Ձեր վստահելի աղբյուրը

Թուրքիայում նախագահական ընտրություններում Ռեջեփ Թայիփ Էրդողանի և խորհրդարանական ընտրությունների արդյունքում նրա ղեկավարած ուժի՝ «Արդարություն և զարգացում» կուսակցության հաղթանակները խոսում են այն մասին, որ  մոտակա տարիներին Թուրքիայում կտեսնենք էլ ավելի միանձնյա ղեկավարություն: Այս մասին այսօր լրագրողների հետ հանդիպման ժամանակ ասաց Արևելագիտության ինստիտուտի տնօրեն Ռուբեն Սաֆրաստյանն՝ անդրադառնալով Էրդողանի՝ Թուրքիայի նախագահի պաշտոնում վերընտրվելուն:

Հիշեցնենք, որ Թուրքիայի նախագահ Էրդողանը հունիսի 24-ին կայացած արտահերթ նախագահական ընտրություններում ստացել է  ձայների 52%-ը:

Ռուբեն Սաֆրաստյանի խոսքով՝ Էրդողանը ստացավ այն, ինչ ցանկանում էր. «Ստանալով ժողովրդի քվեն, ինչպես ինքն էր հայտարարել՝ հնարավորություն կստանա վերափոխումներ իրականացնել: Իսկ այդ վերափոխումների արդյունքում, ինչպես Էրդողանն է բազմաթիվ անգամներ հայտարարել, պետք է ի հայտ գա նոր Թուրքիա, որն իր պատկերացումների համաձայն՝ պետք է իրականություն դարձնի առաջիկա հինգ տարիների ընթացքում»:

Մյուս կարևոր հանգամանքը, ըստ բանախոսի, այն է, որ քրդամետ` «Ժողովուրդների ժողովրդավարություն» կուսակցությունը կարողացավ մտնել խորհրդարան՝  հաղթահարելով 10%-ի շեմը և ստացավ ավելի շատ ձայն, քան 2015թ-ի ընտրությունների ժամանակ:

Ռուբեն Սաֆրաստյանը նշեց, որ այս կուսակցության դեմ աննախադեպ ճնշումներ իրականացվեցին, կուսակցության առաջնորդը, ղեկավարության մեծ մասը գտնվում են բանտերում, բայց այդ աննախադեպ ճնշումների պայմաններում կուսակցությունը կարողացավ մտնել խորհրդարան և ստանալ 1%-ով ավելի ձայն, քան նախորդ ընտրություններում:

«Սա վկայում է այն մասին, որ քրդական հարցը Թուրքիայում ոչ միայն պահպանում է իր սրությունը, այլ առաջիկա տարիներին քրդական հարցի հետ կապված կտեսնենք բավական լուրջ սրացումներ»,- ընդգծեց նա:

Հաջորդ կարևոր հանգամանքը, ըստ թուրքագետի, այն է, որ մինչև ընտրությունները տեղի ունեցավ պառակտում «Ազգայնական շարժում» կուսակցության միջև, որը երկու մասի բաժանվեց, բայց կուսակցության ղեկավարը՝ Դևլեթ Բահչելը միացավ Էրդողանին և անցան խորհրդարան՝  գրեթե պահպանելով իրենց ձայները. «Սա նշանակում է, որ պանթուրքիստական գաղափարները Թուրքիայում ոչ միայն պահպանվում են, այլև հավատացած եմ, որ  նոր պայմաններում կստանան ավելի մեծ տարածում, ավելի մեծ ազդեցություն կունենան Թուրքիայի արտաքին քաղաքականության վրա: Կարծում եմ, որ այս միտումը պետք է հաշվի առնենք»:

Ռուբեն Սաֆրաստյանը նշեց նաև՝  կարևոր է հաշվի առնել այն, որ չնայած Էրդողանն՝ իր կուսակցությամբ հաղթեց ընտրություններում, սակայն հավաքեց 7 տոկոս պակաս ձայներ, ինչը նշանակում է, որ այս կուսակցության հեղինակությունը Թուրքիայում սկսում է անկում ապրել: 

«Այս վաղաժամկետ ընտրությունների պատճառներից մեկն այն էր, որ Էրդողանը դա շատ լավ ընկալեց,  հնարավորինս արագ կազմակերպեց ընտրությունները և դաշինք կնքեց պանթյուրքիստական կուսակցության հետ»,- ասաց նա:

Ըստ նրա՝ սա առաջին հերթին պայմանավորված է այն հանգամանքով, որ վերջին տարիներին Թուրքիայում տնտեսական աճի տեմպերը թուլացել են, սոցիալական վիճակը երկրում փոխվել է դեպի ավելի վատը, ինչն իր ազդեցությունն ունեցավ կուսակցության վարկանիշի վրա:

Ռուբեն Սաֆրաստյանը նշեց նաև, որ Էրդողանը երեկվա  իր հաղթական ճառում պարզ ասել է՝ նոր Թուրքիան, իր երազած Թուրքիան մոտակա տարիներին պետք է մտնի աշխարհի 10 հզորագույն պետությունների շարքում:

«Այնպես որ, այս նոր Թուրքիան պետք է շարունակի Էրդողանի արկածախնդրային արտաքին քաղաքականությունը»,- ասաց թուրքագետը: