Ձեր վստահելի աղբյուրը

Լրագրողներն այսօր պատգամավոր Նիկոլայ Բաղդասարյանից հետաքրքրվեցին՝  հնարավո՞ր է, որ ՄԻԵԴ-ը ՀՀ երկրորդ նախագահ Ռոբերտ Քոչարյանի գործով ևս դրական որոշում կայացնի,  ինչին ի պատասխան՝ նա նկատեց, որ ՄԻԵԴ դիմելը դեռևս իրենից խնդիր չի ներկայացնում։

«Երեկ Էդմոն Մարուքյանը ներկայացրեց կոմունիկացիաների մասին։ Դա կոմունիկացիա չէ, այլ հաղորդագրություն։ Դա կառավարություն-ՄԻԵԴ հաղորդագրություն է, դա որևէ հետևանք չի առաջացնում»,- ասաց նա։

Հարցին՝ եթե այնուամենայնիվ, գործը կոմունիկացվի, կարո՞ղ է համարվել այս իշխանության ձախողում, պատգամավորը շեշտեց՝ դա կլինի մեկ-երկու տարի հետո։

«Բազմաթիվ պետություններ ՄԻԵԴ-ում մեծ քանակությամբ պարտված գործեր ունեն, և գործերի մի մասը, հաստատ համոզված եմ, վերաբերելու է նախկին  իշխանությունների ընդունած օրենքներին։ Նախորդ իշխանության կողմից օրենքներն ընդունվել են՝ ոչ թե հաշվի առնելով պետության  կամ քաղաքացու շահը, այլ ինչ-որ անհատի շահ։ Եթե ՄԻԵԴ-ի որոշումները կվերաբերեն նախկին իշխանությունների կողմից ընդունված օրենքներին, սխալ կլինի ասել, որ դա մեր մեղքն է»,- ասաց Նիկոլայ Բաղդասարյանը։

Պատգամավորը չհամաձայնեց հնչած այն դիտարկումների հետ, որ իրավապահ մարմինները շատ դեպքում շտապողականություն են ցուցաբերում՝ միայն թե դրական արդյունքներ ցույց տան վարչապետին։

Լրագրողներից մեկը հիշեցրեց, որ երբ ԱԱԾ տնօրեն Արթուր Վանեցյանը հայտարարեց Ռոբերտ Քոչարյանի՝ «Կոնգրես» հյուրանոցը կաշառքով գնելու մասին, այնուհետ խոստովանեց, որ շտապել է գնահատական տալ։

«Եթե խոսքը վերաբերում է գնահատմանը, այո, ես էլ եմ ասում, որ գրեթե բոլոր իրավաբանները կարող են սխալվել։ Դա նորմալ երույթ է, շտապողականություն չէ։ Չկա որևէ քննիչ, որն իր գործունեության ընթացքում մեղադրանքը փոփոխած չլինի։ Այդտեղ որևէ իրավական խնդիր չկա։ Իրականում, խնդիր կա ինչպես քննչական և հետաքննչական մարմիններում, մեծ խնդիրներ ունենք դատարաններում, փաստաբանների շրջանում, բայց մենք խնդիր ունենք, որ վերապատրաստենք այդ մարդկանց, վերափոխենք օրենքները»,- ասաց նա։

Ինչ վերաբերում է գաղտնալսման մասին հայտնի գործին, լրագրողները Նիկոլայ Բաղդասարյանից հտաքրքրվեցին՝ արդյոք այդ հարցն ուսումնասիրող ԱԺ քննիչ հանձնաժողովը շարունակելո՞ւ է աշխատանքները։

«Գործը քննվում է։ Երբ որ կքննվի, բոլոր փաստական հանգամանքները կհավաքագրվեն, այն չի բավարարի հասարակությանն ու պատգամավորներին, ես ինքս կողմ եմ, որ քննիչ հանձնաժողով ձևավորվի»,- նշեց նա։

Հարցին՝ արդարացվա՞ծ են արդյոք վերջին շրջանում աղմկահարույց գործերով դատավորների հայտնած ինքնաբացարկները, Նիկոլայ Բաղդասարյանը պատասխանեց՝ ցավոք, ինքնաբացարկի ինստիտուտը որոշ դատավորների կողմից այդպես էլ ճիշտ չընկալվեց։

«Մի քանի ամիս է՝ Ռոբերտ Քոչարյանի գործից հետո պարզաբանում եմ, որ դատավոր Ալեքսանդր Ազարյանը սխալ գործընթաց է իրականացնում։ Ինքնաբացարկ կարող է ընդունվել երկու՝ օբյեկտիվ և սուբյեկտիվ անաչառության դեպքերում։ Նելլի Բաղդասարյանի գործով էլ  ոչ օբյեկտիվ և սուբյեկտիվ անաչառության դեպքեր չկան։ Դատավորներն իրավունք չունեն հրաժարվել արդարադատություն իրականացնելուց։ Իսկ եթե իրենք ընդունում են ինքնաբացարկի որոշում՝ գործը «քցելու» իրենց վրայից, դա անօրինական է։ Տվյալ դատավորը պետք է ենթարկվի պատասխանատվության, պետք է հարուցվի կարգապահական վարույթ։ Կարծում եմ՝ Արդարադատության նախարարությունը պետք է արձագանքի այս ինքնաբացարկներին»,- ասաց նա։