Կորեայի Հանրապետության նորանշանակ դեսպանն իր հավատարմագրերի պատճենն է հանձնել ՀՀ արտգործնախարարին
Հայաստանի արտգործնախարար Էդվարդ Նալբանդյանը մարտի 19-ին ընդունել է Կորեայի Հանրապետության նորանշանակ դեսպան Ու Յուն Կինին (նստավայրը` Մոսկվա)՝ հավատարմագրերի պատճենի հանձնման կապակցությամբ։
Շնորհավորելով դեսպան Կինին՝ նախարար Նալբանդյանը հույս է հայտնել, որ դեսպանն իր առաքելության ընթացքում կարևոր ներդրում կունենա երկկողմ հարաբերությունների առավել զարգացման և ամրապնդման գործում։ Էդվարդ Նալբադնյանը խորհրդանշական է համարել, որ հենց այսօր ուժի մեջ է մտել Կորեայի քաղաքացիներին ՀՀ մուտքի արտոնագրի պահանջից ազատելու մասին որոշումը։
Շնորհակալություն հայտնելով ջերմ ընդունելության և բարեմաղթանքների համար՝ նորանշանակ դեսպանն ասել է, որ իր համար պատիվ է Կորեան ներկայացնել Հայաստանի պես հարուստ պատմություն ունեցող երկրում։ Ու Յուն Կինը վստահեցրել է, որ Կորեայի նախագահի հանձնարարությամբ առավելագույն ջանքերը կներդնի տարբեր ոլորտներում հայ-կորեական համագործակցության խորացման համար։
Նախարար Նալբանդյանը և դեսպանը Ու Յուն Կինը մտքեր են փոխանակել քաղաքական, տնտեսական, կրթական և մշակութային ոլորտում համագործակցության, ինչպես նաև իրավապայմանագրային դաշտի ընդլայնմանն առնչվող հարցերի շուրջ:
Զրուցակիցներն անդրադարձել են Եվրասիական տնտեսական միության և Կորեայի միջև համագործակցության հաստատման ուղղությամբ իրականացվող քայլերին։ Կողմերը բարձր են գնահատել երկու երկրների խորհրդարաններում գործող բարեկամության խմբերի ակտիվ գործունեությունը, որոնք իրենց նպաստն են բերում երկկողմ հարաբերությունների զարգացման գործին։
Նախարար Նալբանդյանը դեսպան Ու Յուն Կինին է ներկայացրել հոկտեմբերին Երևանում կայանալիք Ֆրանկոֆոնիայի գագաթաժողովի նախապատրաստական աշխատանքները:
Հայաստանի արտաքին քաղաքական գերատեսչության ղեկավարը և Կորեայի Հանրապետության դեսպանը մտքեր են փոխանակել մի շարք միջազգային և տարածաշրջանային խնդիրների և դրանց լուծման ուղիների շուրջ։ Դեսպան Ու Յուն Կինը ներկայացրել է կորեական թերակղզում խաղաղության և կայունության ամրապնդման ուղղությամբ գործադրվող ջանքերը և վերջին զարգացումները։
Էդվարդ Նալբանդյանը դեսպանին ներկայացրել է ղարաբաղյան հիմնախնդրի խաղաղ կարգավորման ուղղությամբ Հայաստանի և ԵԱՀԿ Մինսկի խմբի համանախագահների կողմից գործադրվող ջանքերը։
Լրահոս
Տեսանյութեր
«Տավուշը հանուն հայրենիքի» շարժման անդամները քայլերթով գալու են Երևան. Բագրատ Սրբազան
