Դիրեկտոր, կառավարիչ, տեր «Լիդիան»-ում չեմ եղել, վերջակետ. Արմեն Սարգսյան
«Հեղափոխությունից առաջ և հետո Երևանում քայլող մարդիկ տարբեր են: Նրանք ուրախ են, ապագային ուրախությամբ են նայում, պետք է կույր լինես, որ չտեսնես՝ երկրում առկա մթնոլորտը փոխված է: Մարդիկ հավատում են իրենց ապագային, ժպտում են, որովհետև իրենց ապագան ավելի լավն են տեսնում: Հետևաբար, այո, հեղափոխություն է տեղի ունեցել: Մարդիկ մտածում են, որ տարիներով իրենց տրված խոստումներն իրականություն են դառնալու»,- ՄԱՀԻԻ երրորդ երիտասարդական ֆորումի ժամանակ այսօր ասաց ՀՀ նախագահ Արմեն Սարգսյանը:
«Հեղափոխությունները մեկ օրով չեն, հեղաշրջումներն են մեկ օրով: Հեղափոխությունները պատմական գործընթաց են: Կոռուպցիայի դեմ պայքարը պրոցես է, սոցիալական արդարությունը մի օրում չի կայանում, դա ևս պրոցես է: Բայց ամենամեծ հեղափոխությունն այն է, երբ մարդիկ ուրախ են: Հեղափոխությունը մեկ օրով չի սկսվում և ավարտվում, այն գուցե ապրում ենք ամիսներ կամ տարիներ: Հայաստանում կատարվածն, այո, հեղափոխություն էր»,- ասաց ՀՀ նախագահը:
Արմեն Սարգսյանը նաև ընդգծեց՝ հայրենասիրությունը միայն սահմանը պաշտպանելը չէ, նաև մշակութային ժառանգությունը գնահատելն է:
«Մենք առնվազն մի քանի հարյուր հազար ներքին տուրիստ պետք է ունենանք: Մեկուկես միլիոն մարդ ամեն տարի Հայաստանից գնում է Վրաստան, իսկ Արցախ տարեկան այցելում է 18 հազար մարդ՝ մեծ մասը երևի զինծառայողների ծնողներ: Ինչու չենք գնում օրինակ Գյումրի, Արցախ: Արցախ գնալը մի քանի ժամ է, եկեք գնանք Արցախ: Մեր մեջ շատ բան պետք է փոխենք: Մենք պետք է սիրենք մեր երկիրը»,- ասաց նա:
Ներկաները ՀՀ նախագահին խնդրեցին անդրադառնալ նաև Ամուլսարի խնդրին:
«Ամուլսարը մեր երկրի համար ցավոտ հարց է: Բնապահպանական առումով ես լրիվ, իմ էությամբ կանաչի կողմնակից եմ: Ժառանգությունը ոչ միայն մշակութայինն է, այլև՝ բնապահպանականը: Ամենամեծ արժեքը մեզ համար բնությունն է, բայց ամենամեծ արժեքը՝ ջուրն է: Բնապահպանությունը նախ ջրապահպանությունը պետք է լինի: Մենք վատ ենք կառավարում մեր ջուրըը: Մենք այն վատնում ենք, մինչդեռ մեզ համար ջուրը շատ էական է:
Ամուլսարը շատ զգայուն տեղում է, Ամուլսարը սիմվոլ է: Մեր բնական ռեսուրսը ոչ մոլիբդենն է, ոչ ոսկին, այլ ջուրը: Սա մի ապրանք է, որ կարող ենք արտահանել, բայց չենք արտահանում: Արաբական երկրները նավթ ունեն, բայց ջուր չունեն: Սրանից հինգուկես տարի առաջ ինձ առաջարկեցին դառնալ «Լիդիան» ըկերության տնօրենների խորհրդի անկախ անդամ: Հայաստանում գրեցին, որ ես տնօրեն եմ, այսինքն՝ դիրեկտոր, կառավարիչ, տեր: Դրանցից ոչ մեկը չեմ եղել և չեմ, վերջակետ: «Լիդիանի» տերերը Կանադայի բորսայում գրանցված ընկերություններ են, կարող եք Գուգլ անել, տեսնել, նրանք թաքնված չեն»,- ասաց Արմեն Սարգսյանը՝ հավելելով, որ անձամբ ինքն աջակցում է կառավարության՝ Ամուլսարի հարցով լուծումներին:
Հարակից հրապարակումներ`
- Կարծում էի՝ Հայաստանը յոթ տարվա մեջ կկառուցենք, պարզվեց՝ կառուցեցինք յոթ օրվա մեջ. Արմեն Սարգսյան
- Հայաստանում առկա ոգին ֆենոմենալ և յուրօրինակ է. ՀՀ նախագահ