Ձեր վստահելի աղբյուրը

Վրացագետ Ջոնի Մելիքյանը կարծում է, որ Վրաստանի իշխանության ներկայացուցիչները դեռ հանդիպում քննարկումներ  կունենան  նախագահ Սալոմե Զուրաբիշվիլիի հետ Ադրբեջանում ու Հայաստանում  հնչեցրած հայտարարությունների վերաբերյալ։ Միաժամանակ նա կոշտ չի որակում նախագահի հայտարարությունը, ասում է՝ սեփական նախաձեռնությամբ ֆիքսեց այն, ինչ կար։

Հիշեցնենք, որ Բաքվում հարևան երկրի նախագահը հայտարարել էր Ադրբեջանի ու Վրաստանի տարածքների օկուպացիայի մասին։ Երևանում նրանից պարզաբանում էր պահանջել ԱԺ նախագահ Արարատ Միրզոյանը։

Մելիքյանը հետևել է Զուրաբիշվիլիի հայտարարությունների վրացական արձագանքներին։ Ընդդիմադիրները քննադատել են, իշխանության ներկայացուցիչներն առայժմ լուռ են։ Նա կարծում է, որ Վրաստանի նախագահն իշխող ուժի ուղերձները չէ, որ փոխանցել է։

«Նախագահը նոր է ընտրված, նա այսօրվա կառավարության հետ կապ չունի, և դեռևս վաղ է ասել, որ ինչ-որ բան է փոխվել հայ-վրացական հարաբերություններում։ Կփոխվի, եթե նույն բանը հայտարարեն Վրաստանի վարչապետը, կամ ԱԺ նախագահն ու ԱԳ նախարարը։ Հիշեցնեմ, որ Զուրաբիշվիլին ընտրվել է որպես անկախ և ոչ թե «Վրացական երազանք»-ի թեկնածու։ Վրաստանի նախագահը սահմանփակ լիազորություններով ներկայացուցչական պաշտոնյա է»,-ասաց նա։

Մելիքյանը համարում է, որ հայտարարությունն արվեց վրաց-ադրբեջանական հարաբերություններում վերջին շրջանում առկա խնդիրները մեղմելու համար: Դրանք առաջացել էին կապված հայ համայնքի կողմից արձանի վերականգնման ու տեղադրման, գազի դիվերսիֆիկացիայի շուրջ քննարկումների, ադրբեջանական համայնքի հետ:

«Քանի որ նախընտրական քարոզչության ընթացքում Վրաստանում և Ադրբեջանում փորձում էին Զուրաբիշվիլիին ցույց տալ որպես պրոհայկական գործիչ, նա ավելի ընկալելի ու ընդունելի էր հայ համայնքի կողմից, իմ կարծիքով, դա էր պատճառը, որ առաջին այցը կատարվեց դեպի Բաքու։  Պետք էր ինչ-որ բան հնչեցնել Բաքվում: Եթե հայտարարեր տարածքային ամբողջականության սատարելու մասին, այդքան մեծ աղմուկ չէր բարձրանա, ինքը մի քիչ այլ կերպ արեց, խոսեց օկուպացիայի վտանգի մասին ու ստեղծեց այս իրավիճակը: Դրան հետևեց հայկական կողմին տված պարզաբանումները: Պետք է ֆիքսել, ունենք այն, ինչ ունենք, ընդունենք խնդիրներն ու շարունակենք գործել»,-ասաց վրացագետը:

Հայկական կողմի ուղերձը հստակ էր: Մելիքյանն ընդգծում է, հայտարարվեց՝ կոնֆլիկտների հիմքերը տարբեր են, պետք է տարբերվեն նաև լուծումները, բացի այդ ԵԱՀԿ անդամ երկիրը պետք է սատարի Մինսկի խմբի ձևաչափին։

Հիշեցնենք, որ Հայաստանի  նախագահ Արմեն Սարգսյանը հայտարարել էր.  «Իմ վրացի գործընկերոջ հետ համակարծիք էինք, որ հիմնահարցերը և հակամարտությունները նույնական չեն, հետևաբար` նույնական չեն նաև դրանց կարգավորման հիմքերը»։

Միաժամանակ փորձագետն ուրախ է, որ կուլիսներում ընթացող խոսակցությունները բարձրաձայնվելուց հետո կողմերն անկեղծորեն հայտնեցին իրենց դիրքորոշումները։

«Կարևոր է, որ հանրային քննարկումները տեղի են ունենում, շատ կարևոր է, որ կողմերն իրար հասկանան, այսինքն՝ մենք մեր խնդիրը լուծելու ենք այսպես, մյուս կողմը՝ այնպես»,-նշեց նա։

«Կոմերսանտ»-ը,  անդրադառնալով Վրաստանի նախագահի հայտարարություններին, գրել էր՝ նա Անդրկովկասում խախտեց հավասարակշռությունը։

«Պետք է հասկանալ, որ միջպետական հարաբերությունների վրա երրորդ կողմը փորձելու է ազդել՝ լինի Ռուսաստանը, թե արևմուտքը, Ադրբեջանը կամ Թուրքիան։ Դրա համար էլ Հայաստանը մշտապես շեշտում է, որ երրորդ կողմի ազդեցությունը պետք է նվազագույնի հասցվի,  հարաբերությունները պետք է զերծ պահենք դրանցից»,-ընդգծեց Մելիքյանը։

Ինչ վերաբերում է Հայաստանի ու Վրաստանի միջև սահմանների հստակեցման վերաբերյալ նախագահ Զուրաբիշվիլիի հայտարարություններին, ապա փորձագետը հիշեցնում է, որ միջկառավարական հանձնաժողովի աշխատանքն արդեն երկար տարիներ դադարեցված է, այդ ուղղությամբ որևէ գործընթաց չկար։

«Այդ նախաձեռնության մասին նա Բաքվում էր հայտարարել։ Կարևոր է, որ այդ գործընթացը Ադրբեջանի հետ ավարտին հասցվի, քանի որ այնտեղ կա վրացական եկեղեցու շահը։ Եվ որպեսզի բալանսավորում լինի, նույն հարցի մասին հնչեցվեց Հայաստանում։ Կարևորն այն է, որ սահմանների հստակեցման հարցում Հայաստանն ավելի քիչ խնդիրներ ունի, քան Ադրբեջանը»,-կարծիք հայտնեց նա։