Ձեր վստահելի աղբյուրը

Այն բանից հետո, երբ  Ռուսաստանի Անասնաբուժական ու բուսասանիտարական դաշնային ծառայությունը (Россельхознадзор) թույլատրել է թուրքական մի շարք գյուղմթերքների ներմուծումը Ռուսաստան,  թուրքական կողմն այժմ ակնկալում է, որ նմանատիպ քայլ կլինի նաև լոլիկի հարցում։ Այս մասին գրում է «Էրմենիհաբեր»-ը:

Ավելի վաղ  Россельхознадзор-ի մամուլի խոսնակ Յուլիյա Մալենոն հայտարարել է, որ մարտի 5-ից թույլատրվելու է Թուրքիայից Ռուսաստան ներմուծել պղպեղ, սմբուկ, հազար, նուռ, դդմիկ, դդում, որոնց նկատմամբ արգելք էր գործում։

Նշվում է, որ  մինչ վերոնշյալ գյուղմթերքների նկատմամբ ներմուծման արգելք սահմանելը, Թուրքիան դրանց արտահանման արդյունքում 100մլն դոլարի շահույթ էր ստանում։

Թեմայի շուրջ խոսել է Թուրքիայի «Սևծովյան արտահանողների միության» հիմնադիր նախագահ Մուստաֆա Սաթըջըն։

«Թուրք արտահանողները գոհունակությամբ ընդունեցին Ռուսաստանի կողմից արված վերջին քայլը։ Այս որոշմամբ՝ մենք կկարողանանք  100մլն դոլարի արտահանում իրականացնել։  Ինչպես գիտեք,  ոչ բոլոր մեր ընկերություններն են կարողանում  լոլիկ արտահանել Ռուսաստան։ Պետք է վերջ դրվի լոլիկի ներմուծման հարցում  արգելքին։ »,-ասել է Սաթըջըն։

Աղբյուրը հիշեցնում է, երբ Թուրքիայի օդուժը Սիրիայի տարածքում խոցել է ռուսական «Su-24» ռազմական ինքնաթիռը, պաշտոնական Մոսկվան Թուրքիայի նկատմամբ սկսել է տնտեսական պատժամիջոցներ կիրառել։  Արգելվել են մի շարք թուրքական ապրանքատեսակների ներմուծումը Թուրքիայից։

Արգելքները աստիճանաբար վերացվել են այն բանից հետո, երբ Թուրքիայի նախագահ Ռեջեփ Թայիփ Էրդողանը պաշտոնապես ներողություն խնդրեց տեղի ունեցածի առնչությամբ։