Ձեր վստահելի աղբյուրը

«Բարգավաճ Հայաստան» խմբակցության պատգամավոր Շաքե Իսայանը ԱԺ Մարդու իրավունքների մշտական հանձնաժողովը նախագահելու համար առաջադրված թեկնածու Նաիրա Զոհրաբյանից հետաքրքրվեց, թե  ինչպես է վերաբերում դատապարտյալներին ներում շնորհելու ինստիտուտին։
Մասնավորապես՝ ցմահ դատապարտյալներից մեկին` Մհեր Ենոքյանին հնարավոր ներում շնորհելուն։

Նաիրա Զոհրաբյանը պատասխանեց. «Այսօր մենք ունենք 91 ցմահ դատապարտյալ։ Որոշ դատապարտյալների գործերը միանշանակ վերանայելու կարիք կա, մասնավորապես՝ «Դրոյի» գործով Արմենակ Մնջոյանի, որ վերջերս մահացավ բանտում, և նույն գործով ցմահ դատապարտված Արսեն Արծրունու: Նրանք դատապարտվել են բանակում կատարած հանցագործությունների համար: Ես հիմնավորապես զբաղվել և շարունակելու եմ զբաղվել բանակում ցմահ դատապարտվածների գործով և պնդում եմ՝ այդ տղաների գործը պետք է վերանայվի, որովհետև եթե սպան փորձել է անարգել զինվորին, ինչի արդյունքում սպանություն է եղել, և այդ զինվորը 20 տարի և ավելի նստած է, արդյոք այդ գործերը չպե՞տք է վերանայվեն»։

Ինչ վերաբերում է ներման ինստիտուտին, Զոհրաբյանն ասաց. «Քանիցս այս ամբիոնից խոսել ենք այդ խայտառակ հանձնաժողովի մասին, որն աշխատում է գիր-ղուշով, գալոչկայով են որոշում կայացնում և դատապարտյալների չտեսնելով` սովորաբար դիմումները մերժում են` խուսափելով բեռ վերցնել իրենց ուսերին: Մհեր Ենոքյանի գործին մանրամասն ծանոթ եմ,  դետալային ծանոթ եմ, բայց չեմ հրապարակի իմ անձնական մոտեցումը, քանի որ գործը մտել է գաղտնի քննարկման փուլ: Ընդամենը մեկ բան կարող եմ ասել՝ առաջիկայում մեր խմբակցությունը հանդես է գալու օրենսդրական նախաձեռնությամբ, որ ներման շնորհման գործընթացի ինչ-որ փուլում անպայմանորեն պետք է հաշվի առնվեն զոհի իրավահաջորդների մոտեցումները: Սա անչափ կարևոր է։ Ես ցավագին եմ տեսնում այն պրոցեսը, որ գնում է, Աղաջանովի հարազատները այժմ կրկնակի վիկտիմիզացիայի են ենթարկվում` ապրելով այս ամբողջ ողբերգությունը»։

Նա ևս մեկ անգամ շեշտեց, որ ներման ինստիտուտը պետք է ամբողջովին վերնայվի. «Ինձ համար սկզբունքային է, որ ծանր հանցագործությունների դեպքում ներման ինստիտուտի գործարկման փուլում անպայմանորեն հաշվի առնվի նաև զոհի հարազատների տեսակետը»։

ԲՀԿ պատգամավոր Արման Աբովյանն էլ հետաքրքրվեց Ադրբեջանում պատանդի կարգավիճակում գտնվող ՀՀ քաղաքացիների, ինչպես նաև վերջին դեպքի՝ Կարեն Ղազարյանի մասին։

Զոհրաբյանը պատասխանեց, որ 4 պատանդ կա այժմ Ադրբեջանում, երկուսը՝ ՀՀ քաղաքացի, երրորդը՝ Արցախի քաղաքացի, չորրորդը՝ Ռուսաստանի քաղաքացի՝ ազգությամբ հայ։

Ինչ վերաբերում է Կարեն Ղազարյանին՝ ասաց. «Եթե ասեմ, որ մեր հանձնաժողովը շատ լուրջ գործիքակազմ ունի, անկեղծ չի լինի: Ավելորդ հանրայնացումը, աղմուկը շատ դեպքերում վնասում է, սա ասում եմ որպես պատգամավոր: ԿԽՄԿ-ի հետ զբաղվել ենք ռազմագերիների, մասնավորապես, Հակոբ Ինջիղուլյանի հարցով, մենք դա արեցինք լուռ, հանգիստ, առանց աղմուկի՝ նաև աշխատելով ԵԽԽՎ մարդու իրավունքների նախկին հանձնակատարի հետ»։

Նրա կարծիքով` պարզապես պետք է պարբերաբար պատկան մարմիններից տեղեկություններ ստանալ առանց ավելորդ աղմուկի: