետրվարի 24-ին Սիրիայում հրադադարի հաստատման մասին բանաձև էր ընդունել, սակայն Անկարան հայտարարել էր, որ այդ որոշումը չի ազդի Աֆրինում գործողության վրա, քանի որ այն «ահաբեկիչների դեմ է»։