Մենք պասիվ չենք եղել. Տ. Բալայան
Հայաստանի և Ադրբեջանի արտաքին գործերի նախարարների բրյուսելյան հանդիպմանը Ադրբեջանի նախագահ Իլհամ Ալիևի հետ հանդիպելու պայմանավորվածություն ձեռք չի բերվել։ Լրագրողների հետ հանդիպմանն ասաց ՀՀ ԱԳՆ մամուլի խոսնակ Տիգրան Բալայանը։
Նրա խոսքով, պայմանավորվածություն կա, որ կոնտակտները շարունակական լինեն։
«Կար ոչ պաշտոնական մակարդակով հնչեցված տեսակետ, թե միգուցե նախընտրական շրջանում ինչ-որ դադարներ լինեն։ Մենք գտնում ենք՝ բանակցային գործընթացին նախընտրական շրջանը խոչընդոտ չի կարող հանդիսանալ»,- ասաց Տ. Բալայանը։
Խոսելով ապրիլյան պատերազմից հետո ձեռք բերված պայմանավորվածությունների՝ Վիենա, Սանկտ-Պետերբուրգ, Ժնև, կատարման մասին, նա նշեց, որ արդեն երկու տարուց ավելի է Ադրբեջանը խոչընդոտում է պայմանավորվածությունները կամ դրանց ի կատար ածումը։
«Խոսքը ԵԱՀԿ գործող նախագահի անձնական ներկայացուցչի թիմի կարողությունների ավելացման, շփման գծում նրանց տեղակայման, որպեսզի կարողանան վերահսկել իրավիճակը, միջադեպերի քննության մեխանիզմի ներդրման մասին է» - ասաց Տիգրան Բալայանը` հավելելով, որ նախընտրական շրջանը չի կարող խնդրահարույց լինել այդ պայմանավորվածությունների իրականացման հարցում։
«Հակառակը, մենք կարծում են, որ խաղաղությունն այնպիսի արժեք է և պայմանավորվածությունների կատարումը պետության համար այնքան կարևոր է, որ որևէ դադար կամ հանգամանք չպետք է պատճառ դառնա դրանց հետաձգման համար», - ասաց Տ. Բալայանը։
Հարցին, թե ՀՀ ԱԳ նախարարությունն անհրաժեշտություն չի՞ տեսնում ավելի ակտիվացնել բանակցությունների դինամիկան, Տ. Բալայանը պատասխանեց. «Մենք պասիվ չենք եղել»։
Ինչ վերաբերում է ՆԱՏՕ-ի վերջին գագաթաժողովի հռչակագրին, ՀՀ ԱԳՆ մամուլի խոսնակն ասաց, որ ծանոթ է տարբեր մեկնաբանություններին, գնահատականներին, չի ուզում այստեղ զբաղվել լեզվաբանական վերլուծություններով։
«Հստակ է, որ ՆԱՏՕ-ի վերջին գագաթաժողովի հռչակագրի 67-րդ պարագրաֆում ամրագրված է, որ հիմնախնդիրները պետք է կարգավորվեն գործող ձևաչափում, միջազգային իրավունքի սկզբունքների, մասնավորվապես ՄԱԿ-ի կանոնադրության, Հելսինկիի եզրափակիչ ակտի հիման վրա։ Սա այն է, ինչ ասում ենք մենք՝ միջազգային իրավունքի հիման վրա և գործող ձևաչափերում»։
Լրահոս
Տեսանյութեր
Բագրատ Սրբազան. ՔՊ անդամներ արդեն իսկ ներքին ուղերձներ են հղում, թե ինչպես կարող են միանալ մեզ