Ձեր վստահելի աղբյուրը

«Գազպրոմ-մեդիա հոլդինգ» ժամանցային հեռուստաալիքների սուբհոլդինգի գլխավոր տնօրեն Արթուր Ջանիբեկյանը  «Ռուսաստանի մեդիա-մենեջեր 2018» ազգային մրցանակի «Գրան-պրիի» դափնեկիրն է: Ռուսական լրատվամիջոցների հաղորդմամբ, մրցանակաբաշխության արդյունքները հայտարարվել են երեկ երեկոյան:

Գլխավոր մրցանակը Ռուսաստանի լավագույն ժամանցային հեռուստաալիքների արդյունավետ կառավարման, զարգացման, նշանակալի նվաճումների, 14-44 տարիքային հեռուստալսարանում պահանջված բովանդակություն ստեղծելու և թվային միջավայրում մեդիա բովանդակությունը մեծացնելու համար է:

Մինչև գրանպրին Արթուր Ջանիբեկյանը 2012, 2016 և 2017 թվականներին արդեն արժանացել էր «Ռուսաստանի մեդիա-մենեջեր» մրցանակի` հեռուստատեսային արտադրանքների ստեղծման գործում բացառիկ ավանդի, ինչպես նաև կոնտենտ-փրոդաքշընի ոլորտում կնքված խոշորագույն գործարքի համար:

«Ռուսաստանի մեդիա-մենեջեր» XVIII ազգային մրցանակաբաշխությունը ներկայացնում է տարվա թոփ մենեջերներին: Մրցանակը գնահատական է հայրենական մեդիաբիզնեսում պրոֆեսիոնալ մասնագիտական աշխատանքի համար:

Արթուր Ջանիբեկյանի ղեկավարած «Գազպրոմ-մեդիա հոլդինգ» ժամանցային հեռուստաալիքների սուբհոլդինգը միավորում է թոփային ТНТ, ТВ-3, «Пятница!», ТНТ4, 2х2, «Супер», «Матч TV» հեռուստաալիքները, Comedy Club Production-ը և Good Story Media պրոդյուսերական ընկերությունները:

«Ռուսաստանի մեդիա-մենեջեր 2018»-ի լավագույններին ընտրել են խոշոր կորպորացիաների ներկայացուցիչները, փորձագիտական խորհուրդը, մրցանակաբաշխության քաղաքական խորհրդի անդամները: Ընտրելիս հաշվի է առնվել ինովացիոն գաղափարների ներդրումը մեդիայում և բիզնեսի դինամիկ զարգացումը:

Մրցանակաբաշխության նախորդ տարիներին տարբեր անվանակարգերում «Ռուսաստանի մեդիա-մենեջեր» մրցանակի են արժանացել «Russia Today» հեռուստաընկերության գլխավոր խմբագիր Մարգարիտա Սիմոնյանը, ՌԴ ԱԳՆ մամուլի խոսնակ Մարիա Զախարովան, НТВ ընկերության գլխավոր պրոդյուսեր Տիմուր Վայնշտեյնը և ոլորտի մի շարք պրոֆեսիոնալներ: